18
Ãjiri fẽtsa yoia iskafakĩ: “Iskaratĩa Babilonia pexe rasi mã keyoa,” ixõ yoia
1 Askata anã ãjiri fetsa nai mẽranoax mai ano fotoaito ẽ õia. Epa Niospa yoia nã xanĩfo fẽtsari afama mĩshti atiro. Nãato chaxaito maifo tii anoxõ õikani. 2 Fãsikõi yoia iskafakĩ:
Pexefã rasi Babilonia anoafo mã keyoa, anã anoma. Iskaratĩa anã ano tsoa ikama, askatamaroko niafaka yõshi chakakõifo ano ika, askatari peya yõshi chakakõifori ano ika. 3 Nã kẽro chakapa yorafo ato mãmã pae ayamatiro keskafakĩ, nãskarifiakĩ nã Babilonia anoafãfe yora fetsafo mai fetsa anoafo ato afara chakafamafo ato keskara inõfo. Ãto xanĩfofori ato askafamafo. Askatari afara sharafos fichipaimisfo. Nãskakẽ a afama mĩshtifo ato minimisfo, afara ichapayakõifo,
ixõ yoiaito ẽ nika. Niospa inapa askara ato yoia a Niospa keyoxiai a Babilonia anoafo.
4-8 Yoikĩ askafatanaino nai mẽranoax mekaito ẽ meka fetsa nika iskai mekaito:
Babilonia ano ikafãfe fãsi afara chakafakĩ finakõiafo. Nã afara chakafamisfo Epa Niospa ato õia chakakõifaifãfe. Nãskakẽ ato omiskõimaxii. Nã Babilonia anoafãfe fetsafo afara chakafamamisfono afori. Epa Niospa ato omiskõimakĩ finakõixii omiskõinõfo. Nã Babilonia ano ikafãfe ãto shinã mẽraxõ mã shinãfo iskafakakĩ: “Nõ Nios yopaima. Afara fetsafori nõ yopaima. Nõ isharakõimis. Oa xanĩfokõi isharamis keskara nõri nãskamis, xanĩfo keskara. Nõkai oa kẽro ifomafa keskarama. Nõ omiskõitiroma. Askatamaroko nõ isharapakenaka,” ixõ kakapaimisfãfe yoimisfo. Akka Epa Niospa ato fãsi omiskõimani omiskõikakĩ tenẽnõfoma. Akka nã ea chanĩmara faafãfe, ea nikasharakãfe. Epa Niospa mã ato samamashta omiskõimani anã isharayamanõfo. Atiri ẽ ato namai, atiri ẽ ato omiskõimani, a piaifori ato kẽyoi. Nãskakẽ fonãikani. Nãskatari atiri ẽ ato koofaxii kooi fetsenõfo. Tsõa atiroma keskara Epa Niospa afama mĩshti atiro. Nãskakẽ Epa Niospa mato yoi iskafakĩ: “Efe yora mĩshtichi, Babilonia anoafo keskara iyamakãfe. Ato fe rafeyamakãfe. Ato feta chakafayamakãfe ẽ ato omiskõimanai keskafakĩ, matori ẽ omiskõimanõma,” ixõ Epa Niospa ato yoixii kiki,
ãjirinĩ faito ẽ nika.
9 Askano Babilonia kooaino mai fetsa anoafãfe ãto xanĩfofofãfe õikakĩ manoxikani. Nãfãferi Babilonia anoxõ afara chakafakĩ tãpinifo. Nãskakẽ ato feta Epa Nios chakafakakĩ potakani afara chakafaxikakĩ. Nã Babilonia anoa keskarafori afãfe afama mĩshti ichapa fimisfo. 10 Babilonia kooaino nã xanĩfofo ratekõixikani chai inoaxri fetsafo mesexikani.
¡Ooa! Babilonia anoafo fato yora fetsafo keskarafoma. Mã tãpikõisharafikẽ samamashta Epa Niospa mato omiskõimani mã kooi fetsenõ. ¡Keexto! Koshikõi Babilonia mã kooi keyoa. Nõri iskayamapainõ,
ixõ shinãkani xanĩfofofãfe ratekõiyanã.
11 Nãskatari maifo tii anoafo ãto afama mĩshtifo minimisfo oiaxikani shinãmitsakani. “¡Ooa! Mã Babilonia kooi keyoa. Iskaratĩa anã nõko afama mĩshtifo noko tsõa fĩatiroma. 12 Nõko oro õshishara fĩayamata, a kerexkõi fakkai fakkaisai fĩayamata, nõko tokirinĩ fakeshta fakkai fakkaisai fĩayamata, nõko tokiri fetsa ãfe ane perla fĩayamata, nõko sama sharafinakõia fĩayamata, nõko sama nana shara fĩayamata, sama fetsa fetsatapafo fĩayamata, nõko ifi nakas sharakõi fetsa fetsatapafo fĩayamata, tokiri keskara kerexkõi oxosharakõi ãfe ane mãrfil nãato afarafo onifaa fĩayamata, afe keskarara ifi sharakõifo fĩayamata, firo shara ãfe ane bronce fĩayamata, keno fetsa ãfe ane firo fĩayamata, tokiri ãfe ane mãrmõlo fĩayamata, nãfo kopikõifo noko anã fĩakanima. 13 Akka nõ pĩchamis afama mĩshtifoya osixõ, nã itsa sharafoya fetsa fetsatapafoya osixõ, afo noko tsõa fĩatiroma. Askatari a nakas shara ãfe ane incienso, fetsari mĩrra, fetsari pirofomã, fetsari vinõ, fetsari xini, fetsari arinã, fetsari trigo, askatari nõko yoinã inafori ovejari, kamayori, nõko karori, yonomatifori, nãfo noko anã tsõa fĩatiroma. 14 ¡Ooa! Babilonia anofãfe nã afara fetsa fetsatapafo fichipaikakĩ anã fitirofoma. Keyokõi afara sharafo fichipaikakĩ mã fimis anã anoma mã fenokõia anã mã fipanã. Mã afaa yopakima mã fimis. Mãkai anã fitiroma. Keyokõi nã mãtonã mã keyoa,” ixõ nã inãmitsamisfãfe yoixikani.
15 Nã mai fetsa anoa fẽkaxõ afama mĩshti minikaxõ kori ichapa fimisfãfe mã noko kaxõ chaima nĩxõ ato õikani, ratekõiyanã, oiakani, askatari shinãmitsakõikani. 16 Yoikĩ iskafaxikani: “¡Ooa! Fato fetsakai Babilonia anoafo keskarama. Ato fe yorafãfe rapati sharakõifo safeafo. Rapati õshi sharafo, askatari oro teoti safeafo, tokiri fakkai fakkaisai keskarari menexemeafo, perlari askari faafo. 17-19 Koshikõi na afama mĩshtisharafo mã keyokõia,” ixõ yoixikani.
Nãskarifiai nã kanõanãfã ãfe ifofãfe shinãkani, a kanõanãfã mẽra fomisfãferi shinãkani, a kanõanãfã nexa yonomisfãferi shinãkani, a kanõanãfã mẽra fokaxõ, ato afama mĩshti minikaxõ kori fimisfãferi shinãkõikani. Babilonia kooaito chai ixõ õikani manokakĩ shinãxikani. “¡Ooa! Fato pexe fetsakai Babilonia keskarama. Na Babilonia fistiõxõ kanõanãfãnẽ ãfe ifofãfe kori ichapa fimisfo. Akka a aya imisfo koshikõi mã keyoa,” ixõ a kanõanãfãõ yonomisfãfe yoixikani.
20 Askaifono keyokõi Epa Nios ika anoafo inimakãfe. Babilonia anoafãfe a Jesús chanĩmara faafo ato omiskõimamisfo, Epa Niospa ato kopikĩ omiskõimaxii. Nãskakẽ keyokõi a Jesús chanĩmara faafo fe, Jesúsxõ ãfe meka yoipaonifo fe, a Niospa meka inõpokoai yoimisfori inimakãfe.
21 Akka Epa Niospa ãfe ãjiri fetsa mitsisipakõichi tokiri efapakõi fininĩfofãta fakafã mẽra potaxõ yoia iskafakĩ: “Na tokiri kerexkai ẽ potai keskafakĩ, nãskafakĩri Epa Niospa na pexe rasi anoafo Babilonia kerexkai omiskõimana kooi keyonõ. Mã keyokõikanax anã ano tsoa ikima. 22 Nãskakẽ anã Babilonia anoax manetifo, xãitifo, maneti fetsafori, afo anã tooxikama. Askatari anã tsoa fanãikama. Tsõakai anã ato nikatirofoma. Askatari a yonomisfo anã ano ikafoma. Askatari a aõ xiki reneaifo nõ anã nikatiroma. 23 Anã luzri õtapakenakama. Feronãfãke kẽro fiaino inimaifãfe mã nikamis keskara anã tsoa askara mã nikapakenakama. Babilonia anoa a inãmitsamisfãfe tãpikõikani. Nãfãfe ichapakõi fimisfo. Askatari koshoiti tãpixõ yora fetsafo pãramisfo. Askafikanax mã keyoafo.
24 “Babilonia anoafãfe a Niospa meka yoimisfo, fetsafori a Jesús chanĩmara faafo, fetsafori mai fetsa anoafo ato retemisfo Jesús õikaspakakĩ. Niospa meka mato yoipaifiaifono mã ato nikakaspamiskẽ, Niospa mato omiskõimana,” ixõ Niospa ãjirinĩ yoia.