1 Lo yetsi‑ni dia nu ben Tata Do Yebáha kini Jesucristuha bela'anie nu chi tte dabiga aka. Jesucristuha nna bedonie kini ka benne rixúke lo sina geeha bodola'agabakanie nu chi dabiga akaha nna udhelhe anjeli geeha len neti Juan benne rixúa lo sina geeha kini anjeliha nna benie kini bela'ati iyá nuní. 2 Neti nna rigixxi'abaa ge iyába nu bela'ati; delába nu utixxi'en Jesucristuha neti lhe nu unne Tata Do Yebáha lhe.

3 Karubáru ka benne ulabake ka tisa dia lo yetsi‑ni, delába ka tisa ka nu chila rigixxi'akana ge nu chi dabiga aka lhe karubáru ka benne gudo nagake ge ka tisa‑ni lhe uinke nu rákana lhe, kumu chi tteba dabigana aka nu ra ka tisa‑ni.

4-5 Neti Juan ridhelhaa yetsi‑ni len lebi'i, ka benne ankale gasi dhi se'ele daka Asia‑na. Lebi'i nuná chi ria lele Jesucristuha.

Tata Do Yebáha doe ttuha‑li lhe doe nnanna lhe dhoe nu si daa lhe. Benneha lenie gasi ka espíritu, ka benne se'eke arlo ata du xxila doe rinnabieha lhe anágaba Jesucristuha lhe, ka benne‑ni nuní edá leke aka lenke le lhe use'eke le xen su lasi lhe. Jesucristuha anke benne rigixxi'e nu dika tsia leri'i lhe anke benne sisi'a tte beyadhe lagwi ge ka benne chi uttiha, lhe anágaba anke xxeniru arlo ka nu rinnabia se'e yiesi lo yu‑ni. Benneha rakanie geri'i lhe len reni geeha bodilábie ri'i lo ka tulha ruinri'i. 6 Jesucristuha benie kini akari'i ka nu innabia, lhe anágaba ki akari'i ka bixxudi kini ixúri'i len Tata Do Yebáha, delába benne anke Tata geeha. Benneha inná xxeni lebie lhe inná tsitsi lebie ttu dia lii. Amén.

8 Tata Do Yebaa benne anke Xxanari'iha lhe ra tsitsi xxatta lebie lhe, benneha ree: “Neti ankaa benne riduloa lhe ankaa benne rulhuxa looa lhe. Neti doa ttuha‑li lhe doa nnanna lhe dhoa nu si daa lhe.”

9 Neti Juan, ankaa betsi to gele. Neti de ria lasia Jesús‑ni, de nuha nna neti lhe lebi'i lhe turo'oba rutto ruchíari'i elha disa lhe anágaba turo'ogaba ribedari'i isia sá tti innabia Tata Do Yebáha. Neti doa lo yu tee láni Patmos, nuní rena lagwi indatoo‑ni. Niba doa uleakana neti de rekia ugixxi'a ka tisa ge Tata Do Yebáha lhe de rigixxi'aya ge nu ben Jesucristuha lhe. 10 Tti bedú ni'a xumanuha, tti anka sá ge Tata Xisiha, la'ania bisia Espíritu ge Tata Do Yebáha latia. Tti chi yu'u benneha latia nna biyienti tsi'i ttu benne daka kwe'a unnebie idisa ttiba riyieni idisa ge ttu trompeta. 11 Benne unneeha, ree:

―[Neti ankaa benne riduloa lhe ankaa benne rulhuxa looa lhe.] Nnanna ben lo yetsi iyá nu rilenlu‑ni nna udhelha na len gasi dhi ka benne chi ria leke Jesucristuha se'e lhe'e ka yiesi se'e daka Asia‑na, delába ka benne se'e lhe'esi Éfeso lhe ka benne se'e lhe'esi Esmirna lhe anágaba ka benne se'e lhe'esi Pérgamo lhe Tiatira lhe Sardis lhe anágaba ka benne se'e lhe'esi Filadelfia lhe Laodicea lhe.

12 Neti tti bodeki loa kini iláti nú benne nuha rinnebie len neti, nianna tti bela'ati gasi ka candeleru ge oru ralha gi lokani. 13 Lagwi ge ka candeleruha bela'ati ttu benne rule'ebie attiba rula'a benne daa yebáha, nukue ttu xalho risinna axtaba yien ni'e nna xika ro'o lastoe ttu yieti ankana ge oru. 14 Itsa ikieha nna sitsi túba ankana, ankana ttiba itsa xo ttu neru sitsi lhe ankana sitsi ttiba begi. Ka iyya loeha nna xiná túba ankakana ttiba anka belha ge gi. 15 Ka ni'eha nna raka lhalhabakana attiba raka lhalha iyya nu tee láni bronce tti reriana lhe'e ornu. Tsi'ibie nna riyienna attiba riyieni tti riginni idila inda lo ttu benunni. 16 Daka ná benbie nna denie gasi ka beli, ro'obie nna riria ttu espada tutsa gwi nna lo kwe'eba espadaha ria. Lobie nna raka lhalhaba attiba raka lo tatubisa‑na tti do dia lobie.

17 Atti bela'ati benneha, bere tteba loa arloe, ttiba ttu nu yatti ukaa. Labie nna uxxua ná banie ikia nna ree:

―Bittu gasinlu, kumu neti ankaa benne doa sisi'a tteha lhe ankaa benne doa ttu dia lii lhe, 18 anka bania nnanna lhe. Uttibaa, ttaka nnanna ttu dia liiba doa anka bania. Netiba denia yagwi ge elhuttiha lhe yagwi ge belha'a chulhaha lhe. 19 Ben lo yetsi‑na nu chi bilenlu uka lhe nu rilenlu raka nnanna lhe nu si ilenlu aka nu si daa lhe. 20 Aní diani gasi ka beli den ná bania‑ni lhe aní diani gasi ka candeleru ge oru‑ni lhe. Gasi ka beli‑ni ankakana gasi ka anjeli ruyúkana gasi dhi ka benne ria leke neti nna gasi ka candeleru ge oru‑ni nna ankakana ka benne chi ria leke neti selake lhe'e gasi dhi ka benneha.