1 เญือม เอีจ ฟวยจ ยุฮ ฮุ ฆรุง เวียง เซ, อาึ ดุฮ รเวือะ ฆรุง เซ เตือง โอยจ อื. ดุฮ โรฮ ปุย ละ ซ แปน อื ป มอง โตะ รเวือะ, ไม่ โม ป เชีย, ไม่ โม เลวี ละ ซ เกือฮ ยุฮ กัน ตัม กัน ลัง ยุฮ อื. 2 อาึ ดุฮ โรฮ ปรเมะ ลอา ปุย แปน ป ตัตเตียง เยรูซาเลม, มัฮ ฮานานี ป มัฮ เอียกปุ อาึ, ไม่ ฮานันยา ป มัฮ ฮัวนา นึง ปอม ตฮัน เซ. ฮานันยา เซ มัฮ ปุย เนอึม รพาวม, ไม่ มัฮ อื ปุย นัปทื เนอึม พะจาว โฮฮ ฮา ปุย ไฮญ. 3 อาึ อัฮ ละ ปุย ลอา เซ ตอก เฮี, “ปุ เกือฮ รเวือะ ฆรุง เวียง เยรูซาเลม เซ โบฮ กา เฆียง โซะ กอยจ. เมือ กปู อื ไมจ โรฮ เปอะ ซอง รเวือะ เซ ไม่ ดุฮ เปอะ ควน ซแก อื กา เฆียง โอก เอีญ โม ป มอง ญัม เซ. ไมจ โรฮ เปอะ ดุฮ อาึง ปุย ไน เวียง เยรูซาเลม เกือฮ แปน ป มอง ญัม ไน เวียง เซ เลี่ป อื. เกือฮ อาวต นึง นาตี ลัง อาวต แตะ ง่อน, เกือฮ มอง ญัม นึง โบ เญือะ โกะ แตะ ไอฮ ง่อน,” อัฮ เซ ละ.

4 เวียง เยรูซาเลม เซ มัฮ เมือง ระ เมือง เวือฮ. ปุย อาวต นึง อื ปังเมอ รมัฮ. ป เอีจ โฮลฮ ยุฮ เญือะ ม่า แตะ นึง อื ปุ โรฮ ดิ โฮวน.

5 เญือม เซ พะจาว โบว รพาวม อาึ เกือฮ อาึ กอก ปุย โพรม. ป กอก เกอะ เซ มัฮ โม ฮัวนา ปุย, ไม่ โม จาว นาที, ไม่ โม ลัปซด่อน นึง อื, ละ ซ เกือฮ โฮลฮ โจต เซน แตะ ตัม จัตเจือ แตะ ไอฮ โครยญ โฆะ อื. เญือม เซ อาึ ยุ นังซื ควน โจต ปุย มอยฮ ปุย นึง, มัฮ มอยฮ โม ป เอีญ โฮน รกา นึง อื. นังซื เซ ไซฮ ปุย อาึง ตอก เฮี.

6 โม เฮี มัฮ โม ป เอีญ เน่อึม แปน แตะ ครา นึง เมือง บ่าบี่โลน, เอีญ ฮอยจ นึง เวียง เยรูซาเลม ไม่ เมือง ยูด่า. ลอต อาวต นึง ย่วง โกะ แตะ ไอฮ เตือง ไพ เตือง มัน. จัตเจือ อื เอีจ โฮลฮ แปน ครา นึง เมือง บ่าบี่โลน เซ, เน่อึม เญือม โฮมวต กซัต เนบู่คัตเนซา โรวก โฮ. 7 ป มัฮ ฮัวนา โม เซ มัฮ เซรูบ่าเบ่น, เยชูอา, เนฮะมี, อาซาริยา, ราอามิยา, นาฮะมานี, มอเด่ไค, บิ่นชัน, มิตเปเรต, บิ่กไว, เนฮุม, ไม่ บ่าอานา.

8-25 โม เฮี มัฮ มอยฮ โม อิซราเอน ป เอีญ เน่อึม แปน แตะ ครา ไม่ เมาะ ไก เซน อื ตัม ซฆลาวม อื เตือง ไพ เตือง มัน.

26-38 โม จัตเจือ ปุย อาวต ย่วง โม เฮี เอีญ โรฮ ไม่ อื.

39-42 มอยฮ ปุย โม เฮี มัฮ มอยฮ ซฆลาวม โม ซตุ ป เอีญ เน่อึม แปน แตะ ครา เซ.

43-45 ป เอีญ เน่อึม แปน แตะ ครา เซ ป มัฮ โม เลวี นึง อื มัฮ ตอก เฮี,

46-56 ป เอีญ เน่อึม แปน แตะ ครา เซ ป มัฮ ป รซอฮ นึง วิฮัน นึง อื มัฮ ซฆลาวม ปุย โม เฮี,

57-59 โม กวนไจ ซาโลมอน ป เอีญ เน่อึม แปน แตะ ครา เซ มัฮ ตอก เฮี, มัฮ ซฆลาวม โซไท, โซเฟเรต, เปรีด่า, ยาอาลา, ด่ารโคน, กิตเด่น, เชฟาทิยา, ฮัตทิน, โปเคเรต-ฮัตซาบ่าอิม, ไม่ ซฆลาวม อาโมน.

60 โม ป ลัง ยุฮ กัน นึง วิฮัน ไม่ โม กวนไจ กซัต ซาโลมอน เซ ไก 392 ปุย.

61-62 โนก ฮา เซ ไก แม ปุย 642 ปุย, มัฮ ปุย ไน ซฆลาวม เด่ลายา, โทบี่อา, ไม่ เนโคด่า. มัฮ ป ฮอยจ เน่อึม ย่วง เทนเมลา, เทนฮันชา, เครุป, อัตโด่น, ไม่ อิมเมอ, ปังเมอ โอ ปุย ยุง ที มัฮ อื โม อิซราเอน ไม่ โอ อื มัฮ.

63-64 ป มัฮ ซฆลาวม โม ซตุ ป โอ อื ไก มอยฮ นึง นังซื โจต ปุย อาึง มอยฮ ปุย นึง อื เซ มัฮ ซฆลาวม ปุย โม เฮี. มัฮ โฮบ่ายา, ฮักโคต, ไม่ บ่าซีไล. จัตเจือ ไพรม ซตุ บ่าซีไล เซ ติ ปุย เยอ, เอีจ ไอฮ กวน รโปวน ซฆลาวม บ่าซีไล ปุย กิเลอัต เซ แปน ปุย เญือะ แตะ, ลอต เอิน เมีญ จัตเจือ แตะ ตัม มอยฮ โปะ แตะ เซ. ปุย โม เซ โฮลฮ ปุย ตัต มอยฮ อื โอก ฮา โม ซตุ เซ, นึง โอ ปุย แจง แน นึง มัฮ อื จัตเจือ โม ซตุ. ลอต เอิน ปุย เมีญ มัฮ ปุย ทัมมด่า ฆาื อื. 65 เญือม เซ ป มัฮ จาวเมือง ยุฮ โม ยิว เซ อัฮ เฮี ละ อื, “ปุย โม เฮี เกียฮ โซม ปอน โตว โอเอีฮ ทไว ปุย ละ พะจาว, ไน ติ เจน กา เฆียง ไฮมญ โม ซตุ โอเอีฮ ละ อื นึง อุริม ไม่ ทุมิม เซ,” อัฮ เซ.

66-69 เซน ปุย ป เอีญ เน่อึม แปน แตะ ครา เซ เตือง โอยจ อื ไก 42,360 ปุย. มัฮ โม กวนไจ รเมะ กวนไจ รโปวน 7,337 ปุย. ป มัฮ โม นักโด่นตรี เตือง ปรเมะ ปรโปวน อื ไก 245 ปุย. บรอง ยุฮ อื ไก 736 ตัว. ลอ ยุฮ อื ไก 245 ตัว. อุต ยุฮ อื ไก 435 ตัว. บรัง ยุฮ อื ไก 6,720 ตัว.

70-72 ไก โฮวน ปุย ป ทไว ไคร มาื ละ เฌาะ ยุฮ ปุย วิฮัน เซ. ป มัฮ จาวเมือง เซ เรอึม อื นึง ไคร ติ เปือน เลียน ด่าริก ไม่ เชือม โบลง 50 ไบ่, ไม่ ลปิ โม ซตุ เซ 530 ปลัฮ.

ป มัฮ ฮัวนา ไน ซฆลาวม อาวต อื เซ ง่อน อื ทไว ไคร ยุฮ แตะ ละ อื 20,000 เลียน ด่าริก. มัฮ แม มาื นัมนัก พามัน เมาะ 1,500 กิโลกรัม.

โม ปุย ไฮญ นึง อื เกือฮ โรฮ ไคร 20,000 เลียน ด่าริก. มัฮ แม มาื นัมนัก พามัน เมาะ 1,300 กิโลกรัม. มัฮ แม ลปิ โม ซตุ 67 ปลัฮ.

73 เญือม เซ ป มัฮ โม ซตุ ไม่ โม เลวี, โม ป มอง ญัม, โม นัก โด่นตรี, โม ป ยุฮ กัน นึง วิฮัน เซ, ไม่ โม ลัปซด่อน เมาะ ป มัฮ โม อิซราเอน เตือง โอยจ อื, ลอต ยุฮ เญือะ อาวต คราว โซม แตะ นึง เมือง ยูด่า เซ, เตือง ย่วง ระ ย่วง แตวะ นึง อื.