1 เญือม เซ พะเยซู รโฮงะ ลปุง ปันฮา ละ อื ติ ไลลวง นึง ซ เกือฮ อื ไววอน ลอป ไม่ โอ อื ซ เกือฮ ชุม รพาวม นึง กัน ไววอน แตะ. 2 อัฮ เฮี ละ อื, “ไพรม อื ไก ย่วง ติ. ไก ป รเตีฮ รตุม โอเอีฮ นึง ติ ปุย. ปุย เซ ฮลัต โตว นึง พะจาว. นัปทื โตว ปุย. 3 ย่วง เซ ไก โรฮ แมฮัง นึง ติ ปุย. ฮอยจ แนฮ เคะ ป รเตีฮ รตุม โอเอีฮ เซ, ปัว อื รเตีฮ โอเอีฮ ละ แตะ ตอก เฮี, ‘ปัว ปะ เรอึม รเตีฮ โอเอีฮ ละ อาึ ไม่ ป บ่วก ละ อาึ เซ ตัม ซื อื,’ อัฮ แนฮ เซ ละ อื.

4 “ป รเตีฮ รตุม เซ เลี่ญ ซ ญอม เรอึม อื. กัง เคะ เอ อัฮ เฮี โตะ รพาวม แตะ, ‘ปัง โอ อาึ ฮลัต นึง พะจาว ไม่ โอ แตะ นัปทื ปุย, 5 จัมเปน อาึ เรอึม รเตีฮ โอเอีฮ ละ แมฮัง เฮี ตัม ซื อื นึง ฮอยจ ซุกซัก ลอป อื กัน อาึ เฮี. เมือต โอ ซ ยุฮ ละ อื ตอก เซ อาึ เอีจ ซ เตือ ซ ออป นึง ฮอยจ ลอป อื เคะ แตะ,’ อัฮ เซ.”

6 พะโองจาว อัฮ แม เฮี ละ ลุกซิก แตะ, “ไมจ เปอะ ง่อต ป อัฮ ป รเตีฮ รตุม บ่วก รพาวม เซ. 7 พะจาว อัม โอ ซ เรอึม รเตีฮ โอเอีฮ ตัม ซื อื ละ ป เอีจ เลือก แตะ, ป กอก ปัว นึง แตะ เตือง ซเง่ะ รซาวม เซ? อัม แกต เปอะ มอง อื เลี่ญ กา ซ เรอึม แตะ? 8 อาึ อัฮ ละ เปอะ ตอก เฮี, พะจาว ซ รเตีฮ เนอึม อื ละ อื ตัม ซื อื. ซ ไกลจ เรอึม อื. ปัง มัฮ ตอก เซ เญือม ซ ฮอยจ แม กวน ปุย ปลัฮเตะ อัม ซ ยุ ไก ลั่ง รพาวม เจือ ปุย นึง ปลัฮเตะ เฮี? อัม โอ ซ ยุ อื?” อัฮ เซ ละ อื พะเยซู.

9 พะเยซู รโฮงะ โรฮ ลปุง ปันฮา เฮี ละ โม ป แกต ติ แตะ ซืไซ ไม่ เพียก แตะ ปุย ไฮญ. 10 อัฮ เฮี ละ อื, “ไก ปุย ลอา ปุย ฮาวก ดิ นึง วิฮัน ละ ซ ไววอน แตะ. ติ ปุย อื มัฮ โม ฟาริซี. ติ อื มัฮ ป เกป พาซี โอเอีฮ. 11 ฟาริซี เซ โกฮ ชุง. ไววอน อู ลอก โกะ แตะ ตอก เฮี, ‘โอ พะจาว, ญันดี่ ไม่ ปะ นึง โอ อาึ ฆอก ไล ตอก ปุย ไฮญ เตือง โอยจ อื. อาึ มัฮ โตว ป ฆวต ไอฮ ลอน. บ่วก โตว. มัฮ โตว ป เลน จุ. อาึ ยุฮ โตว ตอก ยุฮ ปุย ไฮญ อื. อาึ ญันดี่ ไม่ ปะ นึง โอ อาึ ตอก ป เกป พาซี โอเอีฮ เซ. 12 ไน ติ ควป ซเงะ อาึ เออึป ป โซม แตะ ลอา ซเงะ โครยญ ควป. โอเอีฮ โฮลฮ โฮะ กาว ปุน อาึ ทไว เยอะ ติ ปุน โครยญ เจือ,’ อัฮ เซ.

13 “ป เกป พาซี โอเอีฮ เซ ชุง ก ซไง อื. โรวต โตว งัน มะลอง เฟือฮ. ดิฮ รน่าวก แตะ. อัฮ เฮี ไม่ อื, ‘โอ พะจาว, อาึ มัฮ ปุย มั่ป. ปัว ปะ เลียก พาวม นึง แตะ,’ อัฮ เซ.”

14 พะเยซู อัฮ แม เฮี, “อาึ อัฮ ละ เปอะ ตอก เฮี. มัฮ ปุย เกป พาซี นึง อื เซ ป เอีญ ไม่ รพาวม ซืไซ แตะ ละ ง่อต พะจาว อื, มัฮ โตว ปุย ฟาริซี นึง อื. โม ป ทื ติ แตะ ระ จอง ติ แตะ ฮลาวง ซ โฮลฮ แม แปน ปุย ตุ ปุย เตียม ฮา ปุย. โม ป ญอม เกือฮ ติ แตะ ตุเตียม ซ ไก ป วุฮ ระ จอง ฮลาวง,” อัฮ เซ พะเยซู.

15 เญือม เซ ไก โรฮ ง่อน ป ตาว กวนงัก ฮอยจ เคะ พะเยซู นึง ซ เกือฮ อื ย่อง เตะ แตะ ราว อื. โม ลุกซิก อื เญือม ยุ อื ยุฮ โม เซ อื ตอก เซ คัต อื ฆาื อื. 16 พะเยซู ปังเมอ กอก โม กวนดุ เซ เอีญ เคะ แตะ. อัฮ เฮี ละ ปุย, “เกือฮ เอีญ เคะ อาึ เมิฮ โม กวนดุ เซ. ปุ เญือะ คัต เฟือฮ. เอีจ มัฮ ปุย ตอก กวนดุ โม เฮี ป โฮลฮ บั่นเมือง ยุฮ พะจาว แปน คอง แตะ. 17 อาึ อัฮ ละ โม เปะ ตัม เนอึม อื, ป ออฮ ป เอีฮ ญุ่ก ป โอ ญอม ไอฮ ไลลวง บั่นเมือง ยุฮ พะจาว ตอก ไอฮ กวนดุ แตวะ อื, ซ โฮลฮ โตว เลียก นึง บั่นเมือง เซ เฟือฮ,” อัฮ เซ.

18 ไก ป ตัตเตียง โม ยิว ติ ปุย, ไฮมญ พะเยซู ตอก เฮี, “อาจาน, ปะ มัฮ เนอึม เปอะ อาจาน ไมจ. อาึ ซ ไมจ ยุฮ ตอก เมอ เดอึม ซ โฮลฮ จีวิต โอ เญาะ ไก ลอยจ แตะ?” อัฮ เซ ละ อื.

19 พะเยซู โลยฮ อื ละ อื ตอก เฮี, “เมอยุ อัฮ เปอะ ไมจ ละ อาึ อื? ไก โตว ป ไมจ ป ญุ่ก โนก ฮา พะจาว ติ โตน เนอ. 20 ปะ เอีจ ยุง เปอะ ป อัฮ พะจาว อาึง นึง พะทัม ตอก เฮี, ‘ปุ เลน จุ อู. ปุ ยุฮ ยุม ไม่ ปุย. ปุ บระ ปุ ปอก. ปุ แปน พีญัน โอ เนอึม. ไมจ เปอะ นัปทื มะเปือะ แตะ,’ อัฮ เซ. มัฮ เซ ป อัฮ พะจาว อาึง.”

21 ปุย เซ โลยฮ อื ตอก เฮี, “โอเอีฮ โม เซ เตือง โอยจ อื อาึ เอีจ เนอึง โครยญ เจือ เน่อึม เญือม แตวะ แตะ ลั่ง,” อัฮ เซ.

22 พะเยซู เญือม ฮมอง อื ป อัฮ อื เซ อัฮ เฮี ละ อื, “ปะ วิต ลั่ง เปอะ ติ เจือ โน่ง. เมาะ ป ไก ยุฮ เปอะ เซ ไมจ เปอะ โชะ. มาื โฮลฮ เปอะ เซ จัต แม ละ ป ตุก ป ญัก. ดัฮ เปอะ ยุฮ ตอก เซ ปะ ซ พอม ป โฮลฮ เปอะ นึง เมือง มะลอง. ฟวยจ เซ โฮว ฟวต อาึ อื,” อัฮ เซ ละ อื.

23 ปุย เซ เมือต เอีจ ฮมอง โอเอีฮ ตอก เซ, ตุก เนอึม ตุก แนม รพาวม ฆาื อื นึง มัฮ แตะ ปุย โฮวน โอเอีฮ ยุฮ. 24 เญือม ยุ พะเยซู ดักโดวง นา อื ตอก เซ อัฮ เฮี ฆาื อื, “กัน ซ เลียก ปุย กอย นึง บั่นเมือง ยุฮ พะจาว เยอ มัฮ เนอึม ป ญัก. 25 ซ ลอต อุต โตะ ญิ อี, เยือ ลั่ง ฮา ซ เลียก ป กอย นึง บั่นเมือง ยุฮ พะจาว ติ ปุย,” อัฮ เซ.

26 โม ป ฮมอง ป อัฮ อื เซ ไฮมญ อื ฆาื อื ตอก เฮี, “ดัฮ มัฮ ตอก เซ โฮ, มัฮ ปุย ป ซ เกียฮ โปน มั่ป เปอ?” อัฮ เซ.

27 พะเยซู โลยฮ อื ละ อื, “โอเอีฮ ป โอ ปุย เกียฮ ยุฮ, พะจาว เกียฮ ยุฮ อื โครยญ เจือ,” อัฮ เซ.

28 เญือม เซ เปโตร อัฮ เฮี, “เอะ เอีจ ละ เญือะ ละ ม่า แตะ ละ ซ ฟวต แตะ ปะ,” อัฮ เซ ละ อื.

29 พะเยซู อัฮ เฮี ละ อื ฆาื อื, “อาึ อัฮ ละ เปอะ ตัม เนอึม อื, ดัฮ ปุย ละ เญือะ ม่า แตะ, ไม่ ปุย เญือะ แตะ, ไม่ เอียกปุ ตุเจอ แตะ, ไม่ มะเปือะ กวน รนัน แตะ, เบือ บั่นเมือง ยุฮ พะจาว, 30 นึง เจน เฮี ปุย เซ ซ โฮลฮ อื โฮวน ฮา ไพรม แตะ. นึง เจน ลั่กกา อื ซ โฮลฮ จีวิต โอ เญาะ ไก ลอยจ แตะ,” อัฮ เซ ละ ลุกซิก แตะ พะเยซู.

31 พะเยซู บะ โรวก ลุกซิก แตะ เตือง กาว ลอา ปุย อื. อัฮ เฮี ละ อื, “ง่อต แลน. เอะ ซ ฮาวก นึง เวียง เยรูซาเลม. เมาะ ป ไซฮ โม ป ซึป ลปุง พะจาว นึง ไลลวง กวน ปุย ปลัฮเตะ, ซ เกิต เนอึม ละ อื นา เซ โครยญ เจือ ตอก เอีจ อัฮ อื ซ เกิต โฮ. 32 ปุย ซ มอป กวน ปุย ปลัฮเตะ ละ ปุย ตัง เมือง. ปุย ตังเมือง เซ ซ โล่ ญวยฮ อื. ซ เพียก แฮม อื. ซ โดยจ อื. 33 ซ เฟียต ซ ปุฮ อื. ซ ยุฮ ยุม ไม่ อื. ไน ซเงะ ลอวย นึง อื ปังเมอ ซ โกฮ ไอม แม,” อัฮ เซ ละ อื.

34 โม ลุกซิก อื คาว โตว ไจ อื เฟือฮ ป อัฮ อื เซ. ไลลวง เซ ตอก เยือ โอเอีฮ ป เม่าะ ฮา อื โฮ. ยุง โตว ป อัฮ พะเยซู ไม่ ไลลวง เซ.

35 เญือม เอีจ ซดิ ซ ฮอยจ พะเยซู ละ เวียง เยรีโค, ไก ปุย จัก ติ. งาวม โบ คระ ปัว โอเอีฮ นึง ปุย. 36 ปุย เซ เมือต ฮมอง เซียง ปุย โฮวน ป โฮว พา แตะ เซ, ไฮมญ ไลลวง อื นึง ปุย ฆาื อื. 37 ปุย โลยฮ อื ละ อื, “มัฮ โฮว พะเยซู ย่วง นาซาเรต คระ เฮี,” อัฮ เซ ละ อื.

38 ปุย จัก เซ อัฮ เฮี เรียง, “เยซู ป มัฮ จัตเจือ ด่าวิต, ปัว ปะ เลียก พาวม นึง แตะ,” อัฮ เซ.

39 โม ป โฮว รกา เซ คัต อื. ดวน อื อาวต โฆย. ปุย จัก เซ ปังเมอ โฮว ละ อัฮ แตะ เรียง ฮา ไพรม แตะ. “ป มัฮ จัตเจือ ด่าวิต, ปัว ปะ เลียก พาวม นึง แตะ,” อัฮ เซ.

40 พะเยซู ลโล่ะ ชุง ฆาื อื. ดวน ปุย ตาว ป จัก เซ ฮอยจ เคะ แตะ. เญือม เอีจ ฮอยจ อื พะเยซู ไฮมญ อื ตอก เฮี, 41 “เมอ ซ เกือฮ เปอะ อาึ ยุฮ ละ แตะ?” อัฮ เซ ละ อื. ปุย เซ โลยฮ อื ตอก เฮี, “พะโองจาว, ปัว ปะ เกือฮ ไง่ อาึ เกียฮ ยุ โอเอีฮ,” อัฮ เซ ละ พะเยซู.

42 พะเยซู อัฮ เฮี, “เกียฮ ยุ โอเอีฮ ฮี เมิฮ, รพาวม เจือ เปอะ เอีจ เกือฮ ปะ ไฮ,” อัฮ เซ ละ อื. 43 ปุย จัก เซ เกียฮ ยุ เอิน โอเอีฮ จุบั่น เอิน. ลอต เอิน โฮว ฟวต พะเยซู นึง คระ โฮว อื เซ. ญันดี่ ไม่ พะจาว ฆาื อื. โม ลัปซด่อน เมือต ยุ อื ลืลาว โรฮ พะจาว ฆาื อื เตือง โอยจ แตะ.