1 ลืลาว พะจาว, ป มัฮ ซโมะ เปิง รอัง เดีย ละ อาึ, ไม่ มัฮ อื ป เพอึก อาึ เกือฮ เกง นึง กัน รุป เซิก. 2 มัฮ ป ฮรัก ไฌม เนอึม อาึ, มัฮ ตอก ปอม ตอน ฮมัน ยุฮ ฮุ. มัฮ โรฮ ตอก ฆรุง ตอน ป โฮลฮ อาึ เปิง, ไม่ มัฮ อื ป เรอึม อาึ. มัฮ โรฮ โล ควน เฆีญ อาึ, ไม่ นา ก โฮลฮ อาึ เปิง. เอีจ มัฮ เนอึม พะจาว ป เกือฮ อาึ โฮลฮ เป ปุย โฮวน ปะเทต เตอ.

3 โอ พะจาว, ปุย ปลัฮเตะ เฮี มัฮ ซัมคัน อื ละ เปอะ ตอก เมอ? เกียฮ โซนไจ บุย เปอะ นึง เมอ? เกียฮ โตก บุย เปอะ ละ เอะ ป มัฮ ปุย ปลัฮเตะ บ่ได่ะ เฮี เมอ? 4 ปุย ปลัฮเตะ เอ มัฮ เยือ ตอก กาื ติ รพาวม โน่ง. ซเงะ เคิ เนอึม ยุฮ อื มัฮ ตอก ปุโรม ป อาวต ติ เตะ โน่ง.

5 โอ พะจาว, ปัว เปอะ โปฮ มะลอง ไม่ เลีฮ เปอะ นึง ปลัฮเตะ เฮี. ปัว เปอะ เลีฮ ลอก บลาวง โฮวน โดฮ เซ, เกือฮ เอิน ม่าึต งอ โอก นึง. 6 เกือฮ ปลุกปลัก ยุฮ เปอะ ฮอยจ ละ โม ป ตอซู ไม่ เปอะ เซ, ปอ แตกฟุง อื เอิน. เกือฮ ตี ทนู ยุฮ เปอะ ฮอยจ ละ ปอ เฮียไฮ เอิน อื. 7 ปัว เปอะ ซนาว เตะ แตะ เน่อึม ก ฮลาวง อื, ไม่ เรอึม เปอะ อาึ เกือฮ โปน ฮา โม ป ฮอยจ ละ อาึ ตอก ฮอยจ รอาวม ระ โฮ. เกือฮ อาึ โปน ฮา โม ปุย ตังเมือง เซ. 8 ปุย โม เซ เยอ, โตะ มวยญ อื นาวก นึง ลปุง โอ เนอึม. ปัง ซันญา ติ แตะ ซ อัฮ ป เนอึม, เกือฮ ลั่ง ติ แตะ นาวก นึง ลปุง จุไล.* 144:8 ตัม ลปุง ฮีบรู อัฮ อื ตอก เฮี, “นึง เตะ ดอม อื นาวก นึง ลปุง จุไล.” เญือม ซันญา โม ฮีบรู โอเอีฮ ไม่ ปุ แตะ กอ ยวก เตะ ดอม แตะ ไม่ อื.

9 โอ พะจาว, อาึ ซ ทไว รซอม เชีย โคระ ละ เปอะ. ซ เตียต โรฮ ละ เปอะ ไม่ พิน กาว โม่ะโรฮ. 10 เอีจ มัฮ ปะ ป เกือฮ โม กซัต โฮลฮ เป เยอ, ไม่ เรอึม เปอะ ด่าวิต ป มัฮ กวนไจ เปอะ เกือฮ โปน ฮา ป โอ ไมจ เจอ. 11 ปัว เปอะ เรอึม อาึ เกือฮ โปน ฮา วิจ ยุฮ โม ป ซวก ป เกละยุ อุ เซ, ไม่ เกือฮ เปอะ อาึ โปน ฮา อัมนัต โม ปุย ตังเมือง เซ. ปุย โม เซ มัฮ ป อัฮ ลปุง โอ เนอึม. ปัง ซันญา ติ แตะ ซ อัฮ ป เนอึม, เกือฮ ลั่ง ติ แตะ นาวก นึง ลปุง จุไล.

12 ปัว เปอะ เกือฮ โม กวน รเมะ โม เอะ แปน ตอก โคะ ป ไกลจ ระ นัน ฮอน เน่อึม เญือม นุม ลั่ง อื. เกือฮ โรฮ โม กวน รโปวน เนอะ ไมจ ตอก ด่อง โช นึง เญือะ ยุฮ กซัต โฮ. 13 ปัว โรฮ เปอะ เกือฮ เกอึม ยุฮ ฮุ นาวก นึง เฮงาะ รโกะ, ไม่ ป ไล ป เพลือะ โครยญ เจือ. เกือฮ โรฮ แกะ นึง กังเด่น ยุฮ ฮุ พรุฮแพร แปน เปือน แปน ฮมาึน อื. 14 ปัว เปอะ เกือฮ โมวก ยุฮ ฮุ กิฮ กวน แตะ โฮวน, ไม่ โอ อื ไก ป ไลจ ป ฮลอ ติ ตื เนอึม. ปัว เปอะ โอ เกือฮ ไก ป เยือม ป โฆว นึง ตัม กอง เมือง อาวต เอะ เฮี.

15 เมือง ป โฮลฮ รัป กุนมุ่น ไมจ ตอก เซ โฮลฮ เนอึม รพาวม ไมจ มวน แตะ เบือ อื. ปะเทต ป มัฮ เยโฮวา พะจาว ยุฮ อื, โฮลฮ เนอึม รพาวม ไมจ มวน แตะ เบือ อื.