1 Iisa naati Yeriko, no feera siire ndeen yahde. 2 Jakayus, hooreejo *jaɓooɓe janngal, gorko diikuɗo no tawaa nder Yeriko. 3 Jakayus no tefa hi'ude nder jama'aare ndeen moy woni Iisa, amma o heppi ngam o daɓɓo. 4 Nden, ngam hi'ude mo, sey o doggi, o arditii jama'aare ndeen. O yehi, o ƴeenyowi ibbi ngonki dow laawol to Iisa wittortoo. 5 Wakkati Iisa yottinoo ibbi kiin o tiggitii, sey o wi'i Jakayus :

—Jakayus, yawɗa jippa, ngam no tilsi mi weerane hannden.

6 Jakayus yaawɗi jippii, jaɓɓorii mo welwelo. 7 Wakkati himɓe fuu ngi'unoo ɗum, ɓe puɗɗi iɓe nguuntoo, iɓe mbi'a :

—O weeranowi gaɗoowo hakke !

8 Wakkati ɓe ngari ɓe mbeeri, sey Jakayus ummii darii, wi'i Iisa :

—Moodibbo, hettina. Hannden mi hokkan talkaaɓe feccere njawdi am fuu. Nde mi nyaami ceede goɗɗo, mi yoɓitan mo kile nay.

9 Sey Iisa wi'i :

—Gorko oo duu, taanu *Ibrahim non. Hannden, kisinam naatii nder hoggo ngoo, 10 ngam *Ɓii-Neɗɗo wari tefude majjuɓe faa hisina ɓe.

11 Wakkati himɓe ngonnoo no kettinii haala Iisa, sey o waɗani ɓe kippol haala ngool ngam ɓe ɓadake *Ursaliima, iɓe miila ko Laamu Alla no wanngan jooni jooni. 12 Nder kippol haala ngool Iisa wi'i ɓe :

—Dimo mawɗo gom yehi nder leydi mboɗɗuni gom faa mellee laamiiɗo mayri, nden warta. 13 Fadde makko dillude, o noddi gollooɓe makko sappo gom. O hokki gooto maɓɓe fuu tammal kanŋe, o wi'i ɓe : « Luumoree ɗe, faa mi warta. » 14 Himɓe leydi makko no mbanyi mo. Ngam majjum waɗi, gaɗa makko ɓe ummini lilaaɓe mbi'owa kam'en ngiɗaa gorko oo laamoo ɗum'en. 15 Amma ɗum fuu haɗaay o mellaa, o warti nder leydi makko.

Wakkati o wartunoo, o noddi gollooɓe makko, ɓe o halfinnoo tammaaje kanŋe ɓeen, ngam o annda ko gooto maɓɓe fuu heɓi nder luumaaku mum. 16 Arano oon wari, wi'i : « Joomam, tammal kanŋe maa rimi tammaaje kanŋe sappo. » 17 Sey o wi'i mo : « Gasii, a golloowo lobbo. Ngam a hilnake ko famɗi, mi mellii ma laamiiɗo gure sappo. » 18 Ɗiɗaɓo oon ɓadii, wi'i : « Joomam, tammal kanŋe maa rimi tammaaje kanŋe joy. » 19 O wi'i ɗiɗaɓo oon : « Gasii, aan duu, mi mellii ma laamiiɗo gure joy. »

20 Tataɓo oon wari, wi'i : « Joomam, ndaa tammal kanŋe maa nii. Mi fiɓii ngal nder tekkere mi suuɗi. 21 Ngam miɗo hule, sabu a gorko cattuɗo. Aɗa hooƴa ko a resaay. Aɗa hetta ko a aawaay. »

22 Nden gorko diikuɗo oon wi'i mo : « Bonɗo, jaayɗo ! Dara ! Dow haalaaji maa ɗii kiitanmaami. Aɗa anndi ko mi gorko cattuɗo, miɗo hooƴa ko mi resaay, miɗo hetta ko mi aawaay ? 23 Too, ɗume waɗi ko a wattaay ceede am nder banki faa nde ngartumi, nden ɗe ngaddanan kam riiba ? »

24 Nden o wi'i gollooɓe makko ɓeeto : « Teetee tammal kanŋe makko ngaal, kokkon ngal jom tammaaje sappo oon. » 25 Sey ɓe njaabii mo ɓe mbi'i : « Alla sabbinane, mo mbi'uɗaa hokkee oo duu tammaaje kanŋe sappo jogii ! » 26 Sey mawɗo oon wi'i ɓe : « Miɗo haalana on, jogiiɗo fuu ɓeydantee. Amma mo walaa oon, baa seɗɗa mo jogii oon, teetetee. 27 Jooni toy wayɓe am ɓe ngiɗaa mi laamoo ɗum'en ɓeen ngoni ? Ngaddee ɓe ɗo, kirson ɓe yeeso am. »

28 Gaɗa kippol haalaaji ɗii, Iisa ardii *aahiiɓe mum, fa'i *Ursaliima. 29 Wakkati o ɓadinoo nguroy Baytifaaji e Baytaniya hedde har waamnde wi'eteene waamnde Jaytun, sey o lili *aahiiɓe makko ɗiɗo gom, 30 o wi'i ɓe :

—Ummee, njehee nder wurel gonngel yeeso mooɗon ngeel. No nattirɗon nder maggel, on tawan ɓinngel ara gom, ngel waɗɗaaka abada gom no haɓɓii. Kaɓɓitee ngel, ngaddanon kam. 31 Nde nii goɗɗo ƴamii on, wi'i ngam ɗume waɗi oɗon kaɓɓita ngel, mbi'on Joomiraawo haajaa ngel.

32 *Lilaaɓe ɓeen njehi, tawi huune fuu hano no Iisa tinndiniri ɓe ɗum. 33 Wakkati ɓe kaɓɓitannoo arel ngel, sey joomiingel wi'i ɓe :

—Ɗume kaɓɓitanton arel ngeel ?

34 Ɓe mbi'i mo :

—Joomiraawo haajaa ngel.

35 Nden ɓe njaari ngel to Iisa. Ɓe njowi kolte maɓɓe dow maggel ɓe ngaɗi jappe, ɓe nanngani Iisa waɗɗii dow maggel. 36 Omo yaha, himɓe no mbeɗɗita kolte mum'en dow laawol makko. 37 Wakkati o faani *Ursaliima, ɗoon hadde simmitorde waamnde wi'eteene waamnde Jaytun, goonɗinɓe tokkuɓe mo fuu keewi welwelo, sey ɓe towni daaɗe, iɓe njetta Alla daliila kujje kaayɗiniiɗe ɗe ɓe ngi'ii. 38 Iɓe mbi'a :

—Barkinaaɗo woni laamiiɗo gardoowo innde Joomiraawo !* 19.38 Jabuura 118.26 Jam laatoo nder kammu. Teddungal laatanoo Alla Toowɗo !

39 Sey *Fariisa'en gom tawaaɓe nder jama'aare ndeen mbi'i mo :

—Moodibbo, haja *aahiiɓe maa ndeƴƴa !

40 O jaabii ɓe, o wi'i :

—Miɗo haalana on, nde ɓe ndeƴƴi, kaaƴe ɗee e ko'e mum'en kuuɓan !

41 Wakkati Iisa hi'unoo huɓeere *Ursaliima, o woyani nde, 42 o wi'i :

—Mi hiɗiino tawee hannden, aan duu, a faami ko hokkete jam. Amma kaari, ɗum suuɗanake gite maaɗa ! 43 Nyalaaɗe no ngaran nde wayɓe maa nyiɓata cuuɗi loope ngam ɓe ƴeenya ɓe piile, ɓe kone, 44 ɓe pusee, ɓe accataa baa hayre worre no deki dow wonnde nder maaɗa. Ɓe mbare, aan e ɓiɓɓe maaɗa fuu, ngam a annditaay wakkati mo Alla warunoo ngam hisinde ma.

45 Iisa naati jawreeru *Juulirde mawne, fuɗɗi no riiwa sonnooɓe, 46 no wi'a ɓe :

—Ɗum winndaama nder dewte Alla : Suudu am laatoto suudu du'aa'u. Amma onon, on ngaɗii ndu wumpere wuyɓe  !† 19.46 Esaaya 56.7 ; Yeremiya 7.11

47 Iisa no waajoo nyannde fuu nder *Juulirde mawne. Mawɓe *cakkanooɓe Alla e jannginooɓe *Tawreeta e haalooɓe nanee nder lenyol ngool fuu no ndaara no mbardata Iisa. 48 Amma ɓe keppi heɓude laawol fuu, ngam himɓe fuu no ngattani haalaaji makko hakkillo sanne.