3
1 Nianna, ¿bí nu tse dhi ttu benne de anke nu Israel ganna? Lhe, ¿bí nu tse dhie de ruu lo bela latie ganna? 2 Ixeba nu tse dhibie xa. Kumu lade'a tte, len ka benne Israel‑ni bodha'an Tata Do Yebáha ka tisa utixxi'a kwinaga labie. 3 Nianna, ganna ttu chupake abittu bedoke tisa ge nu reeha, ¿si de abittu bedo ka benneha tisa ge nuha, si de nuha nna abitturu uin Tata Do Yebáha nu chi rabie ke deki unie? 4 ¡Ko'o, labí de nuha! Kumu meskiba iyá ka benne ankake nu gwen lasi, ttaka Tata Do Yebáha labí anka benneha nu gwen lasi; gwa ruinba benneha nu chi rabie unie. Ruinbe attiba ra lo ka yetsi geeha ata dia ra:
Lu ankalu benne rinnelu nu anka gwalí,
de nuha nna gwadaabalu edúlu lo ka nu rinnekana gelu.
5 Ttaka ri'i ganna nu satsa ruinri'iha, rixúna kini rula'a deki Tata Do Yebáha anke benne runi attiba ankaba geni, ganna aníha rula'a, ¿si innári'i deki satsaba nuha runie de rugwebie ri'i elha disa? ¡Ko'o, labí! Neti nu rinnea‑ni rinnebaa na attiba rinneba adí ka benne. 6 Neti ria, ganna Tata Do Yebáha abíba runie attiba ankaba geni, la'ania nna labí aka ge benneha innábie gá se'e ka nu ruin satsa lhe gá se'e ka nu ruin tse lhe. 7 Ttaka ganna ri'i de ankari'i nu gwen lasi, ganna de ankari'i nuha nna rula'a deki Tata Do Yebáha anke benne rinnebie nu anka gwalí lhe rula'a deki ra xxeni lebie lhe, ganna aníha nna, ¿beakala sa rábakana deki ankari'i benne runi tulha? 8 Ganna aníha anka nna, ¿beakala a innálari'i: “Uinlari'i nu satsa kini iria ttu nu tse”? Ria aní, kumu se'e ka nu rusiakana ikitu rákana deki aní rekitu rinnetu. Ka nu rusiakana ikitu deki ratu aní, ka nuná ralhabakana dhíkana elha disa ute Tata Do Yebáha.
Iyá xeaba ka benne se'e yiesi lo yu‑ni ankake nu ruin tulha
9 Nianna, ¿si innári'i deki ri'itu ka nu Israel ankatu benne ruin tserutu tti adí ka benne? ¡Ko'o, labí! Neti chiba ria deki ka nu Israel lhe ka nu abittu ankakana nu Israel lhe, iyá tteri'i ankari'i nu ruin tulha, 10 kumu lo ka yetsi ge Tata Do Yebáha dia ra:
Niruba ttu benne do runie nu dika ixú, kwachiruba ttu benne xa.
11 Niruba ttu benne a rite danie ge Tata Do Yebáha,
lhe anágaba niruba ttu benne do a runie egile benneha.
12 Betse'e loona iyábakana bekwittalakana lo neda geeha.
Turo'oba benkana, iyábakana ankakana nu abittu ixú.
¡Niruba ttu benne do a runie latsiru, kwachiruba ttu benne xa!
13 Ttiba ttu yieru baa du yali ro'oni, aníha‑ba ankakana, abittuba raga tisa satsa ro'okani.
Lhusakani gwexunniba rinnena gwen lasi tti ridí yiena ka benne.
Ttiba inda dhua belha, aníha‑ba anka ka tisa riria ro'okani tti rinnekana.
14 Satíaba rigekana lhe rinne díkana lhe.
15 Gwexunniba riakana rettikana ttu benne
16 lhe gaxaba diakana rutse'e lookana ka benne lhe rugwekana ke elha disa lhe.
17 Ka nuná abittuba yúkana gasina tse'ekana latsiru len ka benne,
18 lhe abittugaba elha rasi gekani tee len Tata Do Yebáha lhe.
19 Ttaka ri'i gwa yúbari'i deki iyába nu ra lo bia bennabi bodha'an Tata Do Yebáha, ka nu rudokana tisa ge nuná, sun ka nunába rulisa nuná. Aníha kini abittu bi tee ro'okani innákana deki labí yúkana nu ra lo nuná lhe anágaba kini iyá xeaba ka benne okinni ikike deki gwalíba tee tulha geke arlo Tata Do Yebáha. 20 Laxkala niruba ttu benne do, de rudobie tisa ge nu ra lo bia bennabi‑na, de nuha nna gapa Tata Do Yebáha bie kwenta deki chiba anke nu abitturu yua nuje ge nu runie. Kumu bia bennabi‑na sunruba rixú nuná kini yuri'i deki ankari'i benne runi tulha.
Tata Do Yebáha, de ria leri'e, de nuha nna runie kini abitturu yua nujari'i ge nu ruinri'i
21 Ttaka nnanna chi rule'en Tata Do Yebáha ri'i nu dia lo bia bennabi bodha'aneha lhe nu ra lo ka yetsi bodha'an ka profeta geeha lhe, delába rule'enie ri'i gasina runie kini ri'i abitturu yua ujari'i ge nu ruinri'i. Nnanna labíru rixúnie bia bennabi‑na kini kuabie yua kwe'eri'i. 22 Nnanna chi runie kini iyába ka benne, de tsiaba leke ge Jesucristuha, de nuha‑ba nna abitturu yua ujake ge nu ruinke. Kumu Tata Do Yebáha ttúba ruin benneha len iyábari'i, 23 kumu iyábari'i ruinri'i tulha, de nuha nna labí ralhari'i edí baari'i xiani ge Tata Do Yebáha. 24 Ttaka labie, de anke benne tse, de nuha nna kwentaba redá lebie runie kini abitturu yua rujari'i ge nu ruinri'i de utti Jesucristuha utixe geri'i. 25 Jesucristuha nuha chi ga'anani Tata Do Yebáha idhelhe kini len reni belali benneha tti uttie lo ya kurusiha, len reniha uxí Tata Do Yebáha elha xen lasi ge ka benne de ria leke ge Jesucristuha. Aníha ben Tata Do Yebáha kini bela'a deki anke benne runi attiba ankaba geni. Kumu de anke benne re besi lebie, de nuha nna gwa uxíbe elha xen lasi ge ka tulha ben ka benne ttuha. 26 Ttaka nnanna chi rule'enie ri'i deki lee anke benne runi attiba ankaba geni lhe anke benne runie kini abitturu yua ujari'i ge nu ruinri'i de chi ria leri'i ge Jesucristuha.
27 Nianna, ¿gála gwaga'ari'i elha ttaba ruinri'iha ganna? Chiba bituana xa. ¿Bí lo ni'a ge bituana ganna? ¿Si de rudori'i tisa ge nu ra lo bia bennabi‑na ak? ¡Ko'o, labí! Sinuki de ria leri'i ge Jesucristuha, de nuha nna chiba bitua elha ttabaha. 28 Laxkala rudhaka leri'i deki de tsiaba leri'i ge Jesucristuha, de nuha‑ba nna abitturu yua ujari'i ge nu ruinri'i; labí de udori'i tisa ge nu ra lo bia bennabi bodha'an Tata Do Yebáha nna abitturu yua ujari'i ge nu ruinri'i. 29 Nianna, ¿si suna Diosi ge ka nu Israel‑niba anka Tata Do Yebáha ak? ¿Laaba ganna ankagabe Diosi ge ka benne abittu ankake nu Israel? Ila, ankagalee Diosi ge ka benneha, 30 kumu ttúba Tata Do Yebáha do. Benneha unie kini ka nu Israel‑ni, de tsiaba lekanie, de nuha‑ba nna abitturu yua ujakana ge nu ruinkana. Anágaba ka nu abittu ankakana nu Israel, de tsiagaba lekanie, de nuha nna unie kini abitturu yua ujakana ge nu ruinkana. 31 Nianna, ¿si kuabari'i lidhaka bia bennabi‑na de chi ria leri'i ge Jesucristuha? ¡Ko'o, labí! Sinuki ugwerulari'i lidhakani de chi ria leri'i ge benneha.