ugyab kew ziyà te Megbevayà te kegkelipey.

2 Kanta kew te kedalig kandin.

Iveǥey niw kandin is dengeg pinaaǥi te kedeliǥa niw kandin.

3 Keǥiyi niw sikandin te, “He Megbevayà, utew iyan egkein-inuwi is menge vaal nu.

Tenged te zekelà he ǥehem nu nekeluhud diyà te etuvangan nu is menge kuntada nu.

4 Is langun he menge etew kayi te tivuuk he kelibutan, ed-azap dan kenikew.

Ne egkanta zan te kedalig kenikew.”

5 Hendini kew, ehaà niw is egkengein-inuwan he mibpemeelan te Megbevayà diyà te menge etew.

6 Nekehipanew is menge kepuun tew ziyà te zaǥat,

su mibpengelinteuwan din he meluwis is daǥat su wey mekelepew is tanà;

ne umbe edlipey kiw.

7 Edhadì sikandin te wazà pidtemanan pinaaǥi te ǥehem din,

ne ebpeniizan din is menge nasyun.

Ne kenà ereg he ebpegalbu is menge mesinupaken te Megbevayà.

8 Sikiyu is menge etew, deliǥa niw is Megbevayà.

Ipezineg niw is kedeliǥa niw kandin.

9 Edtipiǥan din is untung tew, ne wazè din ituǥut he mezeeti kiw.

10 He Megbevayà, iyan tutuu is migezaman key kenikew;

midhimu key kenikew he lunsey iring te pelata he midlunsey pinaaǥi te hapuy.

11 Intuǥut nu he meutel key wey impevavè key kenikew te meveǥat he uwiten.

12 Mibpetekutakan key kenikew te menge kuntada zey;

iring key te mideleman wey nekeǥawas puun te nevinsulan.

Iyan, guntaan midhimu nu en he meupiya is kebpekesavuk dey.

13 Ebpemuhat a ziyà te valey nu te menge pemuhat he edtutungen.

Edtumanen ku is menge penangdù ku ziyà te kenikew,

14 he migkaǥi ku kenikew hein egkereǥenan a.

15 Ebpemuhat a ziyà te kenikew te melambù he menge uyaǥen he kerehidu, tudu he vaka, wey kambing. Iyan heini pemuhat he edtutungen.

16 Sikiyu is langun he edtahud te Megbevayà, hendini kew wey a keniyu pemineǥa;

edtudtulan ku sikiyu ke hengkey is mibeelan din kedì.

17 Mibuyù a te tavang diyà te kandin ne midalig ku sikandin.

18 Emun wazè ku itug-an is menge salè ku ne kenà a pezem ebpemineǥen te Nengazen.

19 Piru mibpemineg a te Megbevayà;

midineg din is ked-ampù ku.

20 Edeliǥen ku is Megbevayà, su midseǥipè din is ked-ampù ku,

ne kenà duwazuwa is kebmahala zin kedì.