8
Xaxilimayaan xinla tima alo muxuna
1 Fe kolonna* fe kolonna: Sandane yireni ito kui, a luxi nɛn alo fe kolonna yɛtɛɛn bata findi muxun na alogo a xa yamaan kawandi. luxi nɛn
alo muxun naxan xinla tima,
fe famunna xa mi a xuini tema iki ba?
Ɛ mi a mɛɛn ba?
2 Fekolonna tixi yire matexine
nun kira xunne nan na alo muxuna.
3 A sɔnxɔma taan kirane
nun a so dɛɛne ra, a naxa,
4 “N na ɛ tan yamaan nan xilima.
N falan tima adamadiine birin nan xa.
5 Ɛ tan fe kolontarene, ɛ ɲɔxɔ lu.
Ɛ tan xaxilitarene, ɛ findi xaxilimane ra.
6 Ɛ tuli mati bayo n ma falan kɛndɛ.
N fala faɲine nan tima ɛ xa.
7 N dɛɛn ɲɔndin nan falama,
bayo wule falane raɲaxu n ma.
8 N dɛ falane birin tinxin,
e sese mi findixi wulen na hanma yanfana.
9 E birin fixa xaxilimaan yɛɛ ra yi.
Naxanye bata kolonna sɔtɔ,
ne e yatɛxi ɲɔndin nan na.
10 Ɛ n ma xaranna fen dangu gbetin na,
e nun kolonna dangu xɛma kɛndɛn na.
11 Amasɔtɔ fe kolonna fisa bɔxɔ bun nafunla xa.
A dangu muxun waxɔn seene birin na.”
12 “N tan, fe kolonna, n feene famuma.
N muxun malima a xa kolonna sɔtɔ
a yi feene yɛ fen.
13 Alatala yɛɛragaxun kui,
fɔ i fe ɲaxin naɲaxu.
N tan, n wason nun yɛtɛ yigboon nun
kɛwali ɲaxine nun wule falane raɲaxuxi.
14 N gbeen nan maxadin nun miriya kɛndɛn na.
N tan nan xaxilimaya yɛtɛɛn na.
N tan nan gbee sɛnbɛn na.
15 Mangane mangayaan ligama n tan nan baraka yi,
kuntigine yi tɔnne dɔxɔ tinxinni.
16 Yamana kanne nun muxu gbeene
kiti tinxinxin sama n tan nan xɔn.
17 N nafan naxanye ma,
n fan ne rafanma nɛn.
Naxanye n fenma,
ne n toma nɛn.
18 N nafunla nun binyen fima e ma nɛn,
e nun hɛrisigɛn naxanye buma e nun tinxinyana.
19 N ma finma seene dangu xɛma kɛndɛn na,
N tɔnɔn naxan fima,
na dangu gbeti kɛndɛn na.
20 N kira tinxinxin nan xɔn,
kiti kɛndɛn sama naxan xɔn.
21 N nafan naxanye ma
n kɛɛn soma nɛn ne yii,
n yi e banxine rafe nafunla ra.
22 Alatala n tan nan da a wali fɔlɔn na,
benun a wali singe bodene, to mi na ra.
23 N nafala nɛn xabu waxati fɔlɔne,
benun dunuɲa yɛtɛn xa da.
24 N barɛ, fɔxɔ ige yo mi yi na,
tigi mi yi na igene yi minɛ dɛnaxan yi.
25 Benun geyane xa dɔxɔ,
benun geyadine xa malan, n yi da.
26 Ala munma yi bɔxɔn nun burunne da,
hanma a gbangbanna xɔri singena.
27 A to yi kuyen dama, n yi na,
a to yi koren danna kɛrɛndɛnma tilinna ma,
28 a to kundane sa kore,
a yi sɛnbɛn fi tilin igene xunne ma,
29 a yi danna sa fɔxɔ igen ma
alogo igene nama dangu na ra
a yi bɔxɔn bɛtɛn sa.
30 Na waxatini n yi walima a dɛxɔn
alo a yii rafala kuntigin na.
N yi sɛwaxi lɔxɔ yo lɔxɔ a yɛtagi,
n ɲaxan a fe ra
31 n ɲaxan a dunuɲa daxin na,
a bɔxɔna.
N yi sɛwa adamadiine fe yi.”
32 “Iki, n ma diine, ɛ tuli mati n na.
Sɛwan na kanna xa,
naxan na bira n ma kiraan fɔxɔ ra.
33 N nɛma ɛ xuru falane tiyɛ,
ɛ tuli mati,
ɛ yi fe kolonna sɔtɔ,
ɛ nama ɛ mɛ a ra.
34 Sɛwan na kanna xa
naxan na n xuiin namɛ,
naxan na lu n konna dɛ ra lɔxɔn birin
a n ma banxin dɛɛn kantan.
35 Amasɔtɔ naxan na n sɔtɔ,
na bata siimayaan sɔtɔ,
a mɔn yi Alatala kɛnɛn.
36 Koni naxan munma n to,
na a yɛtɛ nan tɔrɔma.
Naxan na n naɲaxu,
sayaan nan nafan na ma.”
*8:1: fe kolonna: Sandane yireni ito kui, a luxi nɛn alo fe kolonna yɛtɛɛn bata findi muxun na alogo a xa yamaan kawandi.