1 ไมจ เปอะ ลืลาว พะจาว. โอ รพาวม รโม่ยฮ อาึ, ไมจ เนอึม เปอะ ลืลาว พะจาว. 2 ติ เจน ไอม ลั่ง เงอะ เฮี, อาึ ซ ลืลาว เยอะ พะจาว. ติ เจน ไก ลั่ง จีวิต เตอะ เฮี, อาึ ซ ทไว รซอม เชีย ลืลาว ละ พะจาว ยุฮ แตะ.

3 ปุ อาึง รพาวม เปอะ นึง โม จาวไน. ปุ โรฮ อาึง รพาวม เปอะ นึง ปุย ปลัฮเตะ, นึง โอ อื ไก ตอก เกียฮ เรอึม เปอะ. 4 ปุย ปลัฮเตะ เฮี ดัฮ เอีจ ยุม โฮ, ลอต แม แปน เตะ รกาื ตอก ไพรม แตะ. ซเงะ ยุม อื เซ, แพนกัน ป ตะ อื ยุฮ ฮู ลอยจ ไฆร เยือ โรฮ ไอฮ พาวม แตะ.

5 ปุย เมาะ ป เกือฮ พะจาว ทื ยาโคป แปน ป เรอึม แตะ, โฮลฮ เนอึม รพาวม ไมจ มวน แตะ เบือ อื. ปุย ตอก เซ มัฮ เกือฮ อื ติ แตะ ซโอว พาวม ไม่ พะจาว ยุฮ แตะ โน่ง. 6 พะจาว เซ เอีจ มัฮ ป ยุฮ ปลัฮเตะ, ปลัฮ มะลอง, ไม่ ปลัฮ รอาวม. ยุฮ โรฮ อื ไม่ โอเอีฮ ป ไก นึง อื เตือง โอยจ อื. มัฮ ป เนอึม ลอป รพาวม โอ เญาะ ไก ลอยจ. 7 พะจาว รเตีฮ โอเอีฮ ละ โม ป ลอก กัน โคมเฮง ปุย แตะ ตัม ซื ตัม ไซ อื. ละ โม ป วิต โซม ม่อยญ จัน เนอ, เอีจ เกือฮ โรฮ ป โซม ป ปอน ละ อื ปอ ซัก อื. โม ป คัง ปุย อื โตะ คอก เกอ, พะจาว เอีจ พลวย อื เกือฮ โอก ซไบ่. 8 โม ป จัก เอีจ เกือฮ อื เกียฮ ยุ โอเอีฮ. โม ป เอีจ ฆลาื ลบุ่ฮ อื เกือฮ โกฮ. โม ปุย ซื ปุย ไซ เยอ, พะจาว ฮรัก เนอึม อื. 9  พะจาว แลน แก โรฮ โม ป มัฮ ปุย ตังเมือง ตังด่าว โรฮ. เรอึม โรฮ โม กวน ดอย ม่อย เบีย, ไม่ โม แมฮัง แมไม โรฮ. พะจาว ปังเมอ ซ ยุฮ ไลจ ไม่ แพนกัน ยุฮ ปุย ฆอก ปุย เบร.

10 มัฮ พะจาว ป แปน ลอป กซัต โอ เญาะ ไก ลอยจ เจอ. โอ เมือง ซีโยน, พะจาว ยุฮ เปอะ ซ ตัตเตียง ลอป ปุย โครยญ เจน ปุย โอ เญาะ ไก ลอยจ.

ไมจ เปอะ ลืลาว พะจาว.