1 Na, kamo oman na mga amo, dadayawa mayo yang pagdaa ng kamayo mga allang aw atagi silan ng osto sang gawbuk nilan. Dumduma mayo na kamo oman aon Tagallang mayo adto sa sorga.

2 Na, aon pay ikadogang ko. Pagpadayon kamo sang pagdowaa na aon pagpanginsokor. Aw kong magdowaa kamo, bantayi yang dumduman mayo. 3 Pagdowaan oman mayo kami untak atagan pa kami ng panahon na makapayapat makapantag sang kahanda ng Tohan na wa akatigami singaon na yani yang Madyaw na Gogodanun makapantag sang Almasi. Na, yang pagpayapat ko sinyan yang sabap nanga ini ako adon sang pirisowan. 4 Agaw, pangayowa mayo adto sang Tohan na madyaw yang pagpayapat ko makapantag sang Almasi kay yani yang dait ko inangun.

5 Adon, dait na madyaw yang batasan mayo sang mga otaw na wa apangintoo sang Almasi. Aw gamita mayo yang panahon sang paglaong kanilan ng makapantag sang Almasi. 6 Sang paglaong mayo kanilan dait na maoyanun kamo aw madyaw yang pyaglaongan mayo untak karim nilan maningug kamayo. Aw dait mayo katigaman daw ono yang ikatobag mayo kong aon maga-osip kamayo.

7 Na adon, yang kanatun lomon na si Tikikos yang magagogod kamayo daw ono yang kabutang ko adi. Dakowa yan sang kanak pangatayan kay kasarigan yan na katabang aw inagad ko sang gawbuk para sang Tagallang. 8 Asogoon ko yan adto kamayo untak mayo katigaman yang kanami kabutang aw untak pabagsugun nan yang kamayo pangatayan. 9 Pa-agadun ko kanan si Onisimos, yang kanatun lomon na dakowa sang pangatayan ta. Kasarigan oman yan aw yagasikun yan ansan kamayo. Silan da yang magagogod kamayo sang kariko ng yamaitabo adi.

10 Yagasalam kamayo si Aristarkos na inagad ko adi sang pirisowan aw si Markos na tungud ni Barnabas. Pyagalaong da ta kamo singaon na kong domatung si Markos ansan kamayo, dawata mayo yan ng madyaw. 11 Si Yossa na pyagangaanan oman kang Yostos, yagasalam oman kamayo. Yaning toongka otaw gaid yang mga Yahodi na inagad ko adi sang gawbuk ng pagpayapat makapantag sang pagdato ng Tohan, aw dakowa yang tabang nilan kanak.

12 Yagasalam oman kamayo yang imamanwa mayo na si Ipapras na sambok oman na inagad sang gawbuk para kang Isa Almasi. Yabay nan kamo pagdowaan sang tibok nan na pangatayan untak mabagsug yang pagpangintoo mayo aw untak mayo katigaman sang way dowa-dowa daw ono yang karim ipa-inang kamayo ng Tohan. 13 Yakasaksi ako na dakowa yang pagpangalingkamot nan para kamayo aw sang mga kalomonan ta adto sa Laodikiya aw sa Hirapolis. 14 Yagasalam oman kamayo si Lukas, yang doktor na dakowa sang kanatun pangatayan, aw si Dimas oman.

15 Salaman mayo ako sang mga kalomonan ta adto sa Laodikiya, labi da kang Nimpa aw yang jamaa na yagakatipon sang kanan baay. 16 Pagkatapos mayo magbasa sini na sorat, padaan mayo adto sang jamaa sa Laodikiya untak mabasa oman nilan. Aw basaun oman mayo yang sorat na pyadaa ko adto sang mga taga Laodikiya. 17 Aw paglaonga si Arkipo na taposon nan yang gawbuk na syarig kanan ng Tagallang.

18 Na, ako yani si Paulus yang yagasorat sang pagsalam ko kamayo.* 4:18 Yang kya-anadan ni Paulus na pyasorat nan yang mga sorat sang sangka otaw. Awgaid yan da mismo yang yagasorat sang pagsalam atawa ngaan nan untak katigaman na bunna na yani na sorat yagasikun kanan. Ayaw mayo pagkaringawi na idi ako sa pirisowan.

Kaoyan pa gao kamo ng Tohan.

Wassalam