1 Ne migkeǥiyan te Nengazen si Moises te, 2 “Dutun te egkehuna he andew te egkehuna he vulan te tuig, ne ipelastar niw en heeyan is Tulda he Ed-ezapan, he egngezanan daan he Tulda he Edtelevukaayan. 3 Iseled niw zutun sikan is Kavan te Kebpekid-uyun, ne elangi niw te kurtina. 4 Iseled niw sikan is lemisahan ne isavuk niw zutun sikan is menge gelemiten kayi. Ne elin niw iseled sikan is selevukà te sulù ne isavuk niw zutun sikan is menge sulù. 5 Isavuk niw sikan is pemuhatà he vulawan he edtutungan te veyewà diyà te etuvangan duen te Kavan te Kebpekid-uyun, ne itaud niw is kurtina ziyà te gemawan duen te Tulda he Ed-ezapan.

6 “Isavuk niw ziyà te etuvangan duen te Tulda he Ed-ezapan sikan is pemuhatà te edtutungen he pemuhat. 7 Ne isavuk niw sikan is bisin, diyà te pid-elangan duen te Tulda wey zuen te pemuhatà, ne teǥui niw haazà te wahig. 8 Ipenaud niw sikan is ibpeliǥuy zuen te Tulda he menge kurtina, ragkes sikan is kurtina zuen te gemawan te lama.

9 “Ne ipehinungud niw kayi te kediey sikan is Tulda wey is langun he gelemiten duen pinaaǥi te kedlenahi niw zuen te segradu he lana, ne egkehimu haazà he segradu. 10 Edheplasan daan haazà is pemuhatà te pemuhat he edtutungen wey is langun he menge gelemiten kayi pinaaǥi te kebpehinunguza kayi te kedì, ne egkehimu heini he segradu. 11 Ne ipehinungud niw zaan sikan is bisin wey is selevukè din, te iyan gihapun he paaǥi.

12 “Ne zumaha nu si Aaron wey sikan is menge anak din he maama ziyà te ǥemawan duen te Tulda he Edtelevukaayan ne ipepemeziǥù nu sikandan dutun. 13 Ne sun-uzi nu si Aaron duen te menge visti te memumuhat, ne lenahi nu sikandin su iyan heini paaǥi te kebpehinunguza kandin kayi te kedì, su wey mekepenilbi sikandin kediey pinaaǥi te kebpemuhat. 14 Dumaha nu zaan sikan is menge anak din he maama, ne ipesun-ud kandan is pendizalem he visti zan. 15 Ne lenahi nu sikandan iring te kedlanahi nu te amey zan, su para mekepenilbi sikandan kediey pinaaǥi te kebpemuhat pehendiyè en te huziyan he menge lapis te kevuwazan.” 16 Ne mibeelan ni Moises haazà is langun he insuǥù te Nengazen kandin.

17 Umbe, midtukud is Tulda he Ed-ezapan dutun te nehuna he andew te nehuna he vulan dutun te ikezuwa he tuig te kegkeliwas te ked-awè dan diyà te Ehipto. 18 Iyan heini kedtukuza ni Moises duen te Tulda: Intaud din is menge pundasyun kayi, is menge elavat, wey menge marku te elavat, wey menge tukud. 19 Ne mibekar zin sikan is Tulda, ne impetaud din is menge elavat he manggad wey is tambun he iyan atep duen. Mibeelan din heini is langun sumalà te insuǥù kandin te Nengazen. 20 Ne intaǥù din duen te Kavan sikan is melumpipì he vatu he midsuratan te Kesuǥuan, ne in-ahuk din duen te menge mibpen-iring te rintì duen te Kavan sikan is menge tival, ne midtembunan din heini. 21 Ne inseled din sikan is Kavan duen te Tulda he Ed-ezapan, ne intaud din sikan is kurtina su wey mezilungi haazà is Kavan te Kebpekid-uyun.

22 Ne impelastar zin is lemisahan diyà te seled dutun te Tulda, ziyà te egkezizaya he kilid, he ziyà te ǥawas duen te kurtina. 23 Ne insavuk din dutun te lemisahan sikan is supas he ibpemuhat diyà te etuvangan te Nengazen. Mibeelan din heini is langun sumalà te insuǥù kandin te Nengazen.

24 Impelastar zin daan sikan is selevukà te sulù diyà te seled duen te Tulda, diyà te egkesineruwan duen te lemisahan he zapit te egkezivavà. 25 Ne insavuk din sikan is menge sulù diyà te etuvangan te Nengazen. Mibeelan din heini is langun sumalà te insuǥù kandin te Nengazen.

26 Inseled din duen te Tulda sikan is bulawan he pemuhatà, ne ziyè din ipelastar te etuvangan duen te kurtina, 27 ne midtutung din dutun is mehemut he veyewà, su iyan haazà insuǥù te Nengazen. Mibeelan din heini is langun sumalà te insuǥù te Nengazen kandin.

28 Intaud din daan sikan is kurtina ziyà te gemawan duen te Tulda, 29 ne impelastar zin diyà te uvey te ǥemawan sikan is pemuhatà te pemuhat he edtutungen. Ne nemuhat sikandin dutun te menge pemuhat he edtutungen, wey menge pemuhat he gasa.

30 Ne insavuk din sikan is bisin diyà te pid-elangan duen te Tulda wey zuen te pemuhatà ne midteǥuan din haazà te wahig he ibpenlùlù. 31 Ne si Moises, si Aaron wey sikan is menge anak din he maama ebpenlùluan dan is menge velad dan, wey menge paa zan dutun. 32 Ebpenlùlù dan emun edseled dan dutun te Tulda etawa edhenduen dan te pemuhatà. Mibeelan dan heini is langun sumalà te insuǥù te Nengazen ki Moises.

33 Ne impelastar ni Moises sikan is menge kurtina zuen te lama, he ebpekeliǥuy zuen te Tulda, wey zuen te pemuhatà, ragkes sikan is kurtina te gemawan dutun te lama. Ne nepasad ni Moises is langun he vuluhaten.

34 Ne hein nepasad heini is langun netembunan te ǥapun sikan is Tulda he Edtelevukaayan he tuus te zutun is Nengazen. 35 Ne tenged dutun kenà si Moises ebpekeseled dutun te Tulda. 36 Ne emun ebpeketikang sikan is gapun diyà te zivavew zuen te Tulda ne egenat heini, ne egenat daan is menge Israilihanen puun te kampu zan. 37 Emun kenà ed-awà duen te Tulda sikan is gapun, ne kenè dan daan edhalin. 38 Sikan is gapun he simbulu he zutun is Nengazen he kenà ed-awà diyà te zivavew zuen te Tulda emun maandew, ne emun mezukilem duen dutun hapuy he ǥapun su para maahà heini te langun he Israilihanen dutun te kedhipanew zan.