1 Ebpeselematan ku sikew, Nengazen, te ebpuun kayi te tivuuk he ǥehinawa ku.

Ibpenudtul ku is langun he egkein-inuwan he menge vaal nu.

2 Utew Lavew he Megbevayà, egkelipey a wey egkanta a te idalig ku kenikew.

3 Emun edlepawen nu en is menge kuntada ku, ne ebpemelaǥuy sikandan he ebpemekeurambak,

ne ebpemematey sikandan.

4 Su metazeng ka he menhuhukum he ebpimpinuu ziyà te pinuuwè nu te kedhadì;

midhukuman a kenikew ne zutun neehè nu is puriba he kenà a zait he edsilutan.

5 Midhukuman nu ne midèdeetan nu is menge mezaat he menge nasyun,

umbe kenè en sikandan egketenuzan taman te taman.

6 Mibpurungan nu zèdeeti is menge kuntada ku,

ne kenè ne maan sikandan egkaahà taman te taman.

Mibpemengkag nu is menge inged dan,

ne kenè ne sikandan egketenuzan.

7 Iyan sikew, Nengazen, edhadì ka te wazà pidtemanan;

andam ke en te kedhukum puun te pinuuwè nu te kedhadì.

8 Edhukuman nu te hustu is menge etew kayi te kelibutan; mezait wey wazà egkevintahaan dutun te kedhukum nu.

9  Nengazen, iyan ka egkeeputan te menge etew he edèdaaǥen dutun te timpu te kelised.

10 Edsarig kenikew is menge etew he nekekilala kenikew.

Su wazè pa mid-aput diyà te kenikew he wazè nu zewata.

11 Sikiyu is menge etew, kentahi niw te kedalig is Nengazen he edhadì diyà te Zion.

Iseysey niw ziyà te menge nasyun is nengeveelan din!

12 Ebelesan din is ebpemendaagdaag,

su edseǥipaan din is kebpekitavang te menge dinaagdaag.

13  Nengazen, dekelà is ked-antus ku tenged te kedèdaaǥa kedì te menge kuntada ku.

Ikehizu a kenikew ne libriya a te kemetayen,

14 su wey ku ikeseysey ziyà te menge etew ziyà te menge pultahan te inged he Zion is menge mibeelan nu,

he iyan igkezeliǥa ku kenikew.

Ne edlipey a zutun tenged te kedlibriya nu kediey.

15 Nehitavù diyà te menge nasyun is mezaat he pelanu zan.

Iring te iyan sikandan neulug diyà te vudsi he mibeelan dan,

etawa iring te iyan sikandan nelitag te kandan he litag.

16 Impekilala te Nengazen ke hentei sikandin pinaaǥi te metazeng he kedhukum din,

ne is lalung he menge etew, iyan nekezezaat kandan is mezaat he menge vaal zan.

17 Kemetayen is egkepeveyaan te lalung he menge etew ziyà te langun he menge nasyun,

su ǥeina te ebey-anan dan is Megbevayà.

18 Kenà taman te taman is kebey-ani te Megbevayà te menge egkengeayuayu.

Ebpekeperateng gihapun is menge egkengeayuayu he edlibriyen sikandan te Megbevayà.

19 Sigi en Nengazen, kenè nu ituǥut he iyan ebmezeeǥen is kebpekegaga te menge etew zà duen.

Hukumi nu is menge nasyun diyà te etuvangan nu.

20 Ipeǥezam nu, Nengazen, is gehinawa zan te kegkahandek kenikew.

Ipeisip-isip nu kandan he menge etew zà sikandan.