1 Karakarra kalu-wingka jababa Jijaj alu li-jawina likungu wangani karakarra, akarrunga Jirrujalima bajiwa barrawu kanymarda, na-wini nyarrku barrawu Bidabija mili na-wini nyarrku barra Bidani, kulu baji ankangu jayngka na-wini jayngka Aliba, kalu-arri baji barra, dinkidinki kalu-arr kanymarda arrkula barrawu.

2 Ka-wukanyi Jijaj rriyikurriyi-jawinawu, “Ambirriju nyimbala-karra barrawu! Mbila-wingkaya ngalbanthawu barrawula baji! Kulu yamulu, yinarrambalulu kimbala-ngala yirrikirri buyi, waraba kalilu-ngabarlamanma aliyaliya. Nyi-nmaya nya-mangaji, nya-kaya 3 marnajinjul Namba ka-wukanyila mirningiya yimbalanga, ‘Ngalhiyu jimbala-kanji jina yirrikirri ngalhiyu?’, kulu mbila-wukanyiya, ‘Ki-wirdinju katharrili-nu rdumanthawu jina; Kilu-wanjangumaia marnajinju nyalalhurrku’. Mbila-wukanyiya nganinya yiku!”

4 Kulu kawula-lhuwarri, kawula-wakarama nya-mangaji yirrikirri, bajiwa rdirrirrantha nungkanu-mulungka winkanda barrawula. 5 Bajalu li-mbangu li-wulu alarrinjarra wunkanantharra alunga, kawulalu-yalbanga, “Ngandarra kimbala-arri? Ngalhiyu jimbali-nmanji jina yirrikirri?”

6 Kulu kawula-arri alunga, “Ki-wirdinju katharrili-nu rdumanthawu jina yiku; kili-jala marnajinju nyalalhurrku.” Kalu-arri wulanga, “Yamulu barra, nyimbala-kaya!”

7 Kulu kawula-ka yirrikirri yilalu ki-Jijaj, kawula-yibarra jumbala wulanga ki-yirrikirrila kulu ankaya kiwa-nka 8 ki-yirrikirrila wukungka Jijaj; bajalu nalarrku lu-wulu, kalu-yibarra jumbala alunga wajkaliya yabayabala ambirriju ki-jababawu; mili nalarrku li-wulu, kalu-ma wurnda na-yala, wanjirriji kalu-yibarra wajkaliya yabayabala; nganinya kalu-yibarra yabimanthawu awara yiku kangka kalinyamba-riyarraba yiku ki-Jijaj.

9 Kalu-wingka aya, nalarrku wingkayarra ambirriju yilaa mili nalarrku ngulakari yilaa, bajiwa wumbiji; kalu-wajba yiku ki-Kada, kalu-barlirranha, “Wunyatha, nyamba-riyarrabaya yiku nyuwu-ja kangka yabi marniwa, kinyi-janhu nganuwalu; baku 10 barra kinya-yibarrala wirdiwalangu kinga liyinku liyi-wuluwu barra wumba nyanganunga-nganji Dabida ki-wankalawu ka-arri wirdiwalangu kinga; janu-yabirrinji nganu-wurdu nyamba-yngkalayngkarrinjarra ki-wirdiwalangu; bawuji barra”; nganinya kalu-barlirranha.

11 Kulu bawuji barra ka-wingka bajinju Jirrujalima, ka-ngalba nungkanu-mulungka barrawula Jirrujalima; ka-wingka bajinju ki-barrawulu ki-kurdukurdula nyungkiku ki-Kada.

(Lhurrku ka-wani akarriya ki-barrawulu Bidani walkurru.)

15 Karakarra kalu-wingka bajinju Jirrujal ima; ka-ngalba Jijaj ki-barrawula ki-kurdukurdula nyungkiku ki-Kada kulu kalilu-jujunyma li-wulu kalu-arri arndaarnda, nalarrku li-wulu kala-ninya nyamba-ngulngundayarra ma-kijululu marrababawu wiji yibarranthawu ki-kurdukurdula, nalarrku li-wulu kalu-arri rdumantharra aluwa ma-kijululu, kalilu-jujunyma li-mangaji wayathantharra winkandu.

Kulu baji arndaarnda ka-arri daladala lhulun alunga liyi-wuluwu, jabarrimba kalu-yangama ma-kijuiulu alunga nuwalarrkulu linji-wulungku, ma-arrku barra ma-kijululu ku-arri ki-barrawula ki-kurdukurdula nyungkiku ki-Kada, kulu kilu-wirrinma daladala alunga ki-Jijaj; bajalu mili arndaarnda li-mbangu, kala-ninya ngulngundayarra marrababa; kilu-wirrinma alunga mingkiyawu daladala ki-jababalu.

16 Kulu ka-wukanyi alunga liyi-wuluwu, “Barni-wingkaya jakajakarda ki-barrawula ki-Kada! Waka nyirra-kanthani nambiwuthu winkanda!

17 Kalilu-mil irdima baji, ka-arri, “Ka-wukanyi Kada nungka-burruburrula nungkiku, ‘Kalu-wukanyila li-wulu, “Jina barrawu ki-Kada, kiwa-nmala barrawu mududuwu alunga liyi-wuluwu, li-mbangu li-kariyangu marda li-karakarrangu, li-karinguthundangu marda li-karingamalangu; jina barrawu alunga wayathantharra mududuwu,’ ” nganinya ka-wukanyi Kada nungka-burruburrula nungkiku; ngala yirru, kirru-wardima jina barrawu, barranamba na-ajinja alunga liyi-wuluwu liyi-wardiyu barra, li-mangaji li-wajkilwajkil barra, kalu-wajkirra yumbulyumbumantha arndaarnda nungku-ajinjala nungkalunga, barranamba na-mangaji na-ajinja barra jina barrawu wunyathawu, kirru-wardima barra.”

18 Bajalu ki-barrawula li-mbangu li-wirdiwalangu li-wurrirri, kalu-arri nalarrku li-wirdiwalangu nyuwiku ki-barrawuwu ki-Kada, kalu-arri mili nalarrku li-wirdiwalangu, kalu-milirdima li-wulu nuwarnalunga, bajalu li-mangaji li-wirdiwalangu wayathantharra ki-barrawula ki-kurdukurdula nyuwiku ki-Kada.

Kala-yngkarri Jijaj wukanyinjarra baji arndaarnda, kalinyamba-wukanyi, “Ngandarra kambala-ramala yundulu nya-mangaji, ngandarra?” Nganinya kal inyamba-wukanyi ramanthawu Jijaj, kalu-wardanka yiku kangka kala-yngkarri jababa linji-wulungku, waraba kalala-yngkarr inma li-wirdiwalangu, Jijaj kala-yngkarri, kulu kalu-wardanka yiku li-mangaji li-wirdiwalangu, kal inyamba-wukanyi ramanthawu yiwa.

19 Wundururra ka-lhuwarri Jijaj nakari barrawu Jirrujal ima, ka-lhuwarri nayirdi alunga liyi-jawinawu liyiku.