Failimon
Poolbed Failimon Yaa Kerek Keenoon
Kerek Kee Komo Dowad Wongkoon
Failimon kuu anam andoonman Kolose aom doboroon. Ye kuu ye dabderem yiri dobere ye deme awinembiridan yenayiib. Kuye karub maa kuu Onesimus. Ye kuu Failimon yaambed yid bekore kombiri wonoon. Kwane kuu Rom yi amob aombed kuu dabab kuu ayiiwe bobni yeman. Amaanbed Onesimus kuu Pool durunenekore weng amun wengamberekore anam andoon. Kowe, Poolbed Failimon yaa Onesimus ye ambarakmi are nonondande ande wongkoon, ye kangkon anam andoonman keroon kowe. Wongkoon yaron kuu Kolosedan yaa wongkoon yaron kowe, wongkoon ye weeb kuu AD 60 areb.
Korok Weng
1. Kubeni Weng Ibduruk (ves 1-3)
2. Eso Ande Kurikuri Kami Ye Weng (4-7)
3. Onesimus Ye Dowad Kaamoboon (8-22)
4. Yeenbon Weng (23-25)
1
1 Ne Pool, Yesu Keresu ye dowadbed wii karub keraan yoom Timoti nub kuristen angkodmi maa yoom.
Failimon, nub angkodmi deme karub ibonmo awinuwenman, eb yaa weng kee keebduub. 2 Kwane wene nub angkodmi yu aningko Apfiayiiwa, wene nub deme mimoman ana nangmidan areb awinembiri ye karub Aakipusiiwa, kwane wene God yaa anam andiwendan eb ambiwoombed nedbenib kurikuri kerimaib kuu yiib korem yaa weng kee keenduub kii.
3 God ye kabamoon kondoon ye mimyob dowakeniib nangkema yewenuwiib kuu nub Ambe Godiib Yariman Yesu Keresuyiib yaambed yiib ari menebok.
Failimon Ye Anam Andi
4 Ne aron korem ne God yaa kurikuri kerimain kuu, eb dowadiib eso ande kurikuri kamembirimain, 5 amborom kuu eb anam andi Yariman Yesu yaayiib eb mimyob dowaken God ye karadkonodan yaayiib kuu wengain kowe. 6 Ne kurikuri kerimain kuu Yesu Keresu nub yaa amun kerundoone korem kee ebkaadkerewen kuyaambed, eb anam andimbed anam andidan yaa aromneneb ibmo mene yone daboknaneeb kuu yiminmo keraneeb. Kukuu Yesu Keresu yaningko darewoob keruni yeman. 7 Nangkodmi, eb mimyob dowaken keendimaab kuu wedmaan kowe, yewenubmo kubi darewoob kandaan, amborom kuu God ye karadkonodan yi niindem aom kuu kubi dowaken ben kondewen kowe.
Onesimus Ye Dowad Kaamonoon
8 Kwana kowe, kwamune Keresu yaambed ne kuu arudkonomo kwane andi ye weng eb yaa kowaniin kuu, yorokmo ye kiwaan arimbed eb kwane ambangkaneebmo, 9 kumban nembed yedmaan kuu mimyob dowakenbed kowenid. Kowe, ne Pool kiom mana kereni, angkon Yesu Keresu ye dowad yaa wii karub keraan kumbed, 10 eb yaa ema yedme kowaan kuu, anam andi yaambed ne dana keroonman Onesimus ye dowad kaamobdandamaan.
Ne kuu wii aom dibiine, ye kuu kwane ne dana keroon. 11 Anukbed ye kuu eb awabdi yemanban kumban, kibikee awandi ye karub amun keroon, eb yaayiib ne yaayiib.
12 Mimyob darewoob kowaan ye karub kee, nembed kan kowaana ika eb yaa ku monoon kii. 13 Ne kuu Yesu ye weng amun ye dowad wii aom doriin yaron kuu ne meeni dowaken kuu kwane neka keyoom awinenako doborok, eb yumbon kande doberene awawok andid. 14 Kumban eb yaadin ma kaamobdindombed nembed Onesimus yaa awawi deme ogoodmo koni kuu ne dowakenban, ye kuu eb deme karub kowe. Kwanaan amborom kuu eb awawi weng dakmaneeb kuu kwane eb dowaken yaambedmo, dedmonaane eb dowakenban yaambedban kii. 15 Kwamuneene, anuk kuu Onesimus kuu aron dukmenmo eb yaambed doombere angkane doberene kuristen keroon ye dowad kuu, mokuro, kibikee aron korem ebmanmo keraneen. 16 Eb yaa ika monoon kuu eb dabderem yiri dobere no deme awinembiri ye karub ika kerimo yemanban, inamen kee burudande eb mimyob dowaken keeni ye angkodmi keri yeman kui. Ne mimyob dowaken darewoob ye yaa kowaan, kumban eb mimyob dowaken arimbed dareb keri ye karub keroon, ye kuu karub amuniiwa ye kuu Yariman yaambed eb angkodmi kerooniiwa kowe.
17 Kwani kowe, Pool kuu ne angkodmi amun anam andebka, kwane ebbed ne yaa amun nambiwoom mene andimaab kwane areb kuu, Onesimus kuu amun kwane ika mene nambiwoom ande. 18 Kowe, ye kwamune eb yaa ma ambarakmoon keroka, eb yaa maa dungkum keroona ma angkeen keroka, ye dabab o dungkum eb yaa kuu kan ne yaa kawebko nembed ongmebde, inebde kama. 19 Ne Pool, nembed kerek kee wongkaan, neka ne dingkimbed kii. Anamaa, ne ika ye dungkum kuu ingkabdaniin. Kumban meenme, kedmengkabdaane anam andewen kowe, eb dungkum ne yaa kuu ebka eb wadkeri kui. 20 Ee nangkodmi, ke kaamonaan kuu Yariman yaningko yaambed ne dowad awawe andid, angkon ne niindem aom kuu Keresu yaningko yaambed kubi dowaken kan kawe.
21 Nembed kangdommo meenaan kuu komo andaniin kuu no kwane awinaneeb kowe, kerek kee wane keebdaan, amborom kuu nekaadkeraan kuu komo deme eb yaa kabde dakmaan korem kuu kwane ariyiib darewoobmo awinaneeb kii. 22 Kowe, weng maa kuu kei. Eb ambiwoom wadnarimbon mimo ne meneni ewiib dobiri dowad ongme, amborom kuu nembed meenaan kuu God yiib kurikuri weng wengambere inandene kiwaan ongmaneena ne nekwane yiiwiib yaa mananiin kowe.
Yeenbon Weng
23 Epafras, Yesu Keresu ye dowad ne yoom ke wii aom doruub kuu kubebdi weng eb yaa kowoon. 24 Kwaneene, deme ne yoom awinimaibdan Maak yoom Aristaakus yoom Demas yoom Luk yoom kuu yi kwangkon kubebdi weng keebdiib kii.
25 Kowe, kwane Yariman Yesu Keresu ye kabamoon kondoon ye mimyob dowaken kuu kwamune yiib kingkin yaayiib ibmo awandok.