1 Adon, kamo oman na mga sapian, paningug kamo kanak. Pagmaatay kamo aw pagtiyao sabap sang mga kasikotan na madatung kamayo. 2 Kay yang kakawasaan na pyagatago mayo akawaan ng siyat aw amasapad, aw yang kamayo mga dagom apangutkutun ng kakaba. 3 Yang kamayo bowawan aw pilak na wa mayo agamita sang kadyawan, kyaring da sang kamayo tagowanan. Yan na karing makasaksi sang pagkasingit mayo aw ya-inang ng pyagasabapan nanga asiksaun kamo adto sang atoon sang narka. Na, madaig yang kakawasaan na pyagatago mayo aw adon masaid da yang kataposan ng donya. 4 Paningug kamo! Yang mga otaw na pyagawbuk mayo sang kamayo pawa awgaid wa mayo abayadi, yagapangayo silan ng tabang adto sang Tohan. Aw yang pagtiyao ng mga otaw na yagagani ng kamayo omay dyungug ng Tohan na Labi na Mabarakat. 5 Kamo na mga sapian, tanto madyaw yang kabutang mayo ansining donya aw pyangagadan gaid mayo yang napso mayo. Awgaid sang kabunnaan, main kamo ng baka na pyakataba awgaid wa akatigami na madari da kadi sobariun. 6 Maat yang ininang mayo kay pyagahokom aw pyatay mayo yang mga otaw na way dosa aw wa asopak kamayo.

7 Mga kalomonan ko, pagsabari mayo yang mga kasikotan sampay sang pagbarik ni Tagallang Isa. Tanawa mayo yang magpapawa na yagatagad ng abot na aon pagsabar. Kay atagadan nan yang owan untak makatanum, aw atagadan oman nan yang owan na makapatobo sang tanum. 8 Mag-onawa sinyan dait kamo magtagad na aon pagsabar. Pabagsuga yang pangatayan mayo kay madari da domatung yang kanatun Tagallang na si Isa Almasi.

9 Mga kalomonan ko, ayaw kamo pagbaawi yang isa adto sang isa untak di kamo hokoman ng Tohan. Kay yang magahokom kanatun masaid da domatung. 10 Mga kalomonan ko, dumduma mayo yang mga nabi singaon na yaga-osiyat sang ngaan ng Tohan aw inanga mayo silan ng opamaan mayo kay pyagasabaran nilan yang maskin ono na kasikotan na yadatung kanilan. 11 Na, kadyaw ng ginawa nilan kay yagasabar silan ng kasikotan. Sa way dowa-dowa yadungug mayo yang makapantag kang Nabi Ayob na yagapadayon magpangagad sang Tohan maskin aon mga batalo na yadatung kanan.* 5:11 Yang makapantag sang mga batalo na yadatung kang Nabi Ayob mabatya sa Kitab Tawrat, Nabi Ayob 1:13-21. Aw kyatigaman oman mayo na sang orian, dakowa yang tabang kanan ng Tohan. Kay yang Tohan labi na maoyanun aw dakowa yang looy nan sang kanan mga otaw.

12 Mga kalomonan ko, labaw sang kariko ayaw kamo pagsapa untak gaid pangimunnaan yang pyaglaongan mayo. Ayaw kamo paglaong na “Saksi ko yang langit,” atawa “Saksi ko yang lopa,” atawa yang maskin ono pa. Madyaw da kong magalaong gaid kamo ng “Uu” kong uu, aw “Dili” kong dili, untak di kamo hokoman ng Tohan.

13 Na adon, kong aon otaw ansan kamayo na yamagi ng kasikotan, dait yan magdowaa. Kong aon yamasowat, dait yan komanta ng pagpoji sang Tohan. 14 Kong aon yamasakit, apatawag nan yang mga pangoo ng jamaa untak magdowaa silan para kanan na adamosan ng lana sang ngaan ng Tagallang. 15 Kay yang pagdowaa na aon pagpangintoo makapagkadyaw sang yamasakit. Pakadyawon yan ng Tohan aw amponon yan ng mga dosa nan kong yakadosa yan. 16 Agaw, pagginogoday kamo ng mga dosa mayo aw pagdowaai mayo yang matag-isa untak ka-orian yang kamayo mga sakit. Kay mabarakat yang pagdowaa ng otaw na matorid sang pagtanaw ng Tohan. 17 Dumduma mayo si Nabi Iliyas singaon. Manosiya yan mag-onawa kanatun. Awgaid yagadowaa yan na di mowan, aw bunna na way owan sa suud ng toongka toig aw tunga. 18 Pagkatapos san yagadowaa da oman yan na omowan da, aw bunna na yamowan aw yamonga da oman yang mga tanum sang lopa.† 5:17-18 Yang makapantag sang pagdowaa ni Nabi Iliyas mabatya sa Kitab Tawrat, 1 Soltan 17:1 aw 18:42-45.

19 Mga kalomonan ko, kong aon otaw ansan kamayo na yasoway sang bunna na indowan, madyaw pa kong apabarikun mayo adto sang matorid na daan. 20 Kay dait mayo katigaman na sino-sino yang magpabarik sang sangka otaw na baradosa adto sang matorid na daan, alowasun nan yan na otaw sikun sang kasiksaan kay amakamang da yang madaig na mga dosa nan.

Wassalam