1 เญือม เอีจ ฟวยจ ละ เอะ โม เซ เยอ, เอะ บุก ปุ โฮว ซปาว รอาวม โฮว ซื ฮอยจ นึง เกาะ โคต. ติ ซเงะ อื แม โฮว ฮอยจ นึง เกาะ โรต. เญือม เอีจ โอก เอะ เน่อึม นา เซ เยอ, โฮว ฮอยจ นึง ย่วง พาทารา. 2 เญือม เอีจ ฮอยจ เจอะ นึง ย่วง เซ เยอ, เอะ รโตฮ ยุ ซปาว รอาวม ติ ลัม ป ซ โฮว ฮอยจ เมือง ฟีนิเซีย, เอะ บุก แม ปุ โฮว ซปาว เซ. 3 เญือม เอีจ ฮอยจ เจอะ นา ก ชวน แตะ เกาะ ไซปรัต เตอ, เอะ เวีย เกาะ เซ ลวง วิ แตะ, ลอต ฮอยจ นึง จังวัต ซีเรีย. เญือม เอีจ ฮอยจ เจอะ นึง ย่วง ไทระ เยอ, ซปาว จอต นา เซ ละ ซ ตัฮ อื ป ตัง แตะ. เอะ เลีฮ นา เซ. 4 ฟวยจ เซ เอะ ซาวป ยุ โม ลุกซิก, อาวต ไม่ นา เซ อาแลฮ ซเงะ. โม เซ ริ คัต ปาวโล เบือ ลปุ พะจาว เกือฮ โอ ฮาวก เวียง เยรูซาเลม. 5 เญือม เอีจ ไก อื อาแลฮ ซเงะ เอ, เอะ โอก โฮว ฮา นา เซ. โม เซ ตาว เอะ นึง คระ ซ โฮว เยอะ ฮอยจ ก พริ ย่วง, เตือง ปุย เญือะ ไม่ กวน ไม่ เฌือต อื เตือง โอยจ อื. เอะ ชุง นึง มะฆราวง แตะ นึง เฆียง รอง ปลัฮ รอาวม เซ, ไววอน เนอะ เตือง โอยจ แตะ. ฟวยจ เซ ละ ปุ แตะ. 6 เอะ ฮาวก นึง ซปาว. โม เซ เอีญ นึง เญือะ แตะ เตือง ไพ เตือง มัน.

7 ฟวยจ เซ เอะ บุก ปุ โฮว ซปาว รอาวม เน่อึม นึง ย่วง ไทระ ฮอยจ นึง ย่วง ทอเลมี. เอะ โฮว เคะ โม เอียกปุ แตะ ไน พะจาว นา เซ. อาวต ไม่ ติ ซเงะ. 8 ปวยฮ พริ เซ, เอะ โฮว เยอะ ฮา, โฮว ฮอยจ นึง เวียง ซีซาเรยา. เอะ ฮาวก เญือะ ฟีลิป ป มัฮ ป ครอฮ ไลลวง พะจาว, มัฮ ปุย ไน อาแลฮ ป เลือก ปุย แปน ป เรอึม โม ไกญ กอ นึง เวียง เยรูซาเลม โฮ. 9 ฟีลิป เซ ไก กวน เครีฮ ปาวน ปุย. เกียฮ ซึป ลปุง พะจาว เตือง ปาวน แตะ.

10 เญือม เอีจ เลี่ญ บุย โรฮ อาวต เอะ นา เซ, ฮอยจ ป ซึป ลปุง พะจาว เน่อึม นึง จังวัต ยูเดี่ย ติ ปุย. มอยฮ อื มัฮ อากาโบ่. 11 เลียก เคะ เอะ, ตุย โม่ะฮุต ปาวโล. ปุก เตะ ชวง โกะ แตะ นึง อื. อัฮ เฮี ไม่ อื, “โม ยิว นึง เวียง เยรูซาเลม ซ ปุก โรฮ กุม โม่ะฮุต เฮี ตอก เฮี, ซ มอป อื ละ ปุย ตัง เมือง, อัฮ เซ เนิ ลปุ พะจาว.”

12 เอะ ไม่ ป อาวต นา เซ เญือม ฮมอง อัฮ อากาโบ่ โอเอีฮ ไล เซ เยอ, ซตอก ปาวโล โอ ฮาวก นึง เวียง เยรูซาเลม ฆาื. 13 ปาวโล โลยฮ อื, “เมอยุ เยือม เปอะ โม เปะ เอ, เกือฮ โน่ง เปอะ อาึ โซะ รพาวม เมอ? อาึ มัฮ โตว เตม รพาวม ละ ซ เกือฮ แตะ ปุย ปุก แตะ นึง เฮลีจ ติ คระ โน่ง. ปุน ยุม โรฮ โฮะ นึง เวียง เยรูซาเลม เบือ พะโองจาว ป มัฮ พะเยซู เซ โรฮ,” อัฮ เซ ปาวโล เยอ. 14 เญือม โอ ปาวโล ฆวต เนอึง ป อัฮ เอะ ละ แตะ, เอะ เอ เคราะ เอิน เนอะ ป อัฮ แตะ ฆาื อื, อัฮ เฮี, “เกือฮ มัฮ ตัม รพาวม พะจาว,” อัฮ เซ.

15 เญือม เอีจ เลี่ญ บุย อาวต เตอะ นา เซ, เอะ แฮรป เตียป เครอึง แตะ ละ ซ ฮาวก แตะ นึง เวียง เยรูซาเลม. 16 โม ลุกซิก เวียง ซีซาเรยา เซ โฮว โรฮ ไม่ เอะ ง่อน. โม เซ ตาว เอะ โฮว เคะ เญือะ มนาซัน, เกือฮ เอะ ฮาวก เญือะ เซ. มนาซัน เซ มัฮ ปุย เมือง ไซปรัต ไพรม อื. มัฮ ลุกซิก ป เอีจ เลี่ญ เจือ.

17 เญือม เอีจ ฮอยจ เอะ นึง เวียง เยรูซาเลม เมอ, โม เอียกปุ ไน พะจาว รโนฮ รชึง เอะ ไม่ ไมจ มวน รพาวม แตะ. 18 ปวยฮ พริ เซ เอะ ไม่ ปาวโล โฮว เลีม เคะ ยาโคโบ่. โม ป กวต ไน คริตซจัก รเจอึม อาวต นา เซ เตือง โอยจ แตะ. 19 เญือม เอีจ ฟวยจ ไฮมญ ปาวโล กอ บาึง อื, รโฮงะ กัน เกือฮ พะจาว แตะ ยุฮ ลลาึง ปุย ตังเมือง ละ โม เซ แปน ไล อื.

20 เญือม เอีจ ฮมอง อื ไล เซ เยอ, ลืลาว เอิน พะจาว ฆาื อื โม เซ. อัฮ เฮี ละ ปาวโล, “เอียก, ปะ ตึน ซ เอีจ ยุง เปอะ ไก ป เจือ พะเยซู ลลาึง โม ยิว โฮวน เปือน ปุย เยอ. โม เซ เรียง รพาวม ละ ซ ยุฮ แตะ ตัม โกตไม ยุฮ ไอ โมเซ เตือง โอยจ แตะ. 21 โม เซ เอีจ ฮมอง อัฮ ปุย ปะ เพอึก ตอม โม ยิว ป อาวต ลลาึง ปุย ตัง เมือง, อัฮ ปะ ดวน อื ละ โปวฮ ป ไซฮ ไอ โมเซ อาึง เตือง โอยจ อื, ไม่ อัฮ เปอะ กวน อื โอ ลัมเปิง ไอฮ ริตกิต, ไม่ เกือฮ เปอะ ปุย โอ เญือะ ยุฮ ตัม ปซี ปซา ยุฮ โม ยิว, อัฮ เซ. 22 ไมจ เอะ ยุฮ ฆาื อื ตอก เมอ? โม เซ ตึน ซ ฮมอง อื ฮอยจ ปะ อา. 23 ไมจ เปอะ ยุฮ ตอก อัฮ เอะ อื ละ แตะ. นา เฮี ไก ปาวน ปุย ป เอีจ ซันญา อาึง โอเอีฮ ละ โกะ แตะ. 24 ไมจ เปอะ ยุฮ ดิ ไม่ อื ตัม ปซี ปซา เกือฮ อื ติ แตะ ซง่ะ. ไมจ เปอะ กัฮ งวยฮ โอเอีฮ รโตง อื ไม่ เกือฮ เปอะ คุต ฮาึก แตะ. ดัฮ เปอะ ยุฮ ตอก เซ โม ป เอีจ ฮมอง รโจฮ ปุย เปอะ เซ ตึน ซ ยุง มัฮ อื ป โอ เนอึม ป ฮมอง แตะ เซ. ปุย เตือง โอยจ อื ซ ยุง ยุฮ ปะ อื ตัม โกตไม ยุฮ ไอ โมเซ ฆาื อื. 25 ไลลวง ปุย ตังเมือง ป เจือ เซ, มัฮ โน่ง แม ติ ไล. เอะ เอีจ ไซฮ รโปะ นังซื ละ ตัม ป ซิงซา เอะ ไม่ ปุ แตะ. มัฮ ดวน เวีย ปอน แตะ โอเอีฮ ป ตัน ปุย ละ ฮุป, ไม่ เกือฮ อื เวีย ปอน แตะ ฮนัม, ไม่ โอเอีฮ กุน ปุย โงก อื, ไม่ ดวน อื ทอเนาะ ติ แตะ ฮา กัน เลนจุ,” อัฮ เซ ละ ปาวโล โม เซ เยอ.

26 เญือม เซ ปาวโล โรวก ปุย ปาวน เซ โฮว ไม่ แตะ. ปวยฮ พริ เซ เกือฮ เนอึม ติ แตะ ซง่ะ ดิ ไม่ อื ตัม ปซี ปซา อื. เลียก ดิ โตะ วิฮัน ไม่ อื, รโฮงะ อาึง ซเงะ ฟวยจ กัน เกือฮ ติ แตะ ซง่ะ ละ ปุย. มัฮ ซเงะ ซ โรวก อื ทไว โอเอีฮ รโตง ปุย โม เซ เตือง โอยจ แตะ.

27 เญือม เอีจ ซเปี ไคว อื ติ ควป ซเงะ ตอก อัฮ อื เซ, ไก โม ยิว ง่อน ป อาวต จังวัต เอเซีย, ยุ ปาวโล โตะ วิฮัน เซ. เซอึฮ ซุย โม ลัปซด่อน เตือง โอยจ อื เกือฮ อื ฮาวก รพาวม เลียก โฮมวต ปาวโล. 28 อัฮ เฮี นึง ลเลาะ เรียง แตะ, “โม เปะ โม อิซราเอน, เรอึม เอะ เอ. เอีจ มัฮ ปุย เฮี ปุย โฮว ไป โฮว มา โครยญ โดฮ, รชุยจ ปุย เกือฮ อื เกละยุ โม อิซราเอน ไม่ เกือฮ อื พามัต โกตไม ยุฮ พะจาว. เกือฮ โรฮ ปุย พามัต วิฮัน เฮี ไม่ อื. โฮฮ ฮา เซ ปุย เซ เอีจ โรวก แม ปุย ตังเมือง เลียก ไม่ แตะ โตะ วิฮัน เฮี, ป แปน ป รแอม ลัมเลือ ละ วิฮัน เฮี,” อัฮ เซ. 29 มัฮ อัฮ อื ตอก เซ นึง ยุ อื อาวต โตรฟีโม ปุย ย่วง เอเฟโซ ไม่ ปาวโล โตะ เวียง ติ โฮน. มัฮ แกต อื ปาวโล โรวก ปุย เซ เลียก ไม่ แตะ โตะ วิฮัน เซ.

30 ปุย ติ เวียง เซ ซุกซัก เตือง โอยจ แตะ, ตอ โฮว โฮมวต ดิ ปาวโล, บั่ว อื โอก ฮา วิฮัน เซ. ฟวยจ เซ ซอง เอิน รเวือะ วิฮัน. 31 ลไล ซาวป ปุย ยุฮ ยุม ไม่ ปาวโล เยอ, ไก ป รโฮงะ ละ ไนพัน ตฮัน ยุฮ โม โรม ไลลวง ซุกซัก เวียง เยรูซาเลม เตือง เมือง แตะ เซ. 32 เญือม เซ เยอ ไนพัน ตฮัน เซ โรวก โม ตฮัน ไม่ โม ไน ลอยะ ยุฮ แตะ, ตอ เลีฮ เคะ ปุย เตือง โอยจ อื เซ. โม ลัปซด่อน เญือม ยุ อื ฮอยจ ไนพัน ตฮัน เซ ไม่ โม ตฮัน ยุฮ อื, เคราะ เอิน อื ปุฮ แตะ ปาวโล เยอ.

33 ไนพัน เซ เลียก โฮมวต ปาวโล, ดวน ปุย ปุก อาึง อื นึง เฮลีจ ลอา เซน. ฟวยจ เซ ไฮมญ มอยฮ อื ไม่ ป ยุฮ อื. 34 ปุย โฮวน เซ รโอง อัฮ อื ตอก ออฮ ง่อน, อัฮ อื ตอก เอีฮ ง่อน. ไนพัน ยุง ที โตว ตอก มัฮ ตอก มอยฮ อื ฆาื ซุกซัก ลอน ปุย ละ แตะ. ดวน ปุย โรวก ปาวโล ฮอยจ นึง โฮง อาวต ตฮัน ฆาื อื. 35 เญือม เอีจ ฮอยจ อื นึง โบง ก อาวต โม ตฮัน เซ, โม ตฮัน จัมเปน อื ยวก โรวก ปาวโล เกือฮ โปน ฮา ปุย โม เซ นึง เรียง ลอน ฮาวก รพาวม ปุย โฮวน เซ. 36 โม เซ อาื อื, อัฮ เฮี เรียง, “ยุฮ แปฮ ไม่,” อัฮ เซ.

37 เญือม ริ โม ตฮัน ตาว ปาวโล ฮาวก ฮอยจ นึง โฮง อาวต ตฮัน เซ, ปาวโล อัฮ เฮี ละ ไนพัน ตฮัน เซ, “อาึ ปัว อู ไม่ ปะ เญี่ยะ อัม แปน?” อัฮ เซ.

ไนพัน อัฮ เฮี ละ อื, “ปะ อัม เกียฮ ลปุง กริก เปอะ? 38 ปะ โม่ เปอะ มัฮ ปุย เมือง อียิป โฮ, ป นัม นา ปุย ชุ ยุฮ เมือง, ไม่ ตาว เปอะ ปุยไฮะ ปุยฮอน เลียก โตะ ลาึน เวือฮ ปาวน เปือน ปุย โฮ?” อัฮ เซ ละ อื.

39 ปาวโล โลยฮ อื ตอก เฮี, “มัฮ โตว. อาึ มัฮ โม ยิว, มัฮ ปุย เวียง ทารโซ, จังวัต ซิลีเซีย. เวียง เกิต เตอะ เซ มัฮ โตว เวียง แตวะ ไล. ปัว ปะ เกือฮ แตะ ลปุง ไม่ ปุย โฮวน เฮี,” อัฮ เซ ปาวโล.

40 เญือม เอีจ โปง ไนพัน ตฮัน อื อัฮ ฮา, ปาวโล ชุง นึง โบง เซ, ยวก เตะ แตะ ละ ปุย โฮวน เซ เกือฮ โฆย. เญือม เอีจ โฆย ไมจ ปุย โฮวน เซ, ปาวโล อู ไม่ อื นึง ลปุง ฮีบรู แตะ, อัฮ เฮี,