1 Migkaǥi is Nengazen diyà te ki Moises te, 2 “Suǥù ka te menge etew he ibpepeniid diyà te Canaan he iyan kes tanà he ibeǥey ku keniyu te menge Israilihanen. Suǥù ka te tigselimbaha he pengulu puun te kada tribu te Israel.” 3 Umbe, midtuman ni Moises haazà is insuǥù te Nengazen kandin. Impehendiyè din te Canaan is menge pengulu te menge Israilihanen puun diyà te sibsivayan he Paran. 4-15 Iyan heini menge tribu wey menge ngazan te menge pengulu:

16 Iyan sikandan menge etew he midsuǥù ni Moises te kebpeniid diyà te Canaan. (Mid-ilisan ni Moises is ngazan ni Hoshea he anak ni Nun te Josue.)

17 Hein wazè pa sikandan ipeǥenat ni Moises su wey zan mekepeniid diyà te Canaan, migkeǥiyan din sikandan te, “Hipanew kew pehendiyà te zizaya ne hendiyè kew te Negev. 18 Susiya niw ke hengkey is purma te tanà, wey is menge etew zuen ke memezesen be etawa memeluya, mezakel ve sikandan etawa deisey zà. 19 Susiya niw ke hengkey he kelasi te tanà is ed-ubpaan dan, meupiya ve etawa kenà. Susiya niw is menge inged dan ke miberengbengan be etawa wazà. 20 Susiya niw ke egkeveluyan be is tanè dan etawa kenà, wey ke zuen be zuen menge kayu etawa wazà. Ne peninguhaa niw he mekeuwit kew te menge prutas dutun te kedlikù niw zini.” (Timpu haazà te kegkengelutui te paras.)

21 Umbe, midhipanew sikandan ne midsusi zan haazà is tanà puun te sibsivayan he Zin pehendiyà te Rehob he uvey te Lebo Hamat. 22 Mibpuun sikandan diyà te Negev taman te nekeuma zan diyà te Hebron, he zutun ed-ubpà si Ahiman, si Sheshai, wey si Talmai, he menge kevuwazan ni Anak. (Heini is Hebron pitu en he tuig is kebenguna zuen human pa mevangun is Zoan diyà te Ehipto). 23 Ne hein nekeuma zan diyà te zal-ug he Eshcol, midtamped sikandan te sengerupung he paras, ne utew heini meveǥat umbe midtival haazà te zezuwa he etew. Mid-uwit daan sikandan te menge prutas he pumigranata wey higus. 24 Haazà he zal-ug migngezanan he Eshcol, tenged duen te sengerupung te paras he midtamped te menge Israilihanen.

25 Ne hein nepasad is 40 he andew te kebpeniid dan dutun te tanà, midlikù sikandan 26 diyà te ki Moises, ki Aaron, wey ziyà te tivuuk he keet-etawan te Israel ziyà te Kadesh he ziyà te sibsivayan he Paran. Migkaǥi zan diyà te langun he menge etew zutun is neehè dan, ne impeehè dan is uwiten dan he menge prutas. 27 Migkeǥiyan dan si Moises te, “Midhendiyè key te lugar he impesusi nu kenami, meupiya heini wey selebpeten he tanà. Heini zed is nekuwa zey he menge prutas. 28 Piru mekeǥeǥehem is menge etew he ed-ubpà duen, ne utew zezekelà is menge inged dan he nengeliǥuy te verengbeng. Neehè dey pa ganì is menge kevuwazan ni Anak. 29 Is menge Amalikanhen diyà ed-ubpà te Negev; is menge Hitihanen, menge Jebusihanen, wey is menge Amorihanen diyà ed-ubpà te menge vuvungan; ne is menge Canaanhen diyà ed-ubpà te veyvey te zaǥat wey veyvey te Wahig he Jordan.”

30 Ne impehenek ni Caleb is menge etew ziyà te etuvangan ni Moises, ne ke sikandin te, “Egenat kiw en guntaan ne ed-eǥawen tew haazà is tanà, su siguradu he egkaaǥew tew heini.”

31 Piru migkaǥi sikan is menge etew he zuma ni Caleb te neniid te, “Kenè kiw ebpekehimu he edsurung kandan su edhuna sikandan he melig-en kenitew.” 32 Ne midtudtulan dan is menge Israilihanen te mekesuǥeysuǥey mehitenged duen te tanà he midsusi zan. Iyan heini migkaǥi zan, “Kenà meupiya is tanà he midsusi zey, su ebpekekaid te menge meǥinged duen, ne liyu keniyan, is menge etew he neehè dey zutun ne utew memelangkew. 33 Duen dey pe man ganì naahà he menge eregasi he menge kevuwazan ni Anak. Henduen dà te menge pelaǥà is ked-isipa zey te keugelingen dey emun idhindeg kandan, ne iyan daan heeyan ked-isipa zan kenami.”