Inin aka-aka hāp sabab Isa Almasi
Jūd inin sinulat weˈ si Markus
Pahāti sabab jūd sinulat weˈ si Markus
Si Markus inin bataˈ pe katuˈu si Isa si dunyahin. Patennaˈannen laˈi si puweblo Awrusalam. Lumaˈ disi Markusin daran pagtipunan meˈ tindeg si Isahin bang siye ngampun-ngampun tudju Tuhan. Hangkan magkinataˈu si Markus duk si Petros duk meˈ tindeg si Isa sinduwehin. Niyaˈ magpaˈin weˈ si Markus inin kahagad pu si Isa sabab si Petros.
Tagnaˈ si Paul duk Barnabas lumengngan magmahalayak si meˈ kabangsahan dumaˈin Yahudi, nuhut siye si Markus peggeˈ magdanganakan si Barnabas duk si Markus. Saguwaˈ gaˈ pe talatag weˈ de meˈ lahat sōng papīhanden, hap lumaˈ balik si Markus.
Duwen tahun puwas miyaˈan, sōng lumengngan ne isab si Paul duk Barnabas pī balik si meˈ lahat bakas pagmahalayakanden. Mabayaˈ boˈo Barnabas balik si Markus saguwaˈ gaˈi bayaˈ si Paul. Sabab pagsaggaˈde miyaˈan, magsapeˈ ne siye duwangan. Si Barnabas binoˈo weˈ ne si Markus duk pī siye si meˈ lahat seddili magmahalayak.
Bang piyen tahun palabey, ngapagen ne sandel si Markus pu si Isa Almasihin. Sakaliˈ si Petros laˈi si Roma, dangan meˈ saweˈnen si Markus. Ekka taˈaya si Markus amban si Petros.
Jūd inin sinulat weˈ si Markus kalaˈine si lahat Romahin duk sinulat inin weˈ ne para si meˈ aˈa dumaˈin bangsa Yahudi malaˈi si lahat Romahin. Iye dehellu-dehellu manulat sabab meˈ hinangan si Isahin. Sinulat inin weˈ ne supaya meˈ aˈa Romahin ngataˈu sabab Isa Almasi. Gaˈ iye magaka tantu sabab meˈ panoloˈ si Isahin saguwaˈ iye inakanen sabab meˈ hinangan si Isa makaˈulaliˈin supaya kataˈuhan weˈ si Isa balakatan. Pinahāti isab weˈ ne weˈ si Isa taga kapatut ngampun duse.
1
Magmahalayak Yahiya magpandi-pandi meˈ aˈahin
(Mateo 3.1-12; Lukas 3.1-18; Yahiya 1.19-28)
1 Inin aka-aka hāp sabab Isa Almasi, Anak Tuhanin. 2 Tagnaˈan aka-aka hāp inin tasulat weˈ Nabi Isaya dem kitab. Paˈinne,
“Paˈin Tuhanin, ‘Daˈakku pī pamasanankun dehellu amban kaˈu duk memesne lānnun.’ 3 Niyaˈ aˈa maglingan dem lahat makagindew-gindew. Iye inin pinaˈinnen, ‘Sōng tekka ne Panuhutanin. Palanuˈun bi lān palabeyannen! Pabentelun bi lān tinuhutnen!’ ”
4 Manjari inin, tekka si Yahiya laˈi dem lahat makagindew-gindew. Iye hep mamandi meˈ aˈahin sakaliˈ pagsusunande ne duk lebbahande ne meˈ duseden. Magmahalayak si Yahiya laˈi si meˈ aˈahin weˈ sasuku magsusun ne duk ngalebbahan meˈ hinanganne malaˈatin, subey iye pinandi duk ampun Tuhanin du iye. 5 Manjari ekka meˈ aˈa amban meˈ kalahat-lahatan laˈi si Yahudiya duk amban Awrusalam hap pī si iye. Magbennal siye si meˈ duseden duk pinandi siye weˈ Yahiya dem boheˈ Jordan.
6 Semmek Yahiyahin bulu untaˈ tinennun duk kanditnen kuwit sapiˈ. Kinakannen dulu duk boheˈ buwani. 7 Duk magmahalayak iye kuweˈ inin, “Niyaˈ,” paˈinne, “paturul pitu si aku, balakatan pe amban aku. Gaˈi ku bisan pataˈ pakokkoˈ ngalekkahan ingket tehompaˈnen. 8 Pinandi kaˈam weˈ ku duk boheˈ saguwaˈ iye inin seddili pamandine kaˈamin. Papiyune si kaˈam Niyawa Sutsihin.”
Pamandi pu si Isahin
(Mateo 3.13-17; Lukas 3.21-22)
9 Manjari inin, masa īˈ tekka si Isa amban Nasaret, dambuwaˈ puweblo laˈi si lahat Jalil. Duk pinandi iye weˈ Yahiya laˈi si boheˈ Jordan. 10 Pagpaguwaˈ si Isa amban dem boheˈ, takitene luka langitin duk duwaˈi Niyawa Sutsihin pī si iye kuweˈ bantuk assang. 11 Duk niyaˈ suwala amban surgaˈ magpaˈin, “Anakte kew kalasahanku. Kasulutan ku teˈed si kaˈu.”
Panassat pu si Isahin
(Mateo 4.1-11; Lukas 4.1-13)
12 Manjari magtawus si Isa binoˈo weˈ Niyawa Sutsihin hap lahat makagindew-gindew. 13 Ampatpūˈ bahangi iye laˈi sinassat weˈ nakuraˈ seyitanin. Niyaˈ isab meˈ hayep talun laˈi saguwaˈ hinatul si Isa weˈ meˈ malaˈikat.
Pineneˈ weˈ si Isa meˈ tindegne tagnaˈin
(Mateo 4.12-22; Lukas 4.14-15; 5.1-11)
14 Pagubus si Yahiya kinalabusu weˈ sultanin, hap pī si Isa si lahat Jalil. Magmahalayak iye sabab aka-aka mahāp amban Tuhanin. 15 “Taˈabut ne waktu bakas pinaˈalin,” paˈinne, “duk tapit ne waktu pagbayaˈ Tuhanin. Pagsusunanun bi dusebin duk lebbahanun bi ne. Duk kahagadun bi aka-aka mahāpin.”
16 Manjari inin, sābu lumengngan si Isa si susulan lamew inēnan Jalil, niyaˈ takitene duwangan magpungtinaˈi, si Simon duk Andariyas, magpokot laˈi dem lamew peggeˈ siye meˈ aˈa magkenna. 17 Paˈin si Isa si siye, “Dayiˈ kaˈam nuhut aku. Bahanbin mageddoˈ-eddoˈ kenna. Saguwaˈ bang kaˈam nuhut aku, toloˈante kaˈam mageddoˈ-eddoˈ aˈa pinatuhut si aku.” 18 Na, magtawus inambanan weˈ de meˈ pokotden duk nuhut ne siye si Isa.
19 Manjari paglengnganne tala-tala, niyaˈ isab takitene duwangan magpungtinaˈi, disi Yakub duk Yahiya, meˈ anak Sebedehin. Laˈi siye dem bangkaˈde magmemes pokot. 20 Magtawus siye ilinganan weˈ si Isa duk binoˈo weˈ ne. Manjari inambanan weˈ de samaden dem bangkaˈ duk meˈ aˈa tinangdananden, duk nuhut ne siye si Isa.
Aˈa pasayedan seyitan
(Lukas 4.31-37)
21 Hap pī disi Isa si puweblo Kapernaum. Pagtaˈabut ellew Sabtuˈ, ellew liˈi meˈ Yahudihin, hap pī si Isa si langgal magusihat si meˈ aˈahin. 22 Ula1iˈ meˈ aˈahin pagkalede usihatnen. Peggeˈ magbiddaˈ teˈed usihat si Isahin duk usihat meˈ guru si saraˈ āgamahin. Peggeˈ taga balakat si Isa bang iye missā.
23 Manjari niyaˈ padiyalem pī dem langgal aˈa pasayedan seyitan. 24 Magkilahap iye, paˈinne, “Daˈa kami sasewun, Isa, aˈa Nasaret. Gaˈ niyaˈ lamudnu si kami. Pitu ke kew makaˈatan kami? Kataˈuhanku du bang sine kew. Kaˈu dambuwaˈ-buwaˈ masutsi mapitu amban Tuhanin.” 25 Saguwaˈ inamāhan weˈ si Isa seyitanin. Paˈinne, “Daˈa kew mabehe. Paguwaˈ kew amban aˈa iyan.” 26 Manjari magpaspadan weˈ seyitanin aˈahin duk pagubus seyitanin magkilahap, paguwaˈ ne iye amban aˈahin. 27 Bengngangan meˈ aˈahin kēmon, hangkan magtilew-tinilew siye, paˈinde, “Ine enteˈ inin? Toloˈ baˈahu hep inin. Taga kapatut iye ngandaˈak bisan meˈ seyitanin, duk tuhutde pangandaˈakannen.” 28 Manjari kabantuhannen magtawus bawag si kēmon kalahat-lahatan laˈi si lahat Jalil.
Ekka aˈahin pinakoleˈ weˈ si Isa
(Mateo 8.14-17; Lukas 4.38-41)
29 Puwas miyaˈan, paluwas si Isa amban langgal duk pī iye padiyalem si lumaˈ disi Simon duk Andariyas. Magtuhut iye duk si Yakub duk Yahiya. 30 Matoˈa si Simon dendehin pabāk laˈi ilemmun. Manjari magtawus akahan meˈ aˈa malaˈihin si Isa sababne. 31 Hap pī si Isa duk inantanan weˈ ne tangan dendehin bu pinakuwat weˈ ne. Manjari kawuliˈan ne iye. Ubus bu pinakan siye weˈ ne.
32 Pagseddep ne ellewin, binoˈo weˈ meˈ aˈahin pī pu si Isa sasuku masakihin duk meˈ aˈa pasayedan weˈ seyitanin. 33 Duk meˈ aˈa si puweblo miyaˈan, magtipun si luwasan lumaˈ miyaˈan. 34 Ekka aˈa taga saki bayuˈ-bayuˈan pinakawuliˈ weˈ si Isa duk ekka isab meˈ seyitan pinaluwas weˈ ne. Gaˈi dinaˈak weˈ ne meˈ seyitanin mabehe peggeˈ asal kataˈuhande bang sine si Isa.
Magmahalayak si Isa si lahat Jalil
(Lukas 4.42-44)
35 Pagsasumu subu-subu pe teˈed, dongaˈ si Isa duk paluwas iye amban lumaˈ. Tahalaˈ iye amban puweblo hap pī si lugal gaˈ niyaˈ aˈane duk missā iye laˈi si Tuhan. 36 Manjari, peggeˈ gaˈ iye laˈi si lumaˈ, piniha iye weˈ disi Simon. 37 Pagtakasuwaˈde ne iye, paˈinde si iye, “Īˈ laˈi meˈ aˈahin kēmon miha kaˈu.” 38 Paˈin si Isa si siye, “Sūng kite bi pī si meˈ kalumaˈan seddili matapitin duk ku makapagusihat isab laˈi. Peggeˈ iye hep inin akaku mapitu si dunyahin.” 39 Manjari hap pī ne si Isa si kēmon kalahatan si Jalil. Magmahalayak iye dem meˈ kalanggal-langgalande duk magpaluwas iye meˈ seyitan amban meˈ aˈa.
Si Isa makawuliˈ aˈa inipul
(Mateo 8.1-4; Lukas 5.12-16)
40 Manjari niyaˈ pī pu si Isa dambuwaˈ aˈa inipul. Nengge aˈa inin duk tuˈutne magpadiyawaˈ pu si Isa duk pabuyuˈ teˈed, paˈinne, “Bang kew mabayaˈ tapakawuliˈnu ku.” 41 Maˈaseˈ teˈed si Isa si iye. Pinasōng weˈ ne tangannen duk inantan weˈ ne aˈa inipulin duk paˈinne, “Asal mabayaˈ ku. Kawuliˈan ne kew.” 42 Magtawus ipulnen tahalaˈ duk kawuliˈan ne iye. 43 Magtawus iye pinatahalaˈ weˈ si Isa duk sinessaˈan teˈed iye weˈ ne. 44 Paˈin si Isa si iye, “Daˈa kew paˈin magaka-aka bisan pu sine sabab pamakawuliˈku kaˈuhin. Saguwaˈ pī kew pakitehanun barannun si imamin duk magkuluban kew sa pangandaˈakan si Musahin, hinang tandaˈ si meˈ aˈahin weˈ asal kawuliˈan ne kew.” 45 Saguwaˈ lumengngan aˈa bakas inipulin duk magaka-aka teˈed iye sabab kakawuliˈnen duk binawag weˈ ne inin. Hangkan gaˈi ne si Isa tapī dem meˈ puweblo paguwaˈ si aˈa, saguwaˈ laˈi ne hadja iye si meˈ lugal gaˈi paglahatan aˈa. Saguwaˈ meˈ aˈahin hap pī du si iye amban meˈ kalahat-lahatan.