3
Jena ruwimela Esukristo abé najtékame ko me'tigá Moisesi
1 'Emi ralámuli Onorúgame oyérame napurigá ne, napu 'we a'lá sébali olame ralámuli ju napurigá nulá Onorúgame, Onorúgame júlale Esusi napurigá ramué nuleme nímala. Abiénachigó júkuru wa'lula balé neraga Onorúgame tánime ramué na'temaka. Alekeri 'we 'la na'tawa 'emi Esusi 'yuga alué napu benírime ju ramué. 2 Esúsika nabí 'la sébali e'wale napurigá nulele Onorúgame. Alarigá nile napurigá Moisesi, Moisesi 'we a'lá e'wale napurigá nulele Onorúgame napurigá repúmala ralámuli Onorúgame oyérame. 3 Ramueka pe napurigá bilé galí nírukuru. Esusi newame júkuru alué galí. Alué galika ramué nírukuru. Alué bo'né bayékuru ramué napurigá 'la sébali olawa napurigá bo'né najkí. Moisesi pe nóchame nile. Esusi júkuru 'la bijchiá nulame. Alekeri 'la nirálime júkuru me'tigá Moisesi. 4 Bilé rió bilé galí newame júkuru, nobi Onorúgameka 'sile suwábaga newá. 5 Moisésika 'la sébali olale ralámuli repua napurigá bilé nóchame niraga. Alueka anele ralámuli napu Onorúgame anele churigá nímili nílige nujubá rawé. 6 Nobi Krístoka napurigá inolá niraga, 'we a'lá sébali nulame ju alé Onorúgame galílachi napu ramué niru alué galí. Ramueka Onorúgame oyérame niru tabilé guwana rusuka tabilé majaga, 'we a'lá na'tásaká ramué Onorúgame 'yuga mochiwa senibí. Alarigá ruilí ralámuli, tabilé chijúniga.
7 Alekeri 'emi 'la alarigá e'wawa napurigá nulá Onorúgame Alawala. 'Ya we'ká bamí Onorúgame Alawala bilé rió gu'írile napurigá osimela, regá anime:
Napu'lige 'emi akisá Onorúgame ra'íchachi,
8 'la 'we a'lá e'wélime júkuru,
tase alarigá niwa napurigá nílige 'ya ejperégame 'emi rijimala
napu'lige panápuri e'yéname nílige tabilé riógichimi,
alueka pecha e'wéleko Onorúgame,
'we chátiri 'nátame nílekuru,
tabilé chéláme nílikuru Onorúgame 'yuga na'tálime.
9 Alueka tajsiné ganíliga mochime nile Onorúgame 'yuga.
Onorúgameka oká liá bamí gu'írile nobi
alué ralámulika abirigáchigo sairúgame neraga mochíleko
Onorúgame 'yuga.
Onorúgameka 'we we'lí anáchale.
10 Onorúgameka 'we ayoga asale alué ralámuli 'yuga,
'lige anele: «Alueka tabilé siné e'wáguru ne nulalila
'lige aminami tabilé siné námamala alarigá ko ne.
Alué ralámulika nabí se'nú bowé cha'pime ju 'we resítiri.»
11 Alekeri Onorúgameka 'we ayoga a'wágame anéguru regá:
Alué ralámuli tajsiné narémala ne a'walila
napurigá 'la ganíliga mochímala.
Pe a'bopi a'walílate na'támala.
12 'Emi 'la Onorúgame oyérame, 'we a'lá 'nata mochiwa, tabilé na'tawa Remónisi na'tálila, 'lige aminami tabilé sairúgame niwa Onorúgame 'yuga napu tabilé siné mukume ju. 13 Iligá abé 'la ju a'bopi beniá bilé rejcholi nabí rawé. Alarigá olawa bijí 'la gainalia. Alarigá nokísiwa 'nalina napurigá tabilé e'wewa Remónisi na'tálila, alueka cha 'yégime kame. 14 'La aminabi oyériga nokísili ka alué ra'íchali napu benírilige Esukristo, 'liko 'we ganíliga mochiwa ejperega pe alué Esukrístocho 'yuga 'nátaga.
15 Pe a'chigóriga ju napurigá osirúgime nile 'ya napu regá anile:
Napu'lige gepulia Onorúgame ra'ichálila
tase alarigá nokiboa napurigá nokálige 'ya ejperégame ralámuli
jami e'yéniga tabilé ralámuli riógachi, 'we wakígachi.
Alueka Onorúgame saíla gayénale.
16 'Emi 'we 'la machíguru chieri níligo alué 'ya ejperégame, alué ralámuli israelita napu Moisesi buyánilige 'ya alé wa'lú gawí bo'ígichi Ejipto anilichi. 17 Onorúgameka 'we ayoga asale alué ralámuli 'yuga oká liá bamí. Alué ralámuli 'we cha nokale 'lige alé suwile alé 'we wakígachi napu tabilé 'wesi riógame nile. 18 'Emi 'we a'lá néláleke 'we a'wágame anéligo Onorúgame alué ralámuli, alué ralámuli napu sairúgame neraga mochile Onorúgame 'yuga. 'Lige anile: «'Émika tajsiné nílamala ne a'walila napurigá 'la ganíliga ejperélamala. Tabilé siné resíbimala jena wijchimoba 'lige tabilé siné moinámala rewagachi.» 19 Alueka pecha siné e'wáliga napurigá anile Onorúgame, alekeri 'la machirú tajsiné naréliga a'walí napurigá 'la ganíliga ejperélamala. Pecha siné bijchígilime napu anile Onorúgame.