1 Migkaǥi is Nengazen te, “Mekehizuhizu is Jerusalem, kes inged he mid-ubpaan ni David! Edtulung edsilibra te menge pista is menge meǥinged kayi kada tuig, 2 piru edsurungen ku heini, ne ebpemekesineǥew wey ebpemenhulùhulù haazà is menge meǥinged. Ne edhimuwen ku haazà is tivuuk he inged he iring te pemuhatà he egkepenù te lengesa. 3 Ebpeliǥuyan ku is inged he Jerusalem. Ne ebpeveelan ku te menge turi-turi he veyeey te edsurung kayi, ne ebdtembuan ku te tanà is kilid te verengbeng su wey meǥampan heini. 4 Egkezeetan heini, ne egkeiring te ǥimukud he ebpengumew, iyan, ebpekenaasnaas dà diyà te zizalem te tanà. 5 Piru ziyà te huziyan he timpu is mahabet he menge kuntada zin, egkeiring te eliyavuk etawa ukap he idlayap te keramag. Egketik-ew zà heini egkehitavù diyà te kandan. 6 Edtentenuzan te Nengazen he Mekeǥeǥehem is Jerusalem, ne ebpekeuma sikandin he zuen ruǥung, linug, dekelà he keǥurub, eribpures, bagyu, wey edriyubriyub he hapuy. 7-8 Egkahanew iring te teǥeinep is mahabet he menge nasyun he nekidtebek te Jerusalem wey mibengkag te verengbeng kayi. Egkeiring sikandan te etew he neketeǥeinep he egkaan, piru kegkepukew zin ne egkevitil pa sikandin, etawa iring te etew he neketeǥeinep he ed-inum, piru te kegkepukew zin ne egkemezahan pa sikandin.”

9 Sikiyu is menge tig-Juda, liveǥa niw is isip niw wey tinulebung kew. Sebpengi niw is menge mata niw ne mebpekelakap kew. Pelelangut kew piru kenà pinaaǥi te vinu, diregdireg kew piru kenà tenged te visa te vinu. 10 Su impelipezeng kew te Nengazen. Midtembunan din is menge ulu niw wey menge mata niw he iyan is menge ebpeneuven diyà te keniyu.

11 Su ziyà te keniyu, heini is langun he impezayag keniyu iring te libru he siradu. Ne emun ibpevasa heini te etew he metau he ebasa, ne ke sikandin te, “Kenè ku heeyan ebesahan su siradu.” 12 Ne emun ibpevasa nu te kenà metau he ebasa, ne ke sikandin te, “Kenà a metau he ebasa.”

13 Migkaǥi is Nengazen te, “Heini he menge etew ziyè dà te vèbè dan is kedeliǥa wey kebeǥayi zan kedì te zengeg, piru meziyù kayi te kedì is gehinawa zan. Ne is ked-ezapa zan kedì, ne tenged dà te edtumanen dan is kandan dà he sulunuzen. 14 Umbe, ed-umanan ku edhimuwa heini kayi te menge etew is ebpekedsusunud he menge egkein-inuwan he menge vaal ku. Id-awè ku is ketau te menge uluwanen wey is kedsavut te menge metau.”

15 Mekehizuhizu kew is nenigudu para mekeeles diyà te Nengazen is menge pelanu niw. Mibeelan niw is menge vuluhaten niw ziyà te merusirem, ne ke sikiyu te, “Wazà ebpekaahà wey egketau te ebeelan tew.” 16 Menge tulebung kew! Ed-isipen niw he iring te ziniyun is mendiziyun. Ebpekekaǥi ve is bineelan diyà te mibaal zuen te, “Kenè ke iyan mibaal kedì?” Ebpekekaǥi vè is diniyun diyà te midiyun duen te, “Kenè ka metau?”

17 Kenà egkeuǥet ne egkehimu is ketelunan diyà te Lebanon he uuzaran he pemuleey, ne is uuzaran he pemuleey iyan egkehimu he ketelunan. 18 Dutun he timpu, is bengel ebpekezineg en te menge lalag he ebesahan diyà te libru. Ne is lakap he merusirem dà is egkeehè din ne ebpekeehè en. 19 Ed-uman edlipey is kenà menge mepelevawen wey is menge egkengeey-eyuwan tenged te Nengazen, he Waǥas he Megbevayà te Israel. 20 Su egkaawè en is menge mesipala wey menge mesudì he menge etew. Ebpematey is langun he zekelà diyà te gehinawa zan is kebaal te salà 21 ragkes is langun he ebpen-ulug te kewusa, is edtuis te ketazeng diyà te hukmanan, wey is menge tistiǥus he edtarùtarù su para kenà mevaǥayì te hustu he kukuman is wazà mekesalà.

22 Umbe is Nengazen, is Megbevayà he midlibri ki Abraham, migkaǥi mehitenged te menge kevuwazan ni Jacob, ke sikandin te, “Puun guntaan, wazè en ereg he igkeeled dan wey wazè dan en igkahandek. 23 Su emun egkeehè dan is menge vaal ku para kandan, ne edtehuzen e zan is Waǥas he Megbevayà ni Jacob, ne egkilelaan dan is kegkewaǥas ku. Igkahandek e zan is Megbevayà te Israel. 24 Is menge egkeliveg ebpekesavut en te tutuu, ne is layun ebegulbul ne igkelipey zin en is kebpenurua kandin.”