1 Adon nang masaid da silan sa Awrosalam aw iyan da silan sang mga baryo ng Bitpagi aw Bitani na adto sang Butay na Jayton, pya-ona ni Isa yang dowangka otaw na mga inindowan nan 2 aw laong nan kanilan, “Kadto kamo sang baryo sang onaan. Pagsuud mayo ansan, aon makita mayo na nati ng asno na inikutan na wa pa gaid akasakayi. Obadi mayo aw daa adi kanak. 3 Kong aon maga-osip kamayo daw onoon mayo yan, paglaonga mayo, ‘Kinaanglan yani ng kanami Dato. Ipa-ori da oman nan mallaw.’ ” 4 Na, pyomanaw da yang dowa na inindowan aw pagdatung nilan sidtong baryo, kinita nilan yang nati ng asno sang kilid ng daan na inikutan sang powertaan ng sambok na baay. Ansinyan yobadan da nilan. 5 Nang yaga-obad pa silan ng asno, yosip silan ng mga otaw na yaga-indug ansan, laong nilan, “Oy, ono yang ininang mayo? Nanga yobadan mayo yang asno?” 6 Na, tyobag da nilan yang mga otaw sobay sang pyaglaongan kanilan ni Isa. Aw pyasagdan da silan ng mga otaw.

7 Ansinyan dyaa da nilan yang nati ng asno adto kang Isa, yampasan nilan ng mga dagom nilan aw syomakay da si Isa. 8 Na, madaig yang mga otaw na yagabutang ng mga dagom nilan sang daan na agian ni Isa. Yang kadaigan oman, pyakanat nilan sang daan yang mga sanga na madaig yang daon na pyangotod nilan adto sang lati.* 11:8 Yang pagbutang ng mga dagom aw sanga sang daan na agian ni Isa yang tanda ng pagbantog kanan. 9 Yang mga otaw na yaga-ona kang Isa aw yang mga yagasonod kanan yagapiyagit aw laong nilan,

11 Ansinyan pagdatung ni Isa sa Awrosalam, syomuud yan sang Baay ng Tohan aw pyagatanawan nan yang kariko adto sa suud. Awgaid sabap ng ambong da pyomanaw da yan upud sang sampoo aw dowa na mga sahabat nan aw barik silan sang banwa ng Bitani.

12 Pagka-ilaw sinyan nang yagapanaw da oman silan sikun sa Bitani paduug sa Awrosalam, yamagutum si Isa. 13 Ansinyan aon kinita nan sang onaan na kaoy na igira na madaig yang daon. Kyadtonan nan inyan kay atanawon nan daw aon bonga. Pagdatung nan ansan, way kinita nan na bonga kondi mga daon gaid kay di pa ng wakto na mabonga yang igira. 14 Ansinyan pyaminta ni Isa idtong kaoy aw laong nan, “Sikun adon waa day makakan ng bonga mo.” Aw yakadungug sinyan yang mga inindowan nan.

15 Ansinyan pagdatung nilan sa Awrosalam, syomuud si Isa sang Baay ng Tohan aw yagasogod yan magpalogwa ng mga otaw na yanagbarigya aw yamamili ansan. Pyagatowad nan yang mga lamisa ng mga yagakambiyo ng sapi aw yang mga ingkodanan ng yagabarigya ng mga malapati. 16 Aw wa nan atogoti yang maskin sino na aon dyaa na mga butang na amagi sang pamanag ng Baay ng Tohan. 17 Ansinyan yaga-indo si Isa aw laong nan sang mga otaw, “Yakasorat sang Kitab na yagalaong yang Tohan, ‘Yang kanak baay atawagun ng Baay ng Pagdowaa para sang kariko ng mga bangsa.’‡ 11:17 Yani yang yakasorat sa Kitab Tawrat, Nabi Isayas 56:7. Awgaid ininang da mayo yan ng tagowanan ng mga tolisan.”§ 11:17 Yani yang yakasorat sa Kitab Tawrat, Nabi Irimiyas 7:11.

18 Na, yang mga pangoo ng mga imam aw yang mga magiindoway ng Hokoman, yadungug nilan yang makapantag sidtong ininang ni Isa. Aw sikun sinyan na wakto yagapanganap silan ng pama-agi ng pagpatay kanan. Yamalluk silan kang Isa kay yang kariko ng mga otaw yatingaa sang pag-indo nan.

19 Ansinyan nang ambong da, pyomanaw da si Isa sikun sa Awrosalam upud sang mga inindowan nan.

20 Pagka-ilaw sinyan sarta yagabarik silan adto sa Awrosalam, yamagi oman silan sidtong kaoy na igira aw kinita nilan na yagango da maskin pa yang mga gamot nan. 21 Ansinyan kyadumduman ni Pitros yang pyaglaongan ni Isa sidto na kaoy aw yagalaong yan kang Isa, “Kay Goro, tanawa pagaw yani na igira na pyaminta mo, yagango da!”

22 Tyomobag si Isa, “Pagpangintoo kamo sang Tohan! 23 Sa bunna-bunna na ipaglaong ko kamayo na sino-sino yang magalaong sini na butay, ‘Ballin adto sang dagat,’ aw di yan magdowa-dowa kondi mangintoo na amatoman yang pyaglaongan nan, ma-inang sagaw yan. 24 Agaw ipaglaong ko kamayo na yang maskin ono na apangayoon mayo adto sang Tohan, kong mangintoo kamo na dyawat da mayo yang pyangayo mayo, amadawat da sagaw mayo. 25 Na, kong magadowaa kamo awgaid yadaman pa kamo sang yamakadosa kamayo, ampona mayo ona yan untak amponon oman yang mga dosa mayo ng Tohan na Ama mayo adto sa sorga. 26 Awgaid kong di mayo amponon yang yakadosa kamayo, di oman amponon yang mga dosa mayo ng Tohan na Ama mayo adto sa sorga.”

27 Ansinyan dyomatung da oman silan sa Awrosalam. Nang yagapanaw-panaw si Isa adto sa suud ng Baay ng Tohan, dyomood kanan yang mga pangoo ng mga imam, yang mga magiindoway ng Hokoman aw yang mga pangoo ng mga Yahodi. 28 Yaga-osip silan kanan, “Ono yang kapatot mo sang pag-inang sidto na mga butang?* 11:28 Yang karim nilan ipasabot sidto na mga butang idtong pagpalogwa ni Isa ng mga negosyante sikun sang Baay ng Tohan. Tanawa sa Kitab Injil, Markos 11:15-17. Sino yang yaga-atag kammo sini na kapatot?”

29 Tyomobag si Isa, “Aon oman osip ko kamayo. Kong matobag mayo, ipaglaong ko oman kamayo daw wain pagasikun yang kapatot ko sang pag-inang sidto na mga butang. 30 Na, paglaonga ako daw wain pagasikun yang kapatot ni Yahiya pagsogbo sang mga otaw, sikun sang Tohan atawa yang manosiya?”

31 Ansinyan yanagbaaw-baaw silan daw ono yang itobag nilan, laong nilan, “Kong magalaong kita ‘sikun sang Tohan,’ magalaong yan kanatun ‘Na, nanga wa kamo apangintoo kanan?’ 32 Awgaid kong magalaong kita ‘sikun sang manosiya,’ na, magaproblima da kita.” Kay yamalluk silan sang mga otaw kay yang kariko nilan yagapangintoo na bunna na nabi si Yahiya.

33 Agaw tyomobag silan, “Wa nami akatigami.”

Ansinyan yagalaong si Isa kanilan, “Na, kong maynan, di ko oman kamo paglaongon daw wain pagasikun yang kapatot ko sang pag-inang sidto na mga butang.”