1 Iki de nuha nna tti dia Jesús‑ni daka attu ladu ro'o indatoo ge Galilea‑ni nu tegaba láni indatoo ge Tiberias, 2 ixe ka benne danalhake bie kumu de chi bilákanie ixe ka milagru runie tti reyonie ka benne rani. 3 Nianna tti ugwapie iki ttu i'iya nna niha udobie lenie ka benne rudhetinieha. 4 La'ania nuha chi dabigana isia laní ge ka benne Israel‑ni nu tekanie láni Pascua. 5 Tti belhidha lo Jesús‑ni nna bilánie yalhá ixe ka benne chi danalhake bie, nianna rabie Felipe‑ni:

―¿Gála sayo'ori'i yettaxtila ki go iyá ka benne‑ni?

6 De lo tisaba unnebie aníha, kini lana nna bixa ekabina, kumu labie chiba yue bí unie. 7 Felipe‑ni nna bekabina gebie, rana:

―Ni len belhiu nu kixakana ri'i ge chupa gayua (200) ubisa sina, ni len nuha a dhaari'i go'ori'i yettaxtila ki go ka benne‑ni ttu ttuxka'a.

8 Ttu ka benne rudhetinieha, benne tee lábie Andrés betsi Simón‑ni, benneha rabie Jesús‑ni:

9 ―Ne ttu nu kwiti du nii denna gayu yettaxtila ge xua cebada nna a chupa ka belha nna, ttaka bi ixú nuní ki go iyá ka benne tupa‑ni.

10 Nianna tti ra Jesús‑ni ke:

―Gwaligasi ka benne‑na ese'eke.

Nianna bese'e tteba ka benneha kumu yalhá ixxi binni tee niha. Sunrula ka benne biyúha ankake ttiba tu gayu mili. 11 Nianna tti bedaxxu Jesús‑ni ka yettaxtilaha nna iki de chi begwebie Tata Do Yebáha ixkixaru, nianna tti begwebie ka benne rudhetinieha yettaxtilaha, ka benneha nna utidhike benneha len iyá ka benne se'e niha. Aníha‑gaba benie len a chupa ka belhaha. Utobake nna axtaliba beyielakanie. 12 Tti chi beyielakin benneha, nianna ra Jesús‑ni ka benne rudhetinieha:

―Gwalottupa ka ro'o salha'a bexxa‑na kini abittu tsia lattike.

13 Ka benneha nna bottupake ka ro'o salha'a bexxa ge gayu ka yettaxtila ge xua cebadaha. A tsi'inu (12) sumi besá benne bottupakeha. 14 Ka benneha tti bilákanie milagru ben Jesús‑ni, nianna ráke:

―Benne‑niligaba gwalí anke profeta chi ga'anna isia yiesi lo yu‑ni.

15 Ttaka Jesús‑ni nna tti ute danie deki doelhaba ruinkana echekane kini ake nu rinnabia gekani, nianna ttúbe beru'une dedheyye attu libe iki i'iyaha.

16 Tti chi uka relaha nna beyadi ka benne rudhetini Jesús‑ni ata re indatooha 17 nna beta'ake lhe'e ttu barcu daa niha, deyyake belháke lo indatooha kini esinke lhe'esi Capernaum. Chiba uka rela nuha nna Jesús‑ni nna labí chi besine lenke. 18 Indatooha nna ridú lii loni de raka xxatta ttu be idí. 19 Tti chi bedáke lo indatooha ttiba gayu o xxupa kilómetru, nianna tti bilákanie Jesús‑ni redábie dedee lo indaha, rebige kwe'e barcuha, nianna tti usikanie. 20 Labie nna unnebie, ree ke:

―Netiba nuní. Bittu gasinle.

21 Nianna redeakabakanie belhapike bie lo barcuha nna besin ttebake len barcuha ata deyyakeha.

22 Beyeki sáha nna ka benne tupa ro'o indatooha binake deki sun ka benne rudhetini Jesús‑niba beyapike lhe'e barcuha. Kumu barcu deyya ka benneha, sunruba nuha udána ro'o indatooha nna lanú Jesús‑ni bilákanie eyapi len ka benneha lhe'e barcuha. 23 Nianna besia adíru ka barcu dedákana daka lhe'esi Tiberias. Besia ka nuha gaxxaba ata uto ka benne yettaxtilaha ata use'eke iki de chi begwe Jesús benne anke Xxanari'iha ixkixaru len Tata Do Yebáha. 24 Tti lanú Jesús‑ni bilani ka benne tupa niha, nigaba a bilákanie ka benne rudhetinieha, nianna tti uta'ake lhe'e ka barcuha nna diake ugilee daka lhe'esi Capernaum‑ni.

25 Tti gwaxxakake bie attu ladu ro'o indatooha, nianna tti unnaba tisake, ráke bie:

―Maestru, ¿nukala bisialu nii?

26 Jesús‑ni nna bekabie geke, ree:

―Netiru ria, labí rekile ugila neti de rilenle ka milagru runia‑ni, sinuki rekile ugila neti kumu de begoa le yettaxtila nna axtaba beyielinle. 27 Bittu udona lele kilale elho nu abittu ruchíana isá, sinuki gwaludola lele gwalegila elho nu uinna kini satíaba aka benle. Neti benne daya yebáha, neti unia ki satíaba aka benle arlo Tata Do Yebáha, kumu neti chi bedha'ane ki unia aní.

28 Nianna tti ráke bie:

―¿Bíla teeki uintu kini dhaatu uintu nu raka le Tata Do Yebáha?

29 Jesús‑ni nna bekabie geke, ree:

―Tsia lele Tata Do Yebaa benne udhelhe netiha. Nuní raka lebie uinle.

30 Nianna tti ráke bie:

―¿Bí milagru uinlu kini ri'itu ganna chi bilentu ka milagruha nna tsia letu gelu? ¿Bí ttu nu tse uinlu? 31 Kumu ka benne uka xuttori'iha utoke nu udhelha Tata Do Yebáha nu tee láni maná, tti rekike lo yu bisiha. Ukaba attiba ra lo ka yetsi ge Tata Do Yebáha ata dia ra: “Yettaxtila daa yebáha, udhelhe ki utoke.”

32 Jesús‑ni nna rabie ke:

―Netiru ria: Labí Moisés‑ni nuha betena yettaxtila daa yebáha; sinuki Tata kiaha‑ba betebie nuha. Labie nuha rutebie nu gwalíga anka yettaxtila daa yebáha. 33 Kumu yettaxtila rute Tata Do Yebáha, benneha anke benne daa yebáha nna runie kini satíaba aka ben ka benne.

34 Nianna ráke bie:

―Satía bete luesi yettaxtila‑na gotu xa tata.

35 Jesús‑ni nna rabie ke:

―Netiba nuní ankaa yettaxtila rutea elha nabani ge ka benne. Benne ite len neti labíru ituin benneha lhe benne tsia lebie neti ni tsa labíru ebisi benneha inda. 36 Ttaka ttiba chi xpeya le, meskiba chi bilenle neti nna labí ria lele kia. 37 Iyába ka benne ruin Tataha ki itake len neti, gwadábake len neti nna ka benne gwadáke len netiha nna labí odekia ka benneha. 38 Kumu neti laa ugwadigaa yebáha kini unia nu rakaba lasia, sinuki unia nu ra benne udhelhe netiha. 39 Nuní raka le benne udhelhe netiha unia, delába delo iyá tte ka benne uin Tataha ki itake len neti bittu unnittia ni ttúke, sinuki elhidha bania ke ganna chi bisia sá daluxaha. 40 Nunígaba raka le Tataha aka, delába iyába ka benne ilákanie neti benne ankaa Xi'inie lhe tsia leke kia lhe, ka benneha nuha satíaba aka benke arloe. Neti nna gwelhidha benbaa ke ganna chi bisia sá daluxaha.

41 Ka nu Israel‑ni nna udulokana rinnekana ge Jesús‑ni kumu de rabie: “Neti ankaa yettaxtila nu daa yebáha.” 42 Lhe rágabakana:

―¿Laaba nuníba nuha Jesús xi'in biyú José‑ni? Ki gwankabiabinri'i xxudini lhe ixnáni lhe. ¿Galasina nna rana: “Yebáha‑ba daya”?

43 Jesús‑ni nna bekabie, ree:

―Bittu innele kia. 44 Lanú ttu benne lhaxxaba isiabie len neti ganna Tata kia benne udhelhe netiha abíba idhelhe benneha len neti. Neti nna gwelhidha benbaa benneha lo elhuttiha ganna chi bisia sá daluxaha. 45 Lo ka yetsi bodha'an ka profeta ge Tata Do Yebáha dia ra: “Iyábakana udhetini Tata Do Yebáha.” Laxkala iyába ka benne riyienkanie ge Tataha lhe ridetike gebie lhe, ka benneha nuha gwadáke len neti. 46 Tataha lanú nu chi bilenna benneha; sunruba neti benne udáya ata doeha, sunruba neti chi biláti Tataha. 47 Netiru ria, benne gwa ria lebie netiha, benneha satíaba aka benbie arlo Tata Do Yebáha. 48 Neti ankaa yettaxtila rutea elha nabani ge ka benne. 49 Ka benne uka xuttoleha utoke maná lo yu bisiha, laa kiga de utoke nuha nna abittu uttike, aloba uttigabake. 50 Ttaka nii chi du yettaxtila daa yebáha. Benne gobie yettaxtila‑ni, benneha labí gattie, satíaba aka benbie arlo Tata Do Yebáha. 51 Neti nuní ankaa yettaxtila bani daa yebáha. Ganna nuxa benne gobie benne‑ni, benneha satíaba aka benbie. Yettaxtila nu utea‑ni ankana kwinaga bela latia. Utea na kini odiláya ka benne se'e yiesi lo yu‑ni kini satíaba aka benke arlo Tata Do Yebáha.

52 Ka nu Israel‑ni nna udulokana ritilha tisakana, ra luesikani:

―¿Gasina ute nuní bela latin‑na gori'i?

53 Jesús‑ni nna bekabie gekani, ree:

―Neti benne daya yebáha, netiru ria, ganna lebi'i abíba gole bela latia‑ni lhe ganna abíba i'iyale reni kia‑ni lhe, labí aka benle ttu dia lii arlo Tata Do Yebáha. 54 Nu gona bela kia‑ni lhe i'iyana reni kia‑ni lhe, nuha satíaba aka benna arlo Tata Do Yebáha. Neti nna gwechidhabaa na lo elhuttiha ganna chi bisia sá daluxaha. 55 Kumu bela latia‑ni ankana gwalíga elho go ka benne nna reni kia‑ni nna ankana nu gwalíga i'iya ka benne. 56 Benne gobie bela kia‑ni lhe i'iye reni kia‑ni lhe, benneha nuha gwa due len neti, neti nna gwa dúgabaa lenbie. 57 Ttiba Tata kiaha benne udhelhe netiha anke benne bani, de benneha nna neti anka bengabaa. Anágaba benne gobie bela kia‑ni, de neti nna gwaka bengabe. 58 Neti labí ankaa tti anka yettaxtila uto ka benne uka xuttoleha. Ka benneha laa kiga de utoke maná lo yu bisiha nna abittu uttike, aloba uttibake. Neti ankaa yettaxtila daa yebáha. Benne goe yettaxtila‑ni gwaka benbe ttu dia lii arlo Tata Do Yebáha.

59 Iyá nuní utixxi'a Jesús‑ni lhe'esi Capernaum‑ni. Utixxi'e nuha lhe'e yo'o ata ritupa ka benne Israel‑ni rudhetike ka tisa ge Tata Do Yebáha.

60 Tti biyienkin benne se'e niha nu rinne Jesús‑ni, ixe ka benne chi danalhake bie, ráke:

―Tsitsiba anka nu rinne benne‑ni. ¿Nú dhaana udo nagani ge benne‑ni?

61 Ttaka Jesús‑ni ute dábanie rinne lha ka benne danalhake bieha ge nu reeha, nianna tti rabie ke:

―¿Si rutsetsibin nu rigixxi'ania le‑ni? 62 ¿Titiala ganna ttixka neti benne daya yebáha ilenle eyapia ata doa ttuha? 63 Espíritu ge Tata Do Yebáha nuha runie kini raka benri'i. Bela latiri'i‑ni labí rixú nuní uinna kini aka benri'i. Ka tisa rinnea‑ni ankake ge Espírituha lhe ruteke elha nabani lhe. 64 Ttaka sa se'e attu chupale labí ria lele.

Aníha ra Jesús‑ni kumu attili sisi'a tteha chi yue nupaxake nuha abittu ria leke gebie lhe chigaba yue núke nuha uteke bie lasi ná ka nu uttikaneha. 65 Lhe rágabe ke:

―De nuha nna ria le, ni ttu benne labí aka gebie ite len neti ganna abíba Tata kiaha idhelhe bie.

66 Debá la'ania ixe ka benne rudhetinieha, bedhanke labíru ugweki lenke bie. 67 Nianna tti ra Jesús‑ni ka benne tsi'inuha (12):

―Lebi'i ¿si rakagaba lele eyyale?

68 Simón Pedro‑ni nna bekabina gebie, rana:

―Tata Xisi to, ¿núruala sanalhatu ganna? Ki lula nuná rinnelu ka tisa ka nu ruinkana kini satíaba aka bentu arlo Tata Do Yebáha. 69 Ri'itu chiba ria letu gelu lhe chigaba yutu deki kwinalu ankalu Cristu Xi'in Tata Do Yebáha benne anka banieha.

70 Jesús‑ni nna bekabie geke, ree:

―¿Laaba ganna tsi'inule (12) nuná chi bekwea? Ttaka ttúle nna nu xxegwiba ankale.

71 Ge Judas Iscariote xi'in biyú Simón‑niba nuha rinnebie tti ree aníha, kumu lana nuha selana ka benne tsi'inuha (12), lhe lana nuha utene lasi ná ka nu uttikaneha lhe.