1 Iki de chi unne Jesús‑ni nuha, nianna tti belhidha loe yebáha nna ree:

―Tata, chiba bisia ura nuní. Neti benne ankaa Xi'inlu, bele'e nu xxeni ra lasia, kini anágaba neti ule'a nu xxeni ra lelu, 2 kumu lu chi betelu lo neda kia kini innabiaya iyá ka benne, kini anáchu unia ki satíaba aka ben iyá ka benne chi betelu lasi náya. 3 Ganna ka benne chi benbiake lu deki ankalu gwalíga ttu túbiru Diosi lhe ganna chi benbiake neti Jesucristu benne udhelhalu yiesi lo yu‑ni, la'ania nna ka benneha satíaba aka benke arlolu. 4 Neti chiba bele'a nu xxeni ra lelu yiesi lo yu‑ni, chiba uluxati sina nu bedha'anlu unia. 5 Nnanna nna xa Tata, ben kini neti eyakaa benne ra xxeni lasia arlolu, ben ki eyakaa atti tteba ankaa tti doa lenluha atti lanila kwe yiesi lo yu‑niha.

6 ’Ka benne chi bekwelu lagwi ge ka benne se'e yiesi lo yu‑ni nna betelu ke len neti, ka benne‑ni chiba bele'enia ke nuxa ankalu. Gebalu ankake nna betelu ke len neti. Lake nna gwa rudobake tisa ge nu ralu. 7 Nnanna chiba yuke deki iyába nu betelu len neti, luba betelu nuha, 8 kumu ka tisa betelu len netiha chiba utixxi'ania ke ka nuha nna gwa belabibake ka tisaha. Nnanna nna chiba yuke deki gwalíba ata dolu‑naba biriaya daya lhe chigaba ugía leke deki luba udhelhalu neti.

9 ’Ge ka benne‑ni rinnabaa lenlu xa tata. Labí rinnabaa ge ka nu abittu ria lekani neti, sinuki rinnabaa ge ka benne betelu len neti, kumu gebalu ankake. 10 Iyába ka benne ankake kia, gegabalu anka ka benneha lhe iyába ka benne ankake gelu, kígabaa anka ka benneha. De ka benneha nna rule'e nu xxeni ra lasia.

11 ’Neti labíru dhoa yiesi lo yu‑ni, ttaka lake tse'erubake. Neti nna esiabaa ata dolu‑na xa Tata. Lu ankalu nari xú, labí tulha ruinlu. De nuha nna ka benne chi betelu len neti, biyú ke len nu ra tsitsi lelu‑na kini anáchu akake ttúba benne attiba ri'i ankari'i ttúba benne. 12 Tti doa lenke yiesi lo yu‑niha, gwa biyúbaa ke len nu ra tsitsi lelu. Ka benne betelu len netiha, gwa biyúbaa ke nna ni ttúke labí binittike, sun ttúba nu chi ga'anna inittiha, binittina. Aníha uka kini gwado tisa ge nu ra lo ka yetsi geluha.

13 ’Nnanna chiba esiaya ata dolu‑na, ttaka laka sa doa yiesi lo yu‑ni rigixxi'aya nuní kini lake nna itta suba dhu leke attiba neti itta suba du lasia. 14 Neti chiba utixxi'ania ke ka tisa gelu‑ni, ttaka ka nu se'e yiesi lo yu‑ni ritisilakinna ke kumu de labí ankake ge yiesi lo yu‑ni, attigaba neti labí ankaa ge yiesi lo yu‑ni. 15 Labí rinnabaa kwealu ke lagwi ge ka benne se'e yiesi lo yu‑ni, sinuki odilálalu ke lo ná nu xxegwiha. 16 Lake labí ankake ge yiesi lo yu‑ni, attigaba neti labí ankaa ge yiesi lo yu‑ni. 17 Ka tisa gelu‑ni ankake nu gwalí. Beni kini, tti iyienkanie ka tisa‑ni nna iriesike akake gelu. 18 Attiba kwinalu udhelhalu neti yiesi lo yu‑ni, anágaba neti ridhelhaa ke yiesi lo yu‑ni ki kixxi'ake ka tisa gelu. 19 De lake nna neti biriesia ki ixúa lo sina gelu, kini anágaba lake iriesigabake ki ixúke lo sina gelu de ria leke ge nu anka gwalí.

20 ’Labí sun ge ka benne‑ni rinnabaa len kwina lu. Anágaba rinnabagabaa ge ka nu tsia lekani kia tti iyienkinna ka tisa kixxi'a ka benne‑ni, 21 kini anáchu nna iyába ka nu tsia lekani kia ttisidiba ttúba benne eyakakana, attiba lu xa Tata, ttúba benne ankalu len neti, neti nna ttúba benne ankaa lenlu. Anágaba ka nu tsia lekaniha, ttúba benne eyakakana len ri'i, kini anáchu adí ka nu a ria lekani nna tsia lekani deki luba udhelhalu neti. 22 Neti chiba benia kini inná xxeni le ka nu tsia lekani kia attiba lu chi benlu ki uná xxeni lasia, kini akakana ttúba benne attiba lu len neti ttúba benne ankari'i. 23 Lu dulu len neti; neti nna dhua lenkana, kini lakana nna gwalíga isinkana eyakakana attisidiba ttúba benne, kini anáchu adíru ka benne se'e yiesi lo yu‑ni tte dákanie deki luba udhelhalu neti lhe gwa rakabinlu ge ka nu tsia lekani kia attiba rakabinlu kia.

24 ’Ka nu chi betelu len neti xa Tata, raka lasia ata dhoaha, niha‑gaba tse'ekana, ki ilákinna nu xxeni ra lasia nu chi betelu len neti, kumu lu rakinlu kia attili lani kwe yiesi lo yu‑niha. 25 Tata, lu ankalu benne runi attiba ankaba geni. Ka nu se'e yiesi lo yu‑ni labí chi ankabiakinna lu, ttaka neti chiba ankabiati lu. Ka nu chi betelu len neti chiba yúkana deki luba udhelhalu neti. 26 Chiba utixxi'ania kana nuxa ankalu, anába sa kixxi'ania kana, kini anáchu attiba rakinlu kia, anágaba lakana akin ge luesikani. Neti nna dhoa lhe'e lastokani.