1 Jesús‑ni chiba deyu'u Espíritu ge Tata Do Yebáha itúba latie bedábie ro'o yoo Jordán‑ni deyye. Nianna deche Espírituha bie lo yu bisi ata lanú benne se'e. 2 Delo chua (40) ubisaha ben nu xxegwiha dhi yiene. Labí utobie yetta itúba ugwekie niha. Tti chi gwadona chua ubisaha, la'ania nna tti ugwetti bitunie. 3 Nianna tti ra nu xxegwiha bie:

―Ganna si gwalíginlu ankalu Xi'in Tata Do Yebáha, usichu íyya re nii eyakana yettaxtila ki golu.

4 Jesús‑ni nna bekabie geni, ree:

―Lo ka yetsi ge Tata Do Yebáha dia ra: “Laa sunruga len yettaxtila aka ben ka benne.”

5 Nianna che nu xxegwiha bie iki ttu i'iya nna bele'enne ttu satti iyá ka yiesi ka nu ra tsitsi lekani se'e yiesi lo yu‑ni. 6 Nianna tti rane:

―Neti utea lo neda lenlu kini innabialu kana, anágaba lhe utea nu tse tee gekinna, kumu neti chi bisiakana lasi náya. Laxkala utebaa kana len benne rakaba lasia ugwea. 7 De nuha nna ganna si lu udú xibilu arloa nna utsá lolu neti, la'ania nna iyába ka nu chi bele'a‑na akakana gelu.

8 Jesús‑ni nna bekabie geni, ree:

―Lo ka yetsi ge Tata Do Yebáha dia ra: “Suna arlo Tata Do Yebaa benne anke Xxanaluha, suna arlo benneha‑ba udú xibilu lhe suna nu innabe uinlu lhe.”

9 Nianna deche nu xxegwiha bie lhe'esi Jerusalén‑ni nna tti ulhapine iki yotuha gwetsáli. Nianna rane:

―Ganna si gwalíginlu ankalu Xi'in Tata Do Yebáha, niili dulu nna ubinnichu lo yuha, 10 kumu lo ka yetsi geeha dia ra:

12 Jesús‑ni nna ree na:

―Lo ka yetsiha‑gaba dia ra: “Bittu dhi yielu Tata Do Yebaa benne anke Xxanaluha.”

13 Atti abíruba udaa nu xxegwiha gaxasina dhi yiena Jesús‑ni, nianna bekwittachilana. Isá to gwadána bekwittana kwe'ebie.

14 Jesús‑ni nna beyekie besine daka Galilea. Tsitsiba ra lebie de yu'u Espíritu ge Tata Do Yebáha latie. Nianna lhe'e iyába ka yiesi se'e abi'iba niha, ugwadhi tisa ge nu runieha. 15 Labie nna lhe'e ka yo'o ata rudheti ka benne Israel‑ni ka tisa ge Tata Do Yebáha, niha‑ba rekie rule'enie ka benneha. Laxkala iyábake ráke:

―¡Xxeniba ra le benne‑ni!

16 Jesús‑ni beyye lhe'esi Nazaret ata bixenieha. La sá tti reyaka le ka benne Israel‑ni uta'abie lhe'e yo'o ata rudhetike ka tisa ge Tata Do Yebáha attiba labinie runie. La'ania uta'abie nna udúbie kini ulabe ka tisa ge Tata Do Yebáha. 17 Begwekane ka yetsi ben Isaías benne uke profeta ge Tata Do Yebáha. Tti udhalie lo ka yetsiha nna gwaxxake ata dia ra:

20 Nianna tti bottesie yetsiha nna bogwebie benne rigua tsebie ka yetsiha nna tti bedoe. Iyába ka benne se'e niha nna doba loke bie. 21 Nianna tti unnebie, ree:

―Nasá chi bilenle uka nu belabaa lo yetsi‑ni.

22 Iyába ka benne se'e niha rinne tseke ge Jesús‑ni lhe rebanabakanie ge ka tisa tsagwi rinneeha. Lhe anágaba nna rinnaba tisa luesike, ráke:

―¿Laaba xi'in José‑niba benne‑ni?

23 Jesús‑ni nna ree ke:

―Gaxa gwa rakabinle gale neti ttu tisa tee nu rinne ka benne ráke: “Lu nu reyoni ka benne rani, la lu tte beyoin latilu”, o innále: “¿Beakala lhe'esi gelu‑ni a ruinlu luesi nu chi binatu benlu lhe'esi Capernaum‑ni?”

24 Nianna unne chiettirue, ree:

―Netiru ria, ni ttú profeta ge Tata Do Yebáha, a rulabikane lhe'esi geeha. 25 Neti gwalígati xa, use'e galá ixe ka benne nuila bidabi lo yu ge Israel‑ni tti udo profeta Elías‑ni. La'ania labíru iyya uka delo tsunna ida nalhaha, nianna bisiaru ttu ubina itúba ata se'e ka benne Israel‑ni. 26 Ttaka Tata Do Yebáha, ni len ttú ka benne nuila bidabi ge Israel‑ni a udhelhe Elías‑ni kini ute náni len ka benneha. ¿Laaba ganna len nuila bidabi ge lhe'esi Sarepta, delába yiesi re daka Sidón, laaba ganna len nuilaha‑la udhelhe na? 27 Aníha‑gaba tti udo profeta Eliseo‑ni, ixegaba ka benne use'e lo yu ge Israel‑ni, uka latike yiesu nu tee láni lepra. Ttaka ni ttú ka benneha a betúa yiesuha latike. ¿Laaba ganna Naamán benne doe lo yu ge Siria, benneha‑la gwa betúa yiesuha latie?

28 Tti biyienin iyá ka nu se'e gwedo naga lhe'e yo'oha nu ra Jesús‑ni, nianna bisa'a xxattakinna 29 nna tti udú liikana uleakane ro'o yiesiha, chekane ro'o belha'a du ro'o yiesiha. Nuha rena iki ttu i'iya. Niha ruinkana uttulhukane. 30 Ttaka Jesús‑ni beyeki ttebe betebie lagwi gekani nna deyye.

31 Jesús‑ni beyadie besine lhe'esi Capernaum. Nuha rena daka Galilea nna lhe'e ka sá atti reyaka le ka benne Israel‑ni nna rule'enie ke ka tisa ge Tata Do Yebáha. 32 Ka benneha nna rebanabakanie ge nu rule'enie keha, kumu rinnebie ttiba ttu uxtisi rapa lo neda.

33 Lhe'e yo'o ata rudhetike ka tisa ge Tata Do Yebáha, niha re ttu nubiyú yu'u latini ttu espíritu satsa. Nubiyúha nna itú leni uresi'ana, rana:

34 ―¡Begwelha ri'itu! ¡Bittu etega'a gelu len ri'itu, lu Jesús ge Nazaret! ¿Si dalu gwetse'e loo ri'itu? Neti gwankabiabati lu. Lu ankalu benne chi ulesi Tata Do Yebáha.

35 Jesús‑ni nna bedhaka dise espíritu xxegwiha, ree na:

―¡Bedhea ro'olu nna beria lati nubiyú‑ni!

Nianna uru'una nu xxegwiha nubiyúha lo yu arlo iyába ka benne se'e niha. Nianna tti beria ttebana latini, labíru bixa bedhakana nubiyúha. 36 Iyába ka benne se'e niha uka télakanie nna rinnaba tisa luesike, ra luesike:

―¿Bí anka ka tisa rinne nubiyú du nii? ¡Xxeniba ra leni rulisana ka espíritu satsa‑na kini eriakana nna gwa rudobakana tisa geni reriakana!

37 Iyába ka benne se'e lhe'e ka yiesi se'e itúba ka daka niha rinneke ge nu ruin Jesús‑ni.

38 Jesús‑ni beriabe lhe'e yo'o ata rudheti ka nu Israel‑ni ka tisa ge Tata Do Yebáha nna gwate'e lisi Simón‑ni. Nan ge nuila ge Simón‑ni nna teba benneha ranie, yu'u xxatte xilhaa. Nianna unnabakana len Jesús‑ni kini eyonie benneha. 39 Jesús‑ni nna biyette arlo benne nuilaha, bedhaka dise xilháha nna beria ttebana lati benneha. Looraha tteba nna beyadha benneha nna benie nu utoke.

40 Atti chi chadi tatubisa‑na, iyába ka benne se'e ka benne rani geke, ka benne ridakake iyá looba isagwe, cheke ka benneha ata du Jesús‑ni. Jesús‑ni nna iki ttu ttu ka benneha rixxua nábie nna reyonie ke. 41 Lati ixegaba ka benne raniha beria ka espíritu xxegwiha, ribesi'abakana rákana:

―¡Lu ankalu Xi'in Tata Do Yebáha!

Ttaka Jesús‑ni nna rudhaka disalee ka nuha. Labí rugwelhe kana innekana, kumu yúbakana deki labie anke Cristu benne chi ga'anani Tata Do Yebáha idhelhe.

42 Tti ugwani dilaha, biria Jesús‑ni ro'o yiesiha ata lanú benne risatsa. Ttaka ka benne regilake bie nna gwa bisinbake ata dueha. Ruinke ukwedake bie kini abittu eyye. 43 Ttaka lee nna ree ka benneha:

―Rakagaba doelha kixxi'ania ka benne se'e lhe'e adíru ka yiesi ka tisa tse, delába kixxi'ania ke gasina ki akake benne innabia Tata Do Yebáha ke, kumu de nuha‑la udhelhe neti.

44 Aníha‑ba dia Jesús‑ni [daka Galilea‑ni] rigixxi'e ka tisa tseha lhe'e ka yo'o ata rudheti ka benne Israel‑ni ka tisa ge Tata Do Yebáha.