22
1 Dawuda bɛtini ito ba Alatala nan xa, Ala to a ba a yaxune birin yii e nun Sɔli yii.
2 A yi a fala, a naxa,
Alatala nan n ma fanyen na,
n ma yinna, n natanga muxuna.
3 N ma Ala nan n ma gɛmɛ gbeen na,
n na n luxunma naxan kui.
A tan nan n yɛ masansan wure lefaan na,
e nun marakisi tiina
naxan luxi
alo n ma faran makantanxina,
n nakisidena.
A tan nan n xunbama gbaloni.
4 Tantunna Alatala xa!
N na a xili,
a yi n nakisi n yaxune ma.
5 Sayaan bata yi a xunfanna radin n xunna ma
alo fɔxɔ igena,
a yi n magaxuma
alo baan xaɲɛxina.
6 Sayaan bata yi n nabilin a yɔlɔnxɔnne ra.
A a lutine rati n yɛɛ ra.
7 N ma tɔrɔni,
n na Alatala xili nɛn,
n yi n xui ramini n ma Ala ma.
A yi n xuiin mɛ a Batu Banxini,
a yi a tuli mati n gbelegbele xuiin na.
8 Nanara, bɔxɔn yi maxa.
Kuyen bun tiine yi yigisan,
e xuruxurun Ala xɔlɔn bun.
9 Tutun yi mini a ɲɔɛni.
Halagi ti tɛɛ dɛgɛn nun tɛɛ wolonne yi mini a dɛ.
10 Ala yi kuyen nafulunɲɛ ayi
alo kɔlimɔna, a yi godo,
kunda yidimixina a sanne bun.
11 A te maleka gubugubu kanna fari,
a tugan xulɛn,
a siga foyeni.
12 A yi a luxun dimini,
naxan nabilinxi kunda gbeen na,
a yi yidimixi alo ige tilinxina.
13 Kɛnɛn gbeen yi minima a yɛɛ ra,
tɛɛ dɛgɛn yi minima naxan yi.
14 Alatala yi a kuye sarinna xuiin namini kore,
Kore Xɔnna Ala xuiin yi mɛ.
15 A yi a xalimakunle woli a yaxune ma,
a yi e raxuya ayi.
A yi galanna ragodo e ma,
e birin yi e gi.
16 Alatala to a kɔnkɔ e ma,
a xɔlɔn to keli alo foye gbeena,
fɔxɔ igen xɔnna yi mini kɛnɛnni
bɔxɔn bunna yi to.
17 Ala yi a yiini bandun keli kore,
a n suxu,
a yi n ba igen tilinxi yireni.
18 A yi n xunba n yaxu sɛnbɛmane ma,
e nun n yɛngɛ faan naxanye yi maxɔdɔxɔ n xa.
19 E n yɛngɛ nɛn,
n yi tɔrɔxi waxatin naxan yi,
koni Alatala yi n mali.
20 A n ba nɛn gbaloni,
a yi n xɔrɔya,
a yi n nakisi
bayo n nafan a ma.
21 Alatala yi n kɔntɔnna fi n ma
bayo n bata tinxinɲɛ ayi a yɛɛ ra yi,
a n kɔntɔnna fi n ma
lan n yiine sariɲanna ma.
22 Bayo n bata lu Alatalaa kirane xɔn ma,
n mi n makuyaxi n ma Ala ra
alo muxu ɲaxine.
23 N bata a sariyane birin suxu,
n mi tondixi a tɔnne suxɛ.
24 N bata n yɛtɛ ratanga hakɛn ma,
fɛ yo mi n na a yɛɛ ra yi.
25 Nanara, Alatala yi n kɔntɔnna fi n ma,
bayo n bata tinxinɲɛ ayi a yɛɛ ra yi,
n yiine sariɲanxi a yɛɛ ra yi.
26 Naxan na tinxinɲɛ ayi,
i ya tinxinyaan yitama nɛn na ra.
Fɛ mi naxan na,
i ya fɛtareyaan yitama nɛn na ra.
27 Naxan na sariɲanɲɛ ayi,
i ya sariɲanna yitama nɛn na ra.
Koni naxan yidɔxi,
i na suxu kiin kolon.
28 Bayo i tan nan yiigelitɔne rakisima,
i mɔn yi wasodene fe ragodo.
29 Alatala, i tan nan n ma kɛnɛnna ra.
I tan nan n ma dimini yalanma, Alatala.
30 En birin nɛma a ra,
n ganla yɛngɛma nɛn,
nxu nun n ma Ala nɛma a ra,
n tuganma nɛn yinna xun ma.
31 Alaa kirane kamalixi feu!
Alatalaa falane tinxin.
Naxanye na e luxun a yi,
a ne kantanma nɛn
alo yɛ masansan wure lefana e yɛɛ ma.
32 Nde gbɛtɛ Ala ra,
ba Alatala ra?
Nde en ma fanyen xɔdɛxɛn na,
ba en ma Ala ra?
33 Ala nan n makantanma fangani,
a tan nan kira kamalixin yitama n na.
34 A tan nan n naxulunma ayi mafurɛn
alo wondene,
a n nate geyane fari.
35 A bata n maxaran yɛngɛn ma,
nanara n nɔxi sulan xali xɔdɛxɛn bandunɲɛ.
36 I bata n nakisi
alo wure lefa yɛ masansanna,
i ya fanna n sɛnbɛn gboma ayi.
37 I bata kira gbeeni tɔn n xa
alogo n nama bira.
38 N bata bira n yaxune fɔxɔ ra,
n yi e halagi.
N mi tinxi xɛtɛ e fɔxɔ ra
fɔ n na e raxɔri.
39 N na e raxɔri nɛn,
n yi e yibutuxun,
e mi fa kelima sɔnɔn,
e yi bira n sanna bun ma.
40 I sɛnbɛn soma n yii yɛngɛ so feen nan na,
i n yaxune xinbi sin n bun ma.
41 I n yaxune ragima n yɛɛ ra,
naxanye yi n naɲaxuxi,
n ne halagi.
42 E gbelegbelema malina fe ra,
koni e mi marakisima yo sɔtɔma,
E Alatala xilima,
koni a mi e yabima.
43 N na e yilunburunma nɛn
alo gbangbanna,
foyen sigama naxan na.
N na e yibɔma nɛn,
n yi e yibodon
alo bɛndɛna kiraan xɔn.
44 I n natangama yama murutɛxin ma,
i yi n findi siyane xunna ra.
N mi muxun naxanye kolon,
n nɔɔn sɔtɔma ne xun na.
45 Xɔɲɛne n matɔxɔma,
n nɛɛn fa falan ti tun,
e bata n xuiin suxu.
46 E yii xudi tuma ayi,
e fa xuruxurunɲɛ,
sa keli e yinne kui.
47 Alatala na!
Tantunna xa fi n natangamaan ma!
N nakisimana Ala xa batu!
48 Ala nan n gbeeɲɔxɔ tiin na,
naxan siyane sama n ma nɔɔn bun ma.
49 A n natangama n yaxune ma.
I xunnayerenna fima n ma
n yaxune xun na,
i yi n ba gbalotɔne yii.
50 Nanara, n na i tantunma siyane tagi.
Alatala, n yi i xinla binya bɛtini.
51 A nɔ gbeene fima nɛn a mangan ma.
A yi a hinanna yita a muxu sugandixin na,
Dawuda nun a yixɛtɛne han habadan.