1 Rivasiy ji̱ta, Jesús niquejadivasirya jirya, su̱nu̱yasubedanumatiy jarichuna̱cho̱, saniquejada ji̱ta variy: “Rito̱ma̱ rarunda, Ye̱ye̱, ya̱numa vandanuni̱ jidyenu, sa̱tidye vandanu varintyidye ji. 2 Jiche̱chara daryaju̱ni̱, sa̱tidye nusu̱y ti̱ta̱ju̱ riy nijya̱nvay, sa̱tidye sa̱y ju̱na̱reju̱ jnu̱yada riy, muvyeñi̱ta jiche̱yadani̱. 3 Jiryani̱ ji̱ta rani̱cha ju̱na̱reju̱ jnu̱yada, jiryatiy ridyetyasara nijya̱nvay ji, jiryatiy vinu jiñi̱ rañi̱cha si̱tenu Ju̱denu day, jadchintyi, jiryatiy ridyetyasarani̱ yipa̱nu Jesucrístu. 4 Ravyandadoda ji̱ta jirya mucadimu ji, Ye̱ye̱, jiryatiy rivaamyu̱rya jiryatiy jiche̱yada rivaayadaju̱ ray. 5 Diye, Ye̱ye̱, ya̱vandanu jityuununtirye, darya vandata jiryatiy radyetyanu̱yada jityuunu, mucadi ju̱dayadajisirya.

6 Radyetyadoda yitya riy vaduy, jiryatiy jiche̱yada mucadi ja̱nvay cabyimusirye. Rivyicha̱da ji̱ta jiñijya̱nvay, jiche̱yada variy raryi. Rityuva̱chusara ji̱ta jiñiquejadamuntiy. 7 Diye ridyetyasarara jiryatiy yimusirya ti̱ta̱ju̱ra jiryatiy jiche̱yada rarya. 8 Jiñiquejada ji̱ta, jiryatiy jiche̱yada rarya, rache̱mya̱ntidyeryi, ru̱mutya̱sara varirya. Ridyetyasara varirya, jiryatiy ri̱deda si̱tenu yimusiy, rityuva̱chusara ramuntiy, jiryatiy yipa̱jada ray. 9 Rayasanta rachiityari̱vay jiyadaju̱ ji, jiryatiy jiche̱yada raryi, rivyichasara jiñijya̱nvay daryaju̱. Ne rayasanta mucadi ja̱nvay jiyadaju̱ ji. 10 Ti̱ta̱ju̱ jiryatiy rañijya̱nvadyeryi, darya jiñijya̱nvay varintyidyeryi, daryaday jiryatiy jiñijya̱nvadyeryi, rañijya̱nvay varintyidyeryi. Rañi̱chasara vandanusi̱ variy rachiityari̱vamyu. 11 Ne ra̱chasara jirya mucadimunu̱day, jiryatiy ra̱jniy yimuju̱ntiy, Ye̱ye̱. Rachiityari̱vay ji̱ta ra̱chajaya̱sara mucadincha day. Ye̱ye̱ jiintyi̱, ya̱bachara yityamu riy jiryatiy jiche̱yada raryi, rirya̱tidye vichasara nu̱tyu ti̱quintidye, nu̱tyu vu̱tyi vichasara daryá. 12 Ravyichasaratidye jiyu mucadimu ruusa̱, rabejeya̱sara yityamu riy, jiryatiy jiche̱yada raryi. Ri̱nu̱tyasara riy, ti̱numa rapyarutaye̱ ruusa̱siy, vinu ni̱ jiryatiy parutasi̱dañi̱, ratatiy ra̱jto̱tanirya catera nu̱chara sanchiy. 13 Diye ji̱ta ra̱jiya yimuju̱. Jiyutidye rañi̱cha jirya mucadimu, rañiquera jirya niquejada, ra̱tidye ju̱to̱ ri̱chana̱yada rachiityari̱vamyu ti̱ta̱ju̱. 14 Rache̱mya̱ ji̱ta jiñiquejada riy, Ye̱ye̱. Mucadi ja̱nvay ji̱ta javittyuchara riy, jiryatimyu̱ ne rivyichasara rityevay daryaju̱ day, dantyamu̱y ne vinu ray vichasara rityenuntidye. 15 Ne rayasanta ji, ya̱tidye sipyata mucadimusiryi. Rayasanta ji̱ta dajyi, ya̱tidye jantyuy nicyara̱myijisiy ruuva. 16 Ne rivyichasara mucadi ja̱nvay tevadye, ne vinu ray. 17 Ya̱jiintyasara jiijyu̱ si̱tenu datya̱data riy. Jiñiquejada ji̱ta si̱tenu datya̱da day. 18 Daryatiy yipa̱jada mucadimuju̱ ray, daryaday ri̱pa̱sara mucadi ja̱nvamyuju̱ntidyeryi. 19 Radye rajiintye jiñijyu̱ riyadaju̱ day, rirya̱tidye vichasara jiintyasavay jiijyu̱ si̱tenu datya̱data.

20-21 Ne vinu rachiityari̱vay jiyadaju̱ rayasantasara ji, rayasantasara ji̱ta riyadaju̱ntiy ji, rityi ra̱tuva̱chusara rimu, rachiityari̱vay datyadodiva, rirya̱tidye vichasara nu̱tyu ti̱qui ti̱ta̱ju̱, Ye̱ye̱, nu̱tyu jiityi vichasara darya rimu, nu̱tyu ratyi vichasara darya variy yimuntidye, rirya̱tidye vichasara darya variy vuryimuntidye, rirya̱tidye tuva̱chusara mucadi ja̱nvay ramu, jiryatiy yipa̱jada ray. 22 Rache̱mya̱ ji̱ta rirya vanda, jiryatiy jiche̱yada rarya, rirya̱tidye vichasara ti̱qui, nu̱tyu vu̱tyi vichasara daryá. 23 Ray ra̱chasara rachiityari̱vamyu, ji ji̱ta ra̱chasara variy rimuntidye, rirya̱tidye vichasara ju̱to̱vay nu̱tyu ti̱qui nta ti̱ta̱ju̱, rirya̱tidye datyasara mucadi ja̱nvay ramusiy jiryatiy yipa̱jada ray, jiryatiy jivya̱tasarantiryi rachiityari̱vantyi, nu̱tyu jivya̱tasara daryantirye. 24 Jiche̱yada raryi, Ye̱ye̱, ravya̱ta rirye̱cha variy risa̱, jasityi ravyichasarantidye, rirya̱tidye diy riva vanda, jiryatiy jiche̱yada rarya, jiryatiy jivya̱ta̱da mucadi ju̱dejadajisiy daryaju̱ ray. 25 Mucadi ja̱nvay ji̱tamu̱y ne rañi datya̱da ji, Ye̱ye̱ vase vichara, nu̱tyu rañi ji̱ta rañi datya̱da ji, rachiityari̱vay jarye datyasarara jiryatiy yipa̱jada ray. 26 Radyetyanusara rirya yitya, ra̱day jatyi datyadoda rintyirya, ra̱tidye vichasara jivya̱ta̱da ruumu, nu̱tyu rimutiy ravicha̱da daryantiy, ra̱tidye vichasara ray variy ruumuntidye.”