1 เญือม เซ ปุย ลอวย เซ เญือะ โลยฮ โตว อื ละ โยป, นึง อัฮ แนฮ โยป เซ ติ แตะ โอ พิต. 2 เญือม เซ เอลีฮู ป มัฮ กวน บ่าระเคน อาวต โรฮ นา เซ. เอลีฮู เซ มัฮ โม บุ่ต, จัตเจือ รัม นึง อื. ปุย เซ รอก พาวม นึง โยป. มัฮ ฆาื อัฮ โยป เซ ติ แตะ ปุก ฮา ซ เกือฮ แตะ พะจาว แปน ป ปุก. 3 รอก โรฮ พาวม นึง ปุโฮมว โยป เตือง ลอวย อื เซ, นึง โอ อื เกียฮ โลยฮ ละ โยป. ตอก เอิน พะจาว ป พิต เนอึม ฆาื โฮ. 4 เอลีฮู มอง อื ฮอยจ ละ ฟวยจ อู ปุย ลอวย เซ ฮัม นึง มัฮ แตะ ปุย นุม ฮา ปุย ไฮญ.

5 เญือม ยุ อื โอ ปุย ลอวย เซ เญือะ โลยฮ เฮ, รอก พาวม ฆาื อื. 6 อัฮ เฮี ละ อื, “อาึ มัฮ ป นุม. โม เปะ เอีจ กวต เปอะ. เซ ป โอ อาึ โรวต อัฮ โอเอีฮ ตัม ป แกต โกะ แตะ ฆาื อื. 7 อาึ แกต มัฮ โม เปะ ป ลัง อัฮ ลัง อู โอเอีฮ ฮี. ปุก ละ โม เปะ ป เอีจ กวต โกะ ฮลาวง ไกญ ป ไมจ เพอึก ตอม ปุย ไม่ กัมกึต ไมจ แตะ. 8 ป เกียฮ เกือฮ ปุย ยุง โอเอีฮ ไม่ อาวต อื กไน ปุย เยอ, ปังเมอ มัฮ ลปุ พะจาว ป ตึก นึง ระ อัมนัต แตะ. 9 มัฮ โตว ปุย กวต อาญุ ป เกือฮ ปุย เฮียง เงอ. มัฮ โตว ป เลี่ญ ไอม โน่ง ป ยุง ป ปุก ป ลอก เกอ.

10 “เซ ป ฆวต เกือฮ โม เปะ ง่อต ป อัฮ อาึ เฮี ฆาื อื. เกือฮ อาึ อัฮ แลน ตัม ป คาวไจ แตะ เฮี. 11 อาึ ง่อต ป อัฮ โม เปะ ไม่ รพาวม ลั่ง แตะ. ลไล ง่อต โม เปะ เฮียง แตะ เซ อาึ มอง ง่อต ตอก ซ โลยฮ เปอะ. 12 อาึ ง่อต ที ตอก โอ โม เปะ เกียฮ โจต ลปุง โยป. เกียฮ กัฮ เกียฮ เก เปอะ โตว ป อัฮ อื. 13 โม เปะ เกียฮ อัฮ เปอะ ติ แตะ โฮลฮ กัมกึต ไมจ แตะ ตอก เมอ? มัฮ พะจาว โน่ง ป ไมจ อื เก โยป เปอ. โม เปะ เกียฮ เปอะ โตว. 14 โยป มัฮ อัฮ อื ละ โม เปะ, มัฮ โตว อัฮ อื ละ อาึ. อาึ ปังเมอ โอ ซ โลยฮ ตอก โลยฮ โม เปะ อื,” อัฮ เซ เอลีฮู.

15 เอลีฮู อัฮ แม เฮี, “เอียก โยป, โม เฮี เอีจ ดุต ดัก อื. เญาะ เกียฮ โลยฮ โตว อื ละ เปอะ. 16 เอีจ โฆย เยือ เอิน นึง โอ อื เญือะ ยุง ป ซ อัฮ แตะ. เคียง เมอ โฆย โม เฮี อาึ อัม ซ มอง ลั่ง เงอะ? อาึ เญือะ มอง โตว. 17 อาึ ซ โลยฮ ละ เปอะ ปเลี่ย. ซ อู ละ เปอะ ตัม ป คาวไจ แตะ โตะ รพาวม แตะ. 18 อาึ เญือะ ปุน คัม โตว โอ แตะ อัฮ ฮา. โตะ รพาวม เมอะ นาวก นึง ป ฆวต อัฮ ฆวต อู เยอะ. 19 อาึ ดัฮ โอ โฮลฮ อู ละ เปอะ ตึน ซ ลตุฮ เวียก เกอะ ตอก ปัง ฮัก ลตุฮ นึง รอาวม อะงุน โคระ โฮ. 20 อาึ จัมเปน ไมจ อู ละ เปอะ เดอึม ซ บาึง เนิ. 21 มัฮ โตว พาวม ลั่ก ป ออฮ ป เอีฮ นึง ไล เก เปอะ ปุ แตะ เฮี. อาึ มัฮ โตว ปุย ฮรัก ป ฮรัก จัง ป จัง แตะ. 22 อาึ ดัฮ ลื ญอ ปุย, พะจาว ป ซัง อาึ เกิต ซ เกือฮ อาึ ลอก ตุต ฆาื อื,” อัฮ เซ.