1 Mawɓe *cakkanooɓe Alla, jannginooɓe *Tawreeta, mawɓe *Yahudankooɓe he tawaaɓe nder hawriine dawrooɓe, kawri illa beete caawodiri. Ɓe kaɓɓi Iisa, ɓe njaari to Pilaatus.* 15.1 Pilaatus woni kawjotooɗo leydi Yahudiya. 2 Nden Pilaatus ƴami mo, wi'i :

—Aan woni laamiiɗo *Yahudankooɓe oon naa ?

Iisa jaabii mo, wi'i :

—Aan e hoore maa wi'i ka.† 15.2 Iisa wi'i goonga non amma o hiɗaay lamnude haala makko.

3 Sey mawɓe *cakkanooɓe Alla ɓeen tinni no pela Iisa dow kujje keewɗe. 4 Pilaatus ƴamti Iisa kaden wi'i :

—Walaa ko njaabotoɗaa naa ? A nanaay ko ɓe mbi'i dow maaɗa ɗum fuu naa ?

5 Amma Iisa fiirtaay hunnduko, jaabii ɓe. Rafi njaabaaki Iisa kiin haayɗini Pilaatus.

6 *Juulɗe dimɗinol Isra'ilankooɓe fuu, himɓe no cuɓo kasunke gooto mo yoofantee. 7 *Juulɗe dimɗinol gom ngari fotodiri, gorko gom bi'eteeɗo Barabas no uddidaa he murtuɓe gom. Murtuɓe ɓee, nder murtol mum'en mbaraana goɗɗo. 8 Nyannde juulɗe ɗee jama'aare wari to Pilaatus, eeli mo o waɗana ɓe ko woowi waɗeede he juulɗe fuu ɗum. Kam woni o yoofana ɓe kasunke gom. 9 Nden o jaabii ɓe, o wi'i :

—Oɗon ngiɗi mi yoofana on laamiiɗo *Yahudankooɓe oo naa ?

10 Pilaatus jaaborake nii ngam no anndi ko haasidaaku waɗi mawɓe *cakkanooɓe Alla ngaddi Iisa to mum. 11 Kamɓe duu tutii jama'aare ndeen wara, eela ɗum kam yoofa Barabas no ɓuri kam yoofa Iisa.

12 Pilaatus ƴamii ɓe kaden, wi'i :

—Ndenne, ɗume ngiɗɗon mi waɗa, mo mbi'oton laamiiɗo *Yahudankooɓe oon nee ?

13 Sey ɓe kuuɓi, ɓe mbi'i :

—Tontu mo dow *bardugal !

14 Pilaatus ƴami ɓe, wi'i :

—Ɗume o waɗi ko foti nii fuu ?

Sey ɓe kuuɓi sanne ɓe mbi'i :

—Tontu mo dow *bardugal !

15 Pilaatus yoofi Barabas ngam welnude ɓerne jama'aare ndeen. O hokki laawol Iisa ɓoccee, tontowee dow *leggal bardugal.

16 Soogeeji ɗiin njaari Iisa nder batamaare ɓaade Pilaatus, ɓe kawri soogeeji ɗiin fuu. 17 Ɓe ɓornii Iisa alkubbaare woɗeere gom.‡ 15.17 Nder jamaanu Iisa, alkubbaare woɗeere woni alkubbaare nde laamiiɗo ɓornotoo. Ɓe canyi taarde gi'e, ɓe kippi dow hoore makko. 18 Ɓe puɗɗi salminde he makko, iɓe mbi'a :

—Alla sabbinane, laamiiɗo *Yahudankooɓe.

19 Ɓe piiri mo loocol dow hoore, ɓe kaarti ɓe tutti dow makko. Ɓe kofi yeeso makko, iɓe cujidana mo. 20 Wakkati ɓe njawinoo mo faa heƴi ɓe, ɓe itti alkubbaare ndeen, ɓe ɓornii mo kolte makko. Ɓe njaari mo yaasin faa ɓe tontowa mo.

21 Simon, baaba Skandaaru e Rufus, gorko jeyaaɗo Sirene, no wara no ƴuwa gese sey fotti Iisa he soogeeji ɗiin. Soogeeji ɗiin tilsini mo o wakkoo *leggal bardugal Iisa ngaal. 22 Ɓe njaari Iisa nokkuure wi'eteene Golgota. Maana Golgota woni « nokkuure laalagal hoore ». 23 Ɓe kokki Iisa cabiijam kawrodiriɗam he ɗakke kaaɗɗe gom ngam o yara, amma o salii. 24-25 Yamde jeenay subaka, ɓe tonti Iisa dow leggal ngaal. Ɓe piyi kolte makko caaca, ngam ɓe ndaara moy heɓata ɗe.§ 15.24 Jabuura 22.19

26 « Laamiiɗo *Yahudankooɓe » winndaa dow alluwal, ɓe takki ngal dow timtude hoore makko. Ɗum woni sabaabu mo waɗi o tontaa. 27 Ɓe tontidi mo he wuyɓe ɗiɗo gom, oo nyaamo makko, ooto nano makko. [ 28 Ɗum tabbintini ko dewte mbi'ii : O fiyetee sawru bonɓe.]* 15.28 Aaya 28 tawaaka nder ɗereeji arani fuu. 29 Yawtooɓe har toon ɓeen no njenna mo, no njinnga ko'e mum'en, no mbi'a :

—Hey ! Liɓowel *Juulirde mawne, dey nyiɓitoo nde nder balɗe tati, 30 dannu hoore maa. Jippa dow *leggal bardugal ngaal !

31 Noon duu, mawɓe *cakkanooɓe Alla e jannginooɓe *Tawreeta tinni no njaltinoo mo hakkune mum'en, no mbi'a :

—O dannii woɓɓe, dey o waawaa dannude hoore makko ! 32 *Almasiihu, Laamiiɗo *Isra'el jippoo dow *leggal bardugal ngal joonin joonin. Nde nii en ngi'ii ɗum, en ngoonɗinan mo !

Himɓe ɗiɗo tontidaaɓe he makko ɓeen duu no njenna mo.

33 Nyannde Iisa tontanoo ndeen, caka nyalooma, nimre huuri leydi ndiin fuu faa ɗum waɗi jamɗe tati. 34 Har yamnde tati juura, Iisa fii wullaanu mawnu, wi'i :

—Eli, Eli, lema sabaktani ?

35 Wakkati darinooɓe toon ɓeen nanunoo ɗum, woɓɓe nder maɓɓe mbi'i :

—Kettinee, omo nii omo nodda Eliya !

36 Nden gooto nder maɓɓe doggi, suuwowi tekkere nder ndiyam lammuɗam, haɓɓi he loocol, waddi nde hadde hunnduko Iisa ngam Iisa siiɓoo ɗam. Nden o wi'i :

—Accee, ndaaren tawte Eliya no waran jippina mo !

37 Iisa fii wullaanu mawnu kaden, sey o foofi foofaango makko sakitiingo. 38 Riido palaaɗo nder *Juulirde mawne oon serki illa dow faa ley, laatii pecce ɗiɗi. 39 Hooreejo soogeeji *Rooma darinooɗo yeeso Iisa oon hi'i no Iisa acciri duuniyaaru. Nden o wi'i :

—Sikka fuu walaa, neɗɗo oo no *Ɓii-Alla !

40 Rewɓe gom toowti ɗon seɗɗa, ndarii no ndaara. Nder maɓɓe no tawa : Mariyaama mo Magdaala, Salome he Mariyaama inna Yoses he Yakuuba inndirteeɗo Pamarel. 41 Rewɓe ɓee, tokkunoo Iisa no ngollana mo, wakkati o wonnoo Galili. Rewɓe heewɓe gom duu, yaadunooɓe he makko *Ursaliima no ngonnoo ɗon.

42 Hiiri, fotodiri he jemma *nyalaane fowteteene, himɓe no ciryanoo juulɗe ɗeen. 43 Sey Yusufu mo Arimatiya, tawaaɗo nder hawriine dawrooɓe, neɗɗo non kettinanteeɗo sanne nder mayre, keɗiiɗo banngol Laamu Alla. O hulaay fuu yahde to Pilaatus ngam ŋaaraade mo ɓanndu Iisa.

44 Wakkati Pilaatus nanunoo ko Iisa ɓooyaay dow *bardugal ngal ko maayi, ɗum haaynii mo. Nden o noddi mawɗo soogeeji *Rooma, o ƴami ɗum se goonga fuu Iisa maayi. 45 Wakkati mawɗo soogeeji ɗiin haalannoo mo ɗum, o hokki Yusufu laawol hooƴa ɓanndu Iisa.

46 Yusufu soodi kasanke, jippini ɓanndu Iisa, waɗi ndu kasanke. O watti mo nder annyeere seɓaane nder tepaare. Gaɗa mum, o waɗi kaaƴa mannga gom tallitaa, dammbugal annyeere ndeen uddaa. 47 Mariyaama mo Magdaala e Mariyaama inna Yoses ngi'ii to Iisa wattaa.