1 “Mahala niw is Nengazen he Megbevayè niw ne layun niw tumana is ibpetuman din, menge sulunuzen he imbeǥey zin, wey is menge suǥù din. 2 Tentenuzi niw ǥuntaan is nengeseǥazan niw he kebmansu keniyu te Nengazen he Megbevayè niw. Iyan kew nekesaǥad kayi ne kenà iyan is menge anak niw. Wazà sikandan mekesaksi te kegkelavew wey kegkemekeǥeǥehem te Nengazen, 3 wey te egkengein-inuwan he mibpemeelan din diyà te Ehipto kuntra te Faraon he hadì te Ehipto wey te tivuuk he nasyun. 4 Wazè dan maahà sikan is midhimu te Nengazen diyà te Ehiptohanen he menge sundaru wey ziyà te menge kudè dan wey menge kerwahi zan, wazè dan maahà ke mibmenumenu te Nengazen is kedleneza zin kandan diyà te Zaǥat he Meriǥà hein edel-asen kew zan. Mibpendezeetan din sikandan ne wazè en sikandan guntaan! 5 Wazà maahà te menge anak niw is mibeelan te Nengazen diyà te keniyu hein diyè kew te sibsivayan taman te kebpekeuma niw kayi he lugar. 6 Wey ke hengkey is mibeelan din diyà te ki Datan wey ki Abiram, te menge anak ni Eliab te kevuwazan ni Reuben. Mid-eveleng sikandan te mibeka he tanà ragkes is menge pemilya zan, tulda zan, wey langun he zuma zan. Ne neulaula heini ziyà te etuvangan te langun he menge Israilihanen. 7 Iyan kew mismu nekaahà kayi te mekeǥeǥehem he menge vaal te Nengazen.

8 “Umbe tumana niw is langun he menge suǥù he ibeǥey ku keniyu guntaan, para zuen niw zesen te kedhipanew wey te ked-angken duen te tanà he ziyà layun te Wahig he Jordan. 9 Emun metinumanen kew, edluǥeyayan kew te untung dutun te meupiya wey selebpeten he tanà, he impenangdù te Nengazen he ibeǥey zin diyà te menge kepuun niw wey te menge kevuwazan dan. 10 Su is tanà he edselezan niw wey ed-engkenen niw, ne kenà iring te tanà diyà te Ehipto he mibpuunan niw. Diyà te Ehipto, emun ebpemula kew kinahanglan he edhaǥù kew te kedtulung kebpeminyag. 11 Piru zuen te tanà he ed-engkenen niw, zuen kayi menge vuvungan wey menge suǥud he layun ed-uzani. 12 Heini he tanà ed-etimanen te Nengazen he Megbevayè niw; andew-andew is kebentayi zin kayi seled te tivuuk he tuig!

13 “Umbe emun layun niw edtumana is menge suǥù he ibeǥey ku keniyu ǥuntaan, he mahala niw is Nengazen he Megbevayè niw wey silbiyi niw sikandin te ebpuun diyà te tivuuk he ǥehinawa niw wey tivuuk he kedsavut niw, 14 ebpeuzanan kew zin dutun te hustu he timpu su wey kew sebpeta te trigu, paras he para ebeelan niw he vinu, wey ulibu he para ebeelan niw he lana. 15 Ebeǥayan din te penebtavà is menge uyaǥen niw, ne sikiyu zaan, dekelà is keenen niw.

16 “Mebpekevantey kew su kela ke meiniyat kew, ne ed-iniyuǥan niw is Megbevayà su iyan niw ed-ezapen is menge megbevayà he kenà tutuu ne ebpenilbi kew kandan. 17 Emun ebeelan niw heini, egkepeukan kew te Nengazen ne kenè din ibpeuzan ne wazè niw egkeraǥun, ne segugunè kew egkahanew puun duen te meupiya he tanà he ibeǥey keniyu te Nengazen. 18 Umbe, ipependalid niw heini is menge lalag ku ziyà te gehinawa niw wey isip niw. Bevekelew kew etawa tutubew kew te edsuratan kayi su para kenè niw melipati. 19 Ipenurù niw heini te menge anak niw. Ilalag niw heini kandan ke ziyè kew te valey niw wey ke edhipanew kew, zutun te kedhizeǥè niw wey zutun te ked-enew niw. 20 Isurat niw heini ziyà te menge marku te gemawan te menge valey niw wey ziyà te pultahan te menge inged niw, 21 para luǥeyazi kew te untung duma te menge anak niw duen te tanà he impenangdù te Nengazen he ibeǥey zin diyà te menge kepuun niw. Egkaangken niw heini mintras duen pa langit diyà te zivavew te kelibutan.

22 “Emun ebpurungan niw edtumana heini is langun he ibeǥey ku keniyu he menge suǥù, he ebmahalen niw is Nengazen he Megbevayè niw, wey ebpengungubpaan kew te sungkad te menge paaǥi zin, wey kenè niw sikandin ed-iniyuǥan, 23 edsegseǥen te Nengazen is menge etew zuen te menge nasyun dutun te tanà he ed-engkenen niw minsan dekelè dan wey mekeǥeǥehem dan kenà keniyu. 24 Is langun he tanà he egkeveyaan niw, egkehimu he keniyu: puun te sibsivayan pehendiyà te Lebanon, wey puun te Wahig he Eufrates pehendiyà te Zaǥat he Mediteraneo. 25 Wazà ebpekeeǥen keniyu. Su iyan impenaad te Nengazen he Megbevayè niw he ebpengelinteuwan din he mahandek keniyu is menge etew ziyà te minsan hendei he egkepeveyaan niw zutun he tanà.

26 “Pemineg kew! Ibpepilì ku sikiyu ǥuntaan te tuvad etawa rawak. 27 Edtuvazan kew emun edtumanen niw is menge suǥù te Nengazen he Megbevayè niw he ibeǥey ku keniyu ǥuntaan. 28 Edrewaken kew emun kenè niw edtumanen heini is menge suǥù te Nengazen he Megbevayè niw he ibeǥey ku keniyu ǥuntaan, wey ed-azap kew te ed-ezapen te zuma he wazè niw mekilala. 29 Emun ed-uwiten kew en te Nengazen he Megbevayè niw zutun te tanà he ed-engkenen niw, ne ipahayag niw is tuvad te Nengazen dutun te Buntud he Gerizim tenged te kedtuman niw, ne ipahayag niw zaan is rawak din dutun te Buntud he Ebal tenged te kenè niw kedtuman. 30 Heini he menge vuntud diyà dapit te edsenlepan te Wahig he Jordan, diyà te tanà te menge Canaanhen he meǥinged diyà te Araba he uvey te inged he Gilgal. Kenà heini meziyu te menge kayu he ulayan diyà te More. 31 Edlayun kew en te Jordan te kedseled wey ked-angken duen te tanà he ibeǥey te Nengazen he Megbevayè niw keniyu. Emun egkekuwa niw en heini wey ed-ubpaan niw en, 32 ne tumana niw is langun he menge suǥù wey is menge sulunuzen he ibeǥey ku keniyu ǥuntaan.