1 Iki de nuha nna bodole'e lo Jesús‑ni attu libe len ka benne rudhetinieha ro'o indatoo tee láni Tiberias. Aní uka nuha: 2 du Simón Pedro‑ni lhe Tomás benne rágabakana Kwachi lhe Natanael ge lhe'esi Caná nu re daka Galilea lhe se'egaba ka xi'in Zebedeo‑ni lhe a chupa ka benne rudhetini Jesús‑ni. Turo'oba se'e iyábake niha. 3 Simón Pedro‑ni nna ree ka benneha:

―Tsiaya sadaxxua belha.

Ka benneha nna ráke bie:

―Ri'itu dhágabatu.

Nianna diake ugwapike lo barcu daa niha, ttaka loolhaha nna birula belha biyaxxukanie.

4 Tti chi daa tsaniha nna uka xxe Jesús‑ni ro'o indatooha, ttaka ka benne rudhetinieha nna labí yuke deki labie nuha. 5 Jesús‑ni nna unnaba tise, rabie ke:

―Xi'ini to, ¿si bi gwa bedaxxule belha ki gori'i?

Lake nna bekabike gebie, ráke:

―¡Birula xa tata!

6 Jesús‑ni nna ree ke:

―Gwaludelharuga yexxa gele‑na daka lhitta ben ge barcu‑na nna uyúrugale gudaxxubale belha.

Aníha‑ba benke bedelhake yexxaha, ttaka tti chi ebeake nuha, bi reyadhakanie yexxaha de chi desá xxatta belha lhe'eni. 7 Nianna ttu ka benne rudhetini Jesús‑ni, benne rakarunie geeha, benneha ree Simón Pedro‑ni:

―¡Jesús benne anke Xxanari'iha‑ba nuná rinne!

Suna biyienbin Simón Pedro‑ni deki Benneha‑ba nuha, beyoku tteba xoe kumu uleabe ka nuha ki renie sina. Nianna uta'a ttebe lhe'e indaha. 8 Adí ka benne rudhetinieha nna dedá lenke barcuha dena'ayake yexxaha desá tíbana nuha belha, kumu ttiba ttu gayua (100) metru riyasa eriake ro'o indaha. 9 Tti beyadike lo barcuha dedáke, nianna betexxakake chi re gi. Lo giha chi xua ttu belha lhe chigaba tee yettaxtila lhe. 10 Jesús‑ni nna rabie ke:

―Gwataxxí ttu chupa ka belha ka nu si bedaxxule‑na.

11 Ugwapi tteba Simón Pedro‑ni lo barcuha nna gwaleabie yexxaha ro'o indaha desá tí nuha ka belha xeni. Ttu gayua tsieyona bixxi tsunna (153) ka belhaha deyu'u lhe'e nuha. Meskiba ixe ka belhaha deyu'u, labí bisú yexxaha. 12 Jesús‑ni nna rabie ka benneha:

―Gwalibiga gwaligo ixtíle.

Ni ttú ka benne rudhetinieha a reyaxakanie innaba tisake bie, gake bie: “Lu nna, ¿nú ankalu?” Kumu yúbake deki Jesús benne anka Xxanari'iha‑ba benneha. 13 Nianna tti ubiga Jesús‑ni bedaxxue yettaxtilaha nna utidhie benneha geke. Aníha‑gaba benie len ka belhaha.

14 Nuha beyonna lidú rule'e loe len ka benne rudhetinieha iki de chi beyaka banie lagwi ge ka benne chi uttiha.

15 Iki de chi beyaka uto ixtíkeha nna ra Jesús‑ni Simón Pedro‑ni:

―Simón xi'in Jonás, ¿si rakaruinlu kia tti ka nu se'e‑ni?

Lana nna bekabina, rana:

―Ila xa tata. Lu gwa yúbalu gwa rakabati gelu.

Jesús‑ni nna ree na:

―Biyú ka neru to kia‑ni ganna.

16 Nianna redeabie na attu libe:

―Simón xi'in Jonás, ¿si gwa rakinlu kia?

Lana nna bekabina, rana:

―Ila xa tata. Lu gwa yúbalu gwa rakabati gelu.

Lee nna redeabie na:

―Biyú ka neru to kia‑ni ganna.

17 Beyonna libeha redea Jesús‑ni na:

―Simón xi'in Jonás, ¿si gwa rakinlu kia?

La'ania nna chi bedú si'ina le Pedro‑ni kumu de beyonna libela rinnaba tise, ree na: “Si gwa rakinlu kia?” Lana nna rane:

―Lu iyába gwa yúbalu xa tata. Lu yúbalu, gwa rakabati gelu.

Jesús‑ni nna ree na:

―Biyú ka neru to kia‑ni ganna. 18 Netiru ria, tti ankalu kwitiha titúbalu redú tselu nna riabalu ataba rakaba lelu, ttaka ganna chi uxxuluha, la'ania nna udábalu ka nálu‑na nna attu benne subila odú tsebie lu nna ichebe lu ata labí ru'u lelu tsialu.

19 Tti unne Jesús‑ni aníha benna liibie gaxasina gatti Pedro‑ni. Len elhutti sate Pedro‑ni inná xxeni le Tata Do Yebáha. Nuha‑ba unnebie, nianna tti ree na:

―Utá tenalha neti.

20 Tti bodeki lo Pedro‑ni nna bilenna danalha ttu ka benne rudhetini Jesús‑ni, delába benne rakarunie geeha. Benneha‑gaba nuha udobie daka litta Jesús‑ni tti yu'uke go irseha nna unnaba tise Jesús‑ni, ree bie: ¿Nútu nuní utetu lu lasi ná ka nu uttikana luha, xa tata? 21 Tti bilani Pedro‑ni danalha benneha, nianna unnaba tisana Jesús‑ni, rane:

―Tata, nuní nna, ¿bíla sate nuní ganna?

22 Jesús‑ni nna bekabie geni, ree:

―Neti ganna rakaba lasia anába dhona aka benna axtaliba ganna chi esiayaha, lu nna bila elha ralhalu nna rinnaba tisalu. Utá tenalha neti.

23 Nuní uyu'u naga adí ka betsi to geri'iha nna ráke deki benneha labí gattie, ttaka Jesús‑ni laa rage Pedro‑ni deki benneha labí gattie, sinuki sun rabe na: “Ganna neti aka lasia anába dhona aka benna axtaliba ganna chi esiayaha, lu nna bila elha ralhalu nna rinnaba tisalu.”

24 Benne‑niba nuha bedhetini Jesús‑ni nna kwinaba labie rigixxi'e iyá nuní lhe benie na lo yetsi lhe. Ri'itu gwa yúbatu deki nu rigixxi'e‑ni ankaba nuní nu gwalí, labí ruin lebie.

25 Jesús‑ni ixeeru nu ben benneha. Ganna kua ttu ttu ka nu benieha tsiakana lo yetsi, neti rakati labí akani yiesi lo yu‑ni tsu'u ka yetsi ka nu tsia lokani iyá nu benieha. Amén.