1 Iki de chi ute ttu chupa ubisaha nna bedesin Jesús‑ni lhe'esi Capernaum‑ni attu libe. Sun tteba bina ka benne deki chi doe lhe'e yo'oha, 2 nianna bitupa tteba ixeruke. Laxkala axtaba ro'o puertaha birua rakanike. Jesús‑ni nna rigixxi'anie ke ka tisa ge Tata Do Yebáha. 3 Nianna tti bisin ttapa ka benne biyú nujake ttu benne daa yatti latie ata dueha. 4 Ttaka kumu de tupa xxatta galá benne ro'o yo'oha, laxkala bi uka ga'ake len benne raniha kini isinke ata du Jesús‑ni. Nianna tti ugwapike iki yo'oha nna utuake ttu chupa ka texa ki udo belea ttu lhixxaba ata dueha. Aníha‑ruba kini uka ulhidake benne raniha xue lo ttu breta. 5 Tti bilani Jesús‑ni gwa riaba le ka benneha deki gwadaabe eyonie benne daa yatti latieha, nianna tti ree benneha:

―Xi'ini to kia, nnanna chiba bixú elha xen lasi ge ka tulha gelu‑na.

6 Niha‑gaba se'e ttu chupa ka nu rule'ekinna ka benne nu ra lo bia bennabi bodha'an Moisés‑ni. Ka nuha nna belaba lhi'u lekani, rakakinna: 7 “¿Beaka rinne nu du‑ni aní? Rilhida gaabana Tata Do Yebáha tti rinnena aná. Lanú nu aka geni dhina elha xen lasi ge ka tulha ruin ka benne, sunruba Tata Do Yebáha gwaka gebie dhie elha xen lasi gekani.”

8 Ttaka Jesús‑ni nna ute da ttebanie deki rulaba lhi'u lekani aníha. Nianna tti unnaba tise kana, ree:

―Lebi'i nna, ¿beaka rulaba lhi'u lele aná? 9 Gwalinnáruga, ¿bí nuha nu sattiru gari'i benne daa yatti latie‑ni? ¿Si gari'e: “Chiba bixú elha xen lasi ge ka tulha gelu‑na” ak? o ¿gari'e: “Beyadha nna bodaxxu nu xualu loin‑na nna bedá”? 10 Nnannaruga ula'ania le ki uyú lole deki neti benne daya yebáha, yiesi lo yu‑ni gwa teeba lo neda kia ki dhia elha xen lasi ge ka tulha ruin ka benne.

Nianna tti ra Jesús‑ni benne daa yatti latieha:

11 ―Lu rulisaa. Beyadha nna bodaxxu nu xualu loin‑na nna beyya lisilu.

12 Benne daa yatti latieha nna beyadha ttebe nna bodaxxue breta xue loniha nna berie lo iyába ka nu se'e niha. Ka nuha nna iyábakana bebanakinna, rákana:

―¡Xxeniba ra le Tata Do Yebáha! ¡Niru tsa labí chi bilenri'i aka luesi nu uka‑ni!

13 Iki de nuha nna bederia Jesús‑ni dedheyye ro'o indatooha nna iyába ka benne risinke ata dueha. Labie nna rule'enie ke ka tisa ge Tata Do Yebáha. 14 Tti utebie die, nianna bilánie Levíxi'in biyú Alfeo‑ni dona ata rukixakana belhiu nu daa lo ka benne rigixake ge Roma. Nianna tti ree na:

―Utá betenalha neti.

Nianna udú lii ttebana nna gwanalhane.

15 Uka nuha, tti chi do Jesús‑ni go yetta lhe'e lisi Leví‑ni, ixeba ka gwekixa lhe adíru ka nu tekinna lákani deki ankakana ka nu ruin satsa se'egabakana lenie go yetta. Anágaba nna se'egaba ka benne rudhetinieha. Kumu ixeba chi raka ka benne danalhake bieha. 16 Ka nu rule'ekinna ka benne nu ra lo bia bennabi bodha'an Moisés‑ni, delába ka nu ankakana fariseo, tti bilákinna dobie go yetta len ka gwekixaha lhe ka nu ruin satsaha lhe, nianna tti rákana ka benne rudhetinieha:

―¿Beakala maestru gele‑na nna robe yetta len ka gwekixa‑na lhe len ka nu ruin satsa‑na lhe?

17 Tti biyienin Jesús‑ni nu rákanaha, nianna tti ree kana:

―Ka nu abittu rani‑na, ka nuná labí riyasakin nuná nu eyoinna kana, sinuki ka nu rani‑nala nuná riyasakinna nu eyoinna kana. Neti laa dagaa raxia ka nu ruin nu dika ixú, sinuki dalaa kini raxia ka nu ruin satsa.

18 Atti bilani ka benne deki ka nu rudhetini Juan benne rugadi indaha lhe ka nu rudhetini ka fariseo‑ni lhe, ka nuha rutteba ubina lhe'ekani, labí rokana yetta, nianna tti ugía ka benneha nna gweasike Jesús‑ni:

―¿Beakala ka nu rudhetini Juan‑ni lhe ka nu rudhetini ka fariseo‑ni lhe rutteba ubina lhe'e ka nuná, ka nu rudhetinlu‑na nna labí rutte ubina lhe'e ka nuná?

19 Nianna bekabi Jesús‑ni, ree kana:

―¿Laaba ganna labí dika utte ubina lhe'e ka benne biyaxi kini tse'eke dha'aha, laka sa du nu kwiti rutsá nániha lenke? Neti ria: laka sa du nu kwitiha lenke labí dika utte ubina lhe'eke. 20 Ttaka ganna chi bisia sá tti itua nu kwitiha, anúruna dho lenke, la'anialigaba nna chi utte ubina lhe'eke.

21 ’Anágaba lanú ttu benne do rotábie ttu ro'o lari kubi ro'o xo yaxxu geeha. Kumu ganna aníha unie, la'ania nna iyalhiba ro'o lari yaxxuha, nianna adíla satsa ireda xoeha, 22 lhe nigaba lanú ttu benne do riga'abie vinu kubi lhe'e ka yieti yaxxu. Kumu ganna aníha unie, vinu kubiha, ganna chi úlana, la'ania nna itsúba nuha yietiha nna ilaliba vinuha lhe tse'e loogaba yietiha lhe. Laxkala vinu kubiha teeki ita'a nuha lhe'e ka yieti kubi.

23 La sá tti reyaka le ka benne Israel‑ni, la'ania ute Jesús‑ni lhe'e ka xuxtila se'e niha len ka benne rudhetinieha. Ka benneha nna uduloke richekuke iki ka xuxtilaha. 24 Ka fariseo‑ni nna rákane:

―¡Biyúruga! ¿Beaka ruin ka nu rudhetinlu‑na nu abittu ga'anna uinri'i lhe'e ka sá atti reyaka leri'i?

25 Lee nna bekabie, ree kana:

―¿Si ni tsa abittu chi belabale lo yetsi ge Tata Do Yebáha ata rigixxi'a bí ben David‑ni ttu libeha? Yule benneha itupa lenie ka benne ugweki lenie la'ania, tti bituinkeha nna biyasakanie nu goke. 26 La'ania uta'a David‑ni lhe'e yotu ge Tata Do Yebáha atti anka Abiatar‑ni bixxudi xeni. Nianna utoe ka yettaxtila ka nu chi riesike ankake sun tteba ge Tata Do Yebáha, anágaba nna begwegabe ka benne se'e lenie la'ania ki utoke benneha, delába utoke ka yettaxtila ka nu labí ga'anna go attu benne subi, sunruba ka bixxudiha gwaka gokana benneha.

27 Jesús‑ni nna rágabe kana:

―Ka sá tti reyaka leri'i‑na ukakana ki ri'i ixuinri'i kana, laa uligari'i kini nu innála ka sá‑na uinri'i. 28 De nuha nna neti benne daya yebáha, netiba ankaa xxana ka sá reyaka leri'i. De nuha nna gwa teeba lo neda kia innía bixa dika uinri'i lhe'e ka sá reyaka leri'i.