1 Hein iyan hadì diyà te Juda si Jehoyakim he anak ni Josia, migkaǥi is Nengazen diyà te ki Jeremias, 2 “Hendiyè ka te pemilya te menge Rikabnen, ne keǥiyi nu sikandan he medhendiyè dan te sevaha zuen te menge ruǥu te valey ku, ne ipeinum nu sikandan te vinu.”

3 Umbe, mibeyaan ku si Jaazania (anak sikandin te egngezanan daan te Jeremias, he anak ni Habazinia) wey is langun he menge suled din wey menge anak. Iyan sikandan tivuuk he pemilya te menge Rikabnen. 4 Miduma ku sikandan diyà te valey te Nengazen, diyà te ruǥu te menge anak he maama ni Hanan he anak ni Igdalia te suluǥuen te Megbevayà. Heini he ruǥu avey te ruǥu te upisyal ne ziyà heini te zivavew te ruǥu ni Maasea he anak ni Shalum, he vantey te ǥemawan te valey te Nengazen. 5 Ne midsavuk a te pitsil he midteǥuan te vinu wey menge tasa ziyà te etuvangan te menge Rikabnen ne migkeǥiyan ku sikandan he med-inum dan.

6 Piru midtavak sikandan te, “Kenè key ed-inum te vinu. Is kepuun dey he si Jonadab he anak ni Recab mibmandù kenami wey te menge kevuwazan dey he kenè key iyan ed-inum te vinu. 7 Wey heini pa is inmandù din kenami: ‘Kenè kew mebangun te menge valey wey kenè kew pemula minsan menge paras. Indawey zaan kenami is ked-angken keniyan he menge vutang. Kinahanglan he ziyè key zà ed-ubpà te tulda. Ne emun edtumanen dey heini, egkeuǥet is ked-ubpè dey zutun te tanà he ebpeveyaan dey.’ 8 Midtuman dey is langun he insuǥù kenami ni Jonadab. Sikami wey is menge esawa zey wey is menge anak dey wazà med-inum te vinu, 9 wey wazè mebangun te menge valey he egkeubpaan, wey wazè key med-angken te menge pemuleey te paras wey menge vevesukà. 10 Diyè key med-ubpà te menge tulda ne mibpurungan dey tumana is langun he insuǥù kenami ni Jonadab te kepuun dey. 11 Piru hein midsurung ni Hadì Nebucadnezar he hadì te Babilonia heini is nasyun, nahandek key te menge sundaru te Babilonia wey Aram, umbe nekedisisyun key he edhengkayi key te Jerusalem umbe kayi key ǥuntaan med-ubpà.”

12-13 Migkaǥi is Nengazen he Mekeǥeǥehem, he Megbevayà te Israel, diyà te ki Jeremias te, “Genat ka, ne keǥiyi nu is menge etew ziyà te Juda wey Jerusalem te: Maan is kenè kew ebpemineg wey edtuman te menge lalag ku? 14 Si Jonadab he anak ni Recab mibmandù te menge kevuwazan din he kenè dan med-inum te vinu ne midtuman dan heini. Ne taman en guntaan wazè dan med-inum te vinu su midtuman dan is suǥù te kepuun dan. Piru sikiyu mulà wazà a keniyu pezumdumahi minsan edsubsublien ku en is kegkeǥiyi ku keniyu 15 pinaaǥi te menge ebpeneuven he menge suluǥuen ku. Migkeǥiyan kew zan te, ‘Engkezi niw en is mezaat he menge kineiya niw, ne veǥuwa niw en is menge vetasan niw, ne kenè kew en azap wey penilbi te zuma he menge ed-ezapen. Ne pengungubpaan kew ziyà te tanà he imbeǥey ku keniyu wey te menge kepuun niw.’ Wazè kew iyan mebpezumazuma wey mebpemineg kedì. 16 Is menge kevuwazan ni Jonadab he anak ni Recab midtuman te insuǥù kandan te kepuun dan. Piru sikiyu, wazè kew mulà mebpezumazuma kediey. 17 Umbe, siak, is Nengazen he Megbevayà he Mekeǥeǥehem, he Megbevayà te Israel, migkaǥi te: Pemineg kew! Is menge etew ziyà te Juda wey Jerusalem, ibpaaǥi ku ziyà te keniyu is langun he kezeetan he migkaǥi ku he idezaat keniyu. Mibpekidlalag a keniyu piru wazà a keniyu pemineǥa; mid-umew ku sikiyu piru wazè kew medtavak.”

18 Ne migkeǥiyan ni Jeremias is menge pemilya te menge Rikabnen te, “Iyan heini migkaǥi te Nengazen he Mekeǥeǥehem, he Megbevayà te Israel te: ‘Mid-ikul niw is langun he insuǥù te kepuun niw he si Jonadab. 19 Umbe, edsaad a he si Jonadab he anak ni Recab, ne kenà egkeewaan te kevuwazan he ebpenilbi kedì. Iyan a, is Nengazen he Mekeǥeǥehem, he Megbevayà te Israel, is migkaǥi kayi.’ ”