46
Anôtô kêtu nêŋ lamu to ŋaclai
1 Anôtô kêtu nêŋ lamu to ŋaclai.
Eŋ gêjam aêac sa gêdêŋ daŋgôŋ jageoŋa gêjac ŋawae.
2 Amboac tonaŋ embe nom ênaŋa ma lôc êu tau êsêp gwêc êna,
naŋ aêac tatêc tauŋ atom.
3 Embe gwêc ŋadindiŋ
ma êŋgasim e ê kapic-kapic naêpi lôc e êkôtêŋ tau, naŋ aêac tatêc tauŋ atom.
Lau siŋ undambêŋa nêŋ Apômtau kêpuc aêac tôŋ
Jakobnê Anôtô kêtu aêacnêŋ laimôkê.
4 Bu kapôêŋ tec kêpoac ma ŋasêli kêmalôm Anôtônê malac
to kêmoasiŋ Lôlôc Ŋatau nê andu dabuŋ.
5 Anôtô tec gêmoa malac tau ŋaluŋgeŋ, tec senseŋ su ênaŋa atom.
Anôtô gêjam malac tau sa gêdêŋ bêbêc kanucgeŋ.
6 Tenteŋlatunêŋ lai kêpoa ma kiŋnêŋ gamêŋ kêku,
eŋ kêkêŋ nê wapap gêjac e nom kêtênêp.
7 Lau siŋ undambêŋa nêŋ Apômtau kêpuc aêac tôŋ.
Jakobnê Anôtô kêtu aêacnêŋ laimôkê.
8 Amêŋ ma alic Apômtaunê gêŋsêga.
Alic gêŋ kaiŋ teŋ, taŋ gêgôm aŋga nom naŋ.
9 Ŋac tonaŋ tec gêjam gôliŋ siŋ e gêdêŋ nom ŋamadiŋ.
Ŋac tonaŋ tec gêjac talam ŋatikoc gêŋgic to kêmadôm kêm tulu ma kêkêŋ kareta siŋŋa ja geŋ su.
10 “Gamêŋ ŋaŋêŋ êsa ma ajala gebe Apômtau aê taugeŋ.
Tenteŋlatu tetoc aê sa ma lau aŋga nom samob amboac tonaŋgeŋ.”
11 Lau siŋ undambêŋa nêŋ Apômtau kêpuc aêac tôŋ.
Jakobnê Anôtô kêtu aêacnêŋ lai môkê.