1 Jesús‑ni nna rabie ka benne rudhetinieha:

―Teekiba ixú yie ka benne uinke ttu bixa nu satsa, ttaka ¡karusi'iru nu dhi yiena ka benneha! 2 Tserula ganna uxxigakana yienni ttu íyya ge mulinu nna udelhakana na lhe'e indatooha, a laa kila dhi yiena ttu ka nu abittu ra xxeni lekani se'e nii ki uinkana nu satsa. 3 ¡De nuha nna gwaluyú gele!

’Ganna ttu betsi to geri'i utsetsinna lu, utisa na nna ganna ennabana elha xen lasi lenlu, uxí elha xen lasi geni. 4 Ganna gasi lidú utsetsinna lu lhe'e ttu sá nna ganna iyába gasi lidúha isiana gana lu: “Chiba bodúna neti nna uxíchi elha xen lasi kia, labíru unia aná”, la'ania nna lu uxíba elha xen lasi geni.

5 Ka benne rudhetini Jesús benne anke Xxanari'iha, ráke bie:

―Beni kini ri'itu tsia tsitsiru letu Tata Do Yebáha.

6 Jesús‑ni nna ree ke:

―Ttibanka ttu besi to ge kuana muxtasa, ttu nuxka'a toru anka nuha, aníha‑gaba nuná lebi'i, ganna ttuxka'a to tte tsia lele Tata Do Yebáha, la'ania nna gwakaba gele gale yaga du naa: “Belhupi ata yadalu‑na nna ugía beyada lagwi indatooha.” Yagaha nna gudobana tisa gele.

7 ’Ganna ttixka nuxa ttule do ttu benne lo sina gele, ribenie lo ka yu geleha o rekie lo ka ku'una bia geleha, nna ganna chi resie rie lhe'exxiha nna, ¿si gweale benneha: “Aní bete bedoni kini golu yetta”? 8 Laaba ganna gálale benneha: “Beni irsea nna bedú tse kini ka'alu goa. Axtaliba ganna chi bekoa, la'anialiba nna chi aka gelu dholu golu lhe i'iyalu lhe.” 9 Anágaba nna nigaba a rugwele benneha ixkixaru de benie nu chi raleha. 10 Anágaba lebi'i, ganna chi lhuxinle iyá nu chi ra Tata Do Yebáha uinle, la'ania nna innále: “Ri'itu benne abí dika ixúba ankatu, kumu benbatu nu daba lotu uintu.”

11 Tti yu'u Jesús‑ni neda die lhe'esi Jerusalén‑ni nna utebie ata risá debaa Samaria‑ni len Galilea‑ni. 12 Nianna bisine lhe'e ttu yiesi to. Lhe'e yiesi toha nna biria tsii ka benne biyú raka yiesu latike. Yiesuha tee láni lepra. Ka nubiyúha idittuliba se'eke nna 13 uresi'ake, ráke Jesús‑ni:

―¡Maestru Jesús, gwatuachi lelu ri'itu!

14 Tti bilani Jesús‑ni ka benneha, nianna ree ke:

―Gwaleyya nna gwatatso du arlo ka bixxudiha.

Laka deyu'uke neda deyyakeha nna betúa yiesuha latike. 15 Ttu ka benneha nna tti chi bilánie betúa yiesuha latie, nianna beyekie ribesi'abie, ree:

―¡Xxeniba ra le Tata Do Yebáha!

16 Nianna bedú xibie arlo Jesús‑ni, tuttíruba bere lobie lo yu begwebie benneha ixkixaru. Benne beyekie betebie ixkixaruha, benneha anke benne ge Samaria. 17 Jesús‑ni nna rabie:

―¿Laaba tsiile nuná betúa yiesu‑na latile? ¿Nála a jaa ka nuha? 18 ¿Si sunruba benne abittu anke benne Israel‑ni gwa beyekie begwebie Tata Do Yebáha ixkixaru?

19 Nianna ree nubiyúha:

―Bedú lii nna beyya lisiluha. Kumu de ugía lelu kia, de nuha nna gwa beyakabalu.

20 Ka fariseo‑ni unnaba tisakana Jesús‑ni rákane:

―¿Nukala dhu lo Tata Do Yebáha innabie?

Lee nna bekabie gekani, ree:

―Tti innabia Tata Do Yebáha labí ilenri'i tti innabieha. 21 Laxkala labí aka ge ka benne innáke: “Gwaluyúruga, nii chi rinnabie”, o innáke “Niha chi rinnabie”, kumu lebi'i labí yule. Tata Do Yebáha, lagwi gebale chi do benneha rinnabie.

22 Nianna ree ka benne rudhetinieha:

―Neti benne daya yebáha isia sá yalhá aka lele dhoa len lebi'i kwadiba ttu sá. Ttaka labí aka. 23 Nianna iria ka nu gákana le: “Niiba chi do benneha”, o “Niha‑ba chi due.” Tti gákana le aníha, bittu tsiale lhe nigaba tanalhale kana lhe. 24 Kumu ttiba runi edha‑na rigu'u chábana xiani itúba gwetsáha tti rapina, aníha‑gaba neti benne daya yebáha ilá saaba ganna chi isia sá esiaya. 25 Ttaka lade'axa teeki uyú xxattaa elha disa lhe ku'u ni'a ka benne se'e nnanna neti lhe. 26 Akaba attiba uka tti udo Noé‑ni, aníha‑gaba aka ganna chi isia sá esiaya, neti benne daya yebáha. 27 Ka benne use'e la'ania utobake lhe u'uyabake lhe, anágaba nna betsába náke lhe beketigabake ka xi'inkeha lhe axtaliba tti bisia sá uta'a Noé‑ni lhe'e barcuha, nianna bisá inda yiesi lo yu‑ni nna iyábake uttike. 28 Nuha‑gaba uka tti udo Lot‑ni. Ka benne use'e la'ania utobake lhe u'uyabake lhe uyo'obake lhe betto'obake lhe anágaba údagabake lena lhe besiagabake yo'o lhe. 29 Ttaka tti biria Lot‑ni lhe'esi Sodoma‑ni, nianna biginni gi yebáha lhe azufre lhe. La'ania nna iyá xeaba ka benne se'e lhe'esiha betse'e loona. 30 Aníha‑ba aka ganna chi isia sá esiaya, neti benne daya yebáha.

31 ’Ganna chi bisia sáha nna benne doe iki yo'oha nna ganna se'e ka lo irsine lhe'e yo'oha, bittu eyadie kweabie ka nu se'e lhe'e yo'oha nna benne die lhe'exxiha, nna bittu eyye lhe'e yo'o geeha. 32 Gwalodhú lele ge nu gwate nuila ge Lot‑ni. 33 Kumu benne rasinie ka satebie ttu bixa de etenalhe neti, benneha nnittilee, delába labí aka ben benneha arlo Tata Do Yebáha. Ttaka benne eria iki eria lebie etenalhe neti meskila bixa satebie, benneha nna gwalálee arlo Tata Do Yebáha.

34 ’Neti ria le, ganna loolhaha chupa ka benne teke te'adhike lo ttúba ta'a. Ttúbie echea bie nna attubie nna odha'anbe. 35 Ganna chupa ka benne nuila yu'uke turo'o gwettu. Ttúbie echea bie nna attubie nna odha'anbe. 36 [Ganna chupa ka benne biyú se'eke lhe'exxiha, ttúbie echea nna attubie nna odha'anbe.]

37 Nianna unnaba tisake bie, ráke:

―¿Gá aka nuní xa tata?

Lee nna bekabie geke, ree:

―Ttiba ruin ka chettu‑na tti rilákinna ata tee ttu nimala yatti, niha ritupakana. Aníha‑gaba ilenle ganna chi esiayaha.