“Yuba, iki i tuli mati n ma falane ra,

i tuli mati n ma falane ra ki faɲi.

2 N nan n dɛni bima,

n falan ti i xa.

3 N ma falane n ma bɔɲɛ faɲiyaan nan makɛnɛnma,

n na n ma kolonna ɲɔndin nan falama i xa.

4 Alaa Nii Sariɲanxin nan n daxi,

Ala Sɛnbɛ Kanna niiraxinla nan niin biraxi n yi.

5 N yabi, xa i nɔɛ,

i yitɔn, i fa n yabi n yɛtagi.

6 En birin lan Ala yɛtagi,

n fan baxi bɛndɛn nin.

7 Nayi, i nama gaxu n tan yɛɛ ra,

n mi i ɲaxankatama.”

8 “Koni, i fala xuiin mɔn n tunla ma,

n bata i ya falane mɛ dɔxɔ wuyaxi,

9 i naxa, ‘Fɛ yo mi n na,

murutɛde mi n na Ala ma.

N sariɲan, hakɛ mi n ma.

10 Anu, Ala mɔn fɛɛn toma n na,

a n yatɛxi a yaxun na.

11 A n sanne sama kutun na,

a yɛɛn tixi n sigati kiin birin na.’ ”

12 “Koni, na feen ma,

n xa a fala i xa, ɲɔndi mi i xa,

amasɔtɔ Ala dangu adamadiin birin na.

13 Nanfera i a matandima,

a to mi a dɛntɛgɛma i xa?

14 Anu, Ala falan tima muxune xa kii wuyaxi,

koni e mi e tuli matima a ra.

15 A falan tiin muxune xa xiyene

nun fe toni kɔɛɛn na.

Xixɔli gbeen na dangu muxune ma,

e nɛma saxi e sadene ma,

16 nayi, Ala yi feene yita muxune ra,

a yi e rakolon,

17 alogo a xa muxune ba e wali ɲaxine yi,

a yi e ratanga wason ma.

18 Nayi, Ala muxun niin natangama nɛn gaburun ma,

a yi a rakisi laxira yi.”

19 “Ala mɔn muxun natɔrɔnma tɔrɔn na,

naxan a rakankanma a sadeni,

a xɔnne yi lu a xɔlɛ.

20 Nayi, donseen yi raɲaxu a ma,

hali donse ɲaxumɛne.

21 A yi doyen mafurɛn, a yi xɔsi,

han a xɔnna naxanye mi yi toma,

ne yi mini kɛnɛnni.

22 A yi maso gaburun na,

a niin yi so saya malekane yii.”

23 “Koni, na yi lan

xa Alaa malekana nde fa a fɛma,

naxan findɛ tagi yitɔn keden peen na wuli kedenna yɛ,

a kira tinxinxin yita a ra.

24 Malekan yi kininkinin a ma, a naxa,

‘Ala, i nama tin a xa godo gaburun na,

n bata a xunbaan sɔtɔ.’

25 Nayi, na muxun fatin mɔn yi a dii ɲɔrɛ sɛnbɛn sɔtɔ,

a mɔn yi sɛnbɛn sɔtɔ

alo a foninge waxatina.

26 Nayi, na muxun na falan ti Ala xa,

a yi a yabi,

a yi fa gbelegbelɛ Ala yɛtagi sɛwani,

amasɔtɔ Ala bata a tinxinyaan saren fi a ma.

27 A luma sigin sɛ nɛn yamaan yɛtagi,

a naxa, ‘N yulubin tongo nɛn,

n yi sariyan kala,

koni Ala mi na saranxi n na.

28 Ala bata n niin natanga gaburun ma,

n luma nɛn kɛnɛnna nin.’ ”

29 “Ala na birin ligama,

a ligama nɛn sanɲa ma wuyaxi muxune xa,

30 alogo a xa e niin natanga gaburun ma,

alogo e xa lu e nii ra kɛnɛnni.”

31 “Yuba, i tuli mati n na ki faɲi!

I dundu, n xa falan ti i xa.

32 N yabi,

xa falana nde i xɔn, falan ti,

amasɔtɔ n waxi i ya tinxinyaan to feni.

33 Xanamu, i tan nan lan

i tuli mati n na,

i dundu,

n xa i xaran fekolonna ma.”