1 Diine fafe nɛma e xuru falane tiyɛ

xaxilimane e tuli matima a ra nɛn.

Koni magele tiin na maxadi,

a mi na ramɛma.

2 Muxun balo faɲin sɔtɔma a fala xuine nan xɔn.

Koni tinxintarene kunfaxi gbalon nan xɔn.

3 Naxan na a dɛɛn suxu,

na a niin natangama nɛn.

Naxan falan tima ɲaxi ra,

na bɔnɔn nan fenma a yɛtɛ xa.

4 Muxu narixin kunfama seene xɔn

anu sese mi a yii.

Koni naxanye walima,

ne wasama nɛn feu.

5 Wulen naɲaxu tinxin muxun ma.

Koni muxu ɲaxin xunna godon nun yagin nan xilima a yɛtɛ ma.

6 Fɛ mi naxan sigati ki ra,

tinxinyaan na rakantanma nɛn.

Koni fe ɲaxin nan yulubitɔɔn nabirama.

7 Muxuna nde a yɛtɛ findima se kanna ra,

anu sese mi a yii.

Muxu gbɛtɛ a yɛtɛ findima setaren na,

anu nafulu gbeena a yii.

8 Muxuna nafunla nɔɛ a xunbɛ nɛn.

Anu, muxune mi e kɔnkɔma yiigelitɔɔn tan ma.

9 Tinxin muxune luma sɛwan nin kɛnɛnyani.

Koni muxu ɲaxine luxi nɛn alo lɛnpun na tu.

10 Wason yɛngɛne nan nakelima.

Koni naxanye e tuli matima maxadi xuine ra,

fe kolonyaan ne nin.

11 Seen naxanye sɔtɔxi a ɲaxin na mafurɛn,

ne sigan ɲanɲɛ nɛn.

Koni naxanye sɔtɔxi a faɲin na ndedi ndedi,

ne xun masama nɛn.

12 Yigi makuyen muxun tunnaxɔlɔma a ma nɛn.

Koni muxun waxɔn feen na liga a xa,

na a nii yifanma a ma nɛn

alo siimaya wudin yɛtɛna.

13 Naxan na a mɛ maxadi xuiin na,

na kanna a saranna sɔtɔma nɛn.

Naxan fan na yamarin suxu,

na fan a saranna sɔtɔma nɛn.

14 Fe kolonne xaranna fama nii rakisin nan na,

a muxun ba sayaan lutin na.

15 Xaxilimaan muxune kɛnɛn.

Koni yanfantenna kiraan mi raɲanma a ma.

16 Xaxilimaan feen ligama a kolonna nan xɔn.

Koni xaxilitarena a daxuyaan nan nawangama.

17 Xɛra ɲaxin birama kɔntɔfinla nin.

Koni xɛra tinxinxin dandanna nan tima.

18 Naxan mi a tuli matiyɛ a xuru falane ra,

na yiigelitɔyaan nun yagin sɔtɔma nɛn.

Koni naxan na a tuli mati a sɔnna fala muxune ra,

na binyama nɛn.

19 Muxun waxɔn feen na liga,

na a nii yifanma a ma nɛn.

Koni a mi rafan xaxilitarene ma,

e xɛtɛ fe ɲaxin fɔxɔ ra.

20 Naxan nun fekolonne sigan tima,

na fe kolonna tima nɛn.

Koni xaxilitarene xɔyine tɔrɔma nɛn.

21 Tɔrɔyaan yulubitɔɔn nan fɔxɔ ra.

Koni hɛrin nan tinxin muxun saranna ra.

22 Muxu faɲin kɛɛn luma a mamandenne yɛɛ ra nɛn.

Koni yulubitɔna nafunle sa findima tinxin muxune nan gbee ra.

23 Yiigelitɔne xɛɛn naxan bima na donse gbeen nan fima.

Koni kiti sa kobina a birin naminima nɛn.

24 Naxan mi a diin bulanma a sɔnne ma,

na kanna diin mi rafan a ma.

Koni naxan a diin xanuxi,

na kanna a xuruma nɛn.

25 Tinxin muxuna a dɛgema nɛn han a lugo.

Koni muxu ɲaxin luma nɛn kamɛn na tun.