1 เญือม เอีจ โตกโลง ปุย เกือฮ เอะ บุก ปุ โฮว ซปาว รอาวม ฮอยจ นึง เมือง อิตาลี เยอ, โม เซ มอป อาึง ปาวโล ละ ไนลอยะ ตฮัน ติ ปุย ไม่ ป ตุต ไฮญ ง่อน. มอยฮ ไนลอยะ เซ มัฮ ยูเลียต. มัฮ ปุย ไน มู ออกะซตัต ติ ปุย. 2 เอะ ฮาวก นึง ซปาว รอาวม ป ฮอยจ เน่อึม นึง ย่วง อัตรามิตทิยุม. มัฮ ซปาว ป ซ โฮว นึง ย่วง เฆียง ปลัฮ รอาวม โฮวน โดฮ นึง จังวัต เอเซีย. ฟวยจ เซ เอะ โอก โฮว เยอะ. ไก ปุย เวียง เทซะโลนิกา ติ ปุย โฮว โรฮ ไม่ เอะ. มอยฮ อื มัฮ อะริซทาโค, ปุย จังวัต มาซิโด่เนีย.

3 ปวยฮ พริ เซ เอะ จอต นึง ย่วง ไซด่อน. ยูเลียต เลียก พาวม นึง ปาวโล. โปง อื โฮว ลโล่ะ เคะ ปุโฮมว แตะ ย่วง เซ. 4 เอะ บุก แม ปุ โฮว ซปาว เน่อึม นา เซ แม. โฮว เดีย เกาะ ไซปรัต นึง ตัม ลอน กาื ซปาว เซ. 5 เญือม เอีจ โฮว เตือง เงอ ปลัฮ รอาวม ซื นา จังวัต ซีลิเซีย ไม่ จังวัต พัมฟีเลีย, เอะ ฮอยจ นึง ย่วง มิรา จังวัต ลีเซีย. 6 นา เซ ไนลอยะ ตฮัน เซ รโตฮ ยุ ซปาว รอาวม ติ ลัม ป ซ โฮว นึง เมือง อิตาลี. มัฮ ซปาว ฮอยจ เน่อึม เวียง อะเลกซันเด่เรีย. เกือฮ เอะ ฮาวก นึง ซปาว เซ, ไนลอยะ ตฮัน เนอ. 7 ฟวยจ เซ เอะ ไน่ โฮว เยอะ เลี่ญ บุย. ซเปี โอ ฮอยจ ยุฮ แตะ โบ ย่วง คนีโด่. เญือม โอ เญือะ ปุน โฮว คระ เซ นึง ตัม ลอน กาื เยอ, โฮว เดีย เกาะ ครีต ฆาื อื. ฮอยจ ซดิ ไม่ ย่วง ซาละโมเน. 8 ซปาว บุก เอะ เซ ซบวต ปุ โฮว เฆียง รอง ฆาื ญัก คระ โฮว เยอะ. เอะ ฮอยจ แม ติ โดฮ. มอยฮ อื มัฮ ตา ไมจ. ย่วง ลาเซีย อาวต ซดิ ไม่ นา เซ.

9 เอะ อาวต นา เซ เลี่ญ บุย, ฮอยจ ละ โปน ซเงะ เออึป โม ยิว ป โซม แตะ. เอีจ เติง เวลา โอ ปุย ทัน โรวต โฮว, นึง มัฮ อื เวลา ระ กาื. ปาวโล ซตอก รเง่อึม ปุย ฆาื อื. 10 อัฮ เฮี, “ง่อต แลน เมอะ โม เปะ เอ, ดัฮ เอะ ลู แนฮ โฮว โฮ, อาึ เอีจ แจง เนิ ซ ญัก เนอึม ญัก แนม คระ โฮว แตะ ฆาื อื. มัฮ โตว ซ ไลจ ซปาว ไม่ ป ตัง อื โน่ง. มัฮ โรฮ ซ ไลจ ซ โลม เอะ เฮี ฆาื ติ,” อัฮ เซ. 11 ไนลอยะ เซ ฆวต ไอฮ ป อัฮ กุม ซปาว ไม่ ฮัวนา ปุย ไน ซปาว เซ ระ ฮา ไอฮ แตะ ป อัฮ ปาวโล. 12 โฮวน ลั่ก อัฮ แตะ ไมจ โฮว ฮา นา เซ, นึง โอ ก จอต ซปาว เซ มวน อาวต นึง เมือ โฆยญ. ดัฮ แปน โฮ, ตะ โฮว ฮอยจ ย่วง ฟีนิก, ตะ โรฮ อาวต นา เซ ติ เจน เมือ โฆยญ. ย่วง ฟีนิก เซ ตึน มัฮ นา ก กอ จอต ซปาว นึง เกาะ ครีต เซ. นา ก จอต ซปาว เซ นา ซบลัต ลวง ลั่ก เลียก ซเงะ เตือง ก เซฮ ก ล่าวง อื.

13 เญือม ฮอยจ กาื เน่อึม ลั่กเซฮ ละ อื เญี่ยะๆ อา, โม กุม ซปาว แกต ลั่ง ติ แตะ ซ ฮอยจ นา ก ตะ แตะ โฮว เซ. เยียง ซมอ ควน ปุก ซปาว ฆาื อื. ลอต โฮว ซบวต เฆียง รอง เกาะ ครีต. 14 ฟวยจ เซ ติ เตะ โน่ง ฮอยจ แม กาื ระ กาื กอ ละ เน่อึม ลั่ก เกาะ, เรียง เนอึม ปอ ฮลัต ปุย นึง. มัฮ กาื อัฮ ปุย กาื ลั่กล่าวง ลวง โอก ซเงะ ไม่. 15 เญือม เอีจ ฮอยจ กาื ละ ซปาว เซ ปอ โอ ซปาว เญาะ ปุน ตัม, เอะ พลวย เอิน เนอะ ฆาื อื ตัม คระ โฮว กาื. 16 ฟวยจ เซ โฮว ไม่ ซปาว เดีย เกาะ แตวะ ติ. มอยฮ เกาะ เซ มัฮ คาอูด่า. เอะ เรอึม ปุ แตะ ยวก โล่ง แตวะ ปุก ไม่ โล่ง ระ, ปังเมอ ญัก ลัมเลือ ลั่ง เนิ. 17 ฟวยจ ยวก เกอะ โล่ง แตวะ เซ ฮาวก เกอ, โรม แม โล่ง ระ เซ นึง โม่ะ โฮวน เซน, โจก เกือฮ ตอน. เกือฮ โรฮ พากัง อื เลีฮ. พลวย ปอย ไป ปอย มา ไม่ กาื นึง ฮลัต แตะ คัง นึง ไฮมจ โบ เมือง ลิเบี่ย เซ. 18 ปวยฮ พริ เซ, โม เซ ตุย น่าึก ป ตัง ซปาว เซ โตะ รอาวม นึง ระ ลอน ลั่ง กาื ละ. 19 ปวยฮ พริ ติ ซเงะ อื แม, โม เซ ตุย ไอฮ โปวฮ เครอึง อาวต นึง ซปาว. 20 เญือม โอ เยอะ เญาะ โฮลฮ ยุ ซเงะ ไม่ ซโมยญ โฮวน ซเงะ เอ, ไม่ ลอก ลั่ง แตะ กาื ระ อา, เอะ เอีจ ลอน พาวม รกวน นึง ซ โปน แตะ ฮา ยุม เซ.

21 เญือม เอีจ เลี่ญ โอ ปุย โฮลฮ โซม, ปาวโล โกฮ ชุง ลั่กกา ปุย, อัฮ เฮี, “โม เปะ ลัง ง่อต เปอะ ป อัฮ อาึ ละ แตะ เน่อึม เมือ โรง อื. มัฮ ง่อต เปอะ ป อัฮ อาึ ไม่ โอ เปอะ โอก ฮา เกาะ ครีต เซ, ตึน โอ ซ ไก คระ ไลจ คระ โลม เปอะ ตอก เฮี ติ เจือ เนอึม. 22 ปเลี่ย เฮี อาึ อัฮ ละ เปอะ, ทัน โตว ตุก เปละ นัน พาวม. ซ ไลจ โตว ติ ตื เนอึม โกะ เปอะ. ซปาว โน่ง ป ซ ไลจ เจอ. 23 รเอฮ ซาวม อาึ ยุ ฮอยจ เตปด่า เคะ แตะ ติ ปุย. มัฮ เตปด่า ฮอยจ เน่อึม พะจาว กุม อาึ ป รซอฮ อาึ ละ. 24 อัฮ เฮี เนิ, ‘ปาวโล, ปุ ฮลัต. ปะ ไมจ เปอะ ชุง ลั่กกา กซัต ซีซา. พะจาว ซ เกือฮ เปอะ ไอม, เตือง ปะ เตือง ป บุก ดิ ซปาว ไม่ เปอะ เตือง โอยจ อื,’ อัฮ เซ เนิ เตปด่า พะจาว. 25 โม เปะ เอ, ทัน โตว เญาะ ตุก เปละ นัน พาวม ฆาื. อาึ ระ พาวม ไม่ พะจาว นึง ซ แปน เนอึม อื ตอก อัฮ อื เนิ. 26 ปัง มัฮ ตอก เซ, เอะ จัมเปน คัง นึง เกาะ ติ โดฮ,” อัฮ เซ ปาวโล.

27 เญือม เอีจ ไก อื กาว โรฮ ปาวน ซาวม ปอย ไป ปอย มา โล่ง เซ นึง ปลัฮ รอาวม อัตเรีย เซ, เญือม เซ เมาะ ง่อน ซาวม เมอ, โม ป ยุฮ กัน นึง ซปาว แกต ติ แตะ ฮอยจ โบ เฆียง รอง ติ โดฮ. 28 เมือต แนต แลน เมาะ โด่ะ เมาะ ตู รอาวม, ไก ง่า ตอป. ติ เตะ แม เยอ แนต แม อื ติ โฮน, ไก แม กาว โรฮ พอน ตอป แม. 29 ฮอ นึง ซ ตัม อื ซโมะ. โม เซ น่าึก เอิน ซมอ ฆาื อื ปาวน โฆง เน่อึม นึง ซตะ ซปาว เซ, ละ ซ ปุก อื ซปาว เกือฮ อาวต. ฟวยจ เซ รกวน พริ ปวยฮ. 30 โม ป ยุฮ กัน นึง ซปาว เซ ริ บระ เลีฮ ไม่ โล่ง แตวะ เกือฮ ติ แตะ โปน ฮา ซปาว ระ. ฮรังโฮรฮ อื โอก ฮา ซปาว ฮอยจ ละ รอาวม ฆาื อื. เคียต อัฮ ติ แตะ ซ น่าึก แม ซมอ ซปาว เน่อึม นึง ไกญ อื. 31 ปาวโล ปังเมอ อัฮ เอิน อื ละ ไนลอยะ ไม่ โม ตฮัน ฆาื อื, “ดัฮ โม เฮี โอ อาวต โตะ ซปาว ระ โฮ, โม เปะ ไก โตว ตอก ซ ไอม เปอะ,” อัฮ เซ ละ อื. 32 เญือม เซ โม ตฮัน ตอยฮ โม่ะ โล่ง แตวะ เซ ฆาื อื, เกือฮ อื ลอย ไม่ รอาวม.

33 เญือม เอีจ ปวยฮ ซรู ซรี เยอ, ปาวโล ซตอก ปุย โซม เตือง โอยจ แตะ, อัฮ เฮี, “เอีจ ไก กาว โรฮ ปาวน ซเงะ เนาะ เฮี กลาึง รพาวม โม เปะ นึง ป ซ เกิต ละ แตะ. โฮลฮ เปอะ โตว โซม โอเอีฮ ติ เจือ เนอึม. 34 มัฮ เซ ป ฆวต เกือฮ อาึ โม เปะ โซม ฆาื อื ปเลี่ย เฮี, นึง ซ แปน อื จีวิต ละ เปอะ. โม เปะ ไก โตว ติ ปุย เนอึม ป ซ ไลจ นึง อื, ปัง มัฮ ฮาึก ไกญ เปอะ ปุ ซ ไลจ ติ เญียง เนอึม,” อัฮ เซ ละ อื ปาวโล เยอ. 35 เญือม เอีจ ฟวยจ อัฮ อื ตอก เซ เยอ, ตุย คโนมปัง, ไววอน ญันดี่ ไม่ พะจาว ซองนา ปุย เตือง โอยจ อื, ฟวยจ เซ เรียก โซม อื. 36 โม เซ ไมจ มวน รพาวม เบือ อื เตือง โอยจ แตะ. โซม โรฮ อื. 37 เอะ ป อาวต โตะ ซปาว เซ, เมือต เอีจ เมีญ, ไก ลอา รอย ไม่ อาลแฆลฮ โรฮ แลฮ ปุย เตือง โอยจ อื. 38 เญือม เอีจ ซัก โซม อื, น่าึก โปวฮ เฮงาะ รโกะ อาวต นึง ซปาว เซ โตะ ปลัฮ รอาวม ละ ซ เกือฮ แตะ ซปาว เซ ชาวง.

39 เญือม เอีจ ซเปีย อื โม ป ยุฮ กัน นึง ซปาว ยุง โตว ก มัฮ ก มอยฮ ก ซวน แตะ. ซวน ก โบฮ อื ติ โดฮ นึง เฆียง รอง นา ก โฮวน ไฮมจ นึง. โตกโลง ไม่ ปุ แตะ ละ ซ เกือฮ แตะ ซปาว เลียก จอต นึง ไฮมจ เซ ดัฮ แปน ยุฮ อื โฮ. 40 เญือม เซ ตอยฮ โม่ะ ปุก ซมอ เกือฮ ดุฮ โตะ รอาวม บรุก ไม่ กัฮ อื โม่ะ ปุก ซม่ะ ลั่กเคะ โล่ง เซ. ฟวยจ เซ เคิง แม พากัง ลั่ก ไกญ ซปาว ติ ปลัฮ ละ ซ เกือฮ อื กาื ปุฮ อื โฮว ลั่กกา แตะ. ริ เลียก ซื นา ก ไก ไฮมจ นึง เฆียง รอง เซ. 41 ซปาว เซ เญือม เลียก อื คัง นึง เตะ. ไกญ ซปาว เซ คัง. เกียฮ โอก โตว. ลวง ลั่กเคะ อื ม่ะ นึง เรียง ลอน พุกเพียก รอาวม ละ แตะ.

42 โม ตฮัน ตะ ยุฮ ยุม ไม่ โม ป ตุต, ฮอ นึง ซ ลุย อื รอาวม ไม่ ซ ลอต อื ตอ. 43 ไนลอยะ ตฮัน ปังเมอ ฮลักกอ ปาวโล. คัต ตฮัน โอ ยุฮ ป ตะ อื ยุฮ เซ ฆาื อื. ลอต ดวน ป เกียฮ ลุย รอาวม เดิม โตะ รอาวม รกา, เกือฮ อื ฮอยจ นึง เฆียง รอง. 44 ปุย ไฮญ เตือง ไม่ โคะ เตีป ง่อน, เตือง ไม่ โคะ เบฮ โคะ ดุต นึง ซปาว ง่อน. เญือม ยุฮ อื ตอก เซ, ฮอยจ ตื ยุฮ แตะ เฆียง รอง เตือง โอยจ แตะ.