1 Kenè nu izantal is ed-ul-ulahan nu wey is meupiya he egkeulaula ziyà te kenikew te huziyan he timpu, su minsan pa is egkehitavù te sunud he andew wazè nu metueni.

2 Kinahanglan he iyan edalig kenikew is duma he etew; kenà te iyan ka edalig te keugelingen nu.

3 Meveǥat is batu wey meveǥat daan is pantad, iyan, edhuna pa he meveǥat is samuk he egkehimu he rimeǥas te kelelalung te menge tulebung diyà te kenikew.

4 Ebpekezezaat is pauk wey rerangit, iyan, edhuna pa is kebpengelikud.

5 Deyzey pa is kedawey te egkesayep diyà te etuvangan te sevaha he etew kenà ke egkaǥi ka te, igkeǥaǥew nu sikandin piru ebey-anan nu zà sikandin.

6 Is mesakit he kedawey te tutuu he emiǥu duen meupiya he ketuyuan, piru is hazek te kuntada kenà egkeseriǥan.

7 Is egkahantey en, ne minsan is teneb, kenè en sikandin egenahan he egkaan duen, iyan, is egkevitil, minsan is mepait, ne henduen be te meemis en is kegedgezama zin duen.

8 Is etew he ebpekeziyù diyà te valey zin ne kenè en ed-ulì, iring sikandin te tagbis he mid-engkezan din is salag din.

9 Is menge pehemut wey veyewà ebpekeveǥey te kelipey te gehinawa te etew; iring din ded daan is hustu he sambag te sevaha he emiǥu ne ebpekelipey kenita.

10 Kenè nu lipati is emiǥu nu wey is emiǥu te amey nu. Ne emun ebpekebmereǥen ka, kenè nu iyan peleleǥuya is suled nu he nekeziyù kenikew, su tuwas pa he ebpeketavang kenikew is siringan nu, kenà is suled nu he nekeziyù kenikew.

11 Mama, mebpekeuluwanen ka su iyan heini ebpekeveǥey kedì te kelipey, ne egketavak ku is minsan hentei he edsudì kedì.

12 Is etew he uluwanen egketuenan din emun duen piligru he egkehitavù kandin, piru is etew he kenà uluwanen ne kenà mevantey, umbe ebpekaantus sikandin.

13 Emun ebpesarig is etew he iyan sikandin ebayad diyà te kenikew te utang te etew he wazè din mekilala, siguruwa nu he zuen din igkesandà kenikew, minsan is bisti zin, su para mesiguru nu he mekevayad sikandin.

14 Is etew he iyan en igkepukew zin ke meselem is mezaǥing he kebpenuvadtuvad nu, ne ibpetug-iring din heini te kebpenrewaki kandin.

15 Is bahi he peretebek te esawa zin ne iring te edtiǥisan he atep emun rendeng. 16 Ne emun edewayen ta sikandin ne egkeiring ki zà te edawey te keramag wey te egkemkem te lana.

17 Is putew ebpekepeǥarang te putew zaan, ne is etew zaan, iyan ibmetau te zuma zin.

18 Is ed-elima te kayu he higus ebpekekaan te veǥas dutun te ed-elimahan din. Ne is suluǥuen he ebpurung ebpenilbi te egalen din ne egkezeliǥan.

19 Iring te egkeehè ta is alung ta ziyà te wahig, pinaaǥi te keugelingen ta he gehinawa, egketuusan ta ke metazeng ki he etew wey ke kenà.

20 Kenà egkeengked is kebpemematey te etew; ne is suat te etew ne kenè daan egkeengked.

21 Egketuenan is hustu he vulawan wey is hustu he pelata pinaaǥi te kegezami zuen pinaaǥi te hapuy, ne is etew zaan egketuenan is ked-etew zin pinaaǥi te kegkezeliǥi kandin.

22 Is tulebung minsan ed-iringen te pa te parey he ed-ey-eyazan ebeveyuwa su wey maawà is ukap, iyan, kenà gihapun egkaawà is ketutulebungi zin.

23 Pekeventayi nu wey kenè nu lemlemuwi is menge uyaǥen nu, 24 su is menge ketiǥeyunan wey kevantug, kenà edtaman te taman is kegkeengkena zuen te etew. 25 Egeraven nu is menge igkumpey nu; ne egkesuvul ǥihapun haazà is migeravan nu, su para zuen layun sagbet he egkekaan te menge uyaǥen nu puun te menge vuvungan. 26 Ebpekehimu ka te visti pinaaǥi te vulvul te menge kerehidu, ne ebpekepemasa ka te tanà pinaaǥi te halin te menge kambing nu. 27 Ebpekekuwa ka zaan te zekelà he ǥatas puun dutun te menge kambing para te pemilya nu ragkes is menge suluǥuen nu he vahi.