1 “Si Bezalel, si Oholiab, wey is duma pa he mibeǥayan te Nengazen te ketau wey ebilidad te kebaal te nekedseselekawà he vuluhaten iyan midterebahu te kebeeli zuen te Tulda sumalà te insuǥù te Nengazen.”

2 Umbe, impetawag ni Moises si Bezalel, si Oholiab wey is duma pa he mibeǥayan te Nengazen te ketau wey ebilidad te kebaal te nekedseselekawà he vuluhaten, wey utew egkesuat he edtavang te kedterebahu. 3 Ne imbeǥey ni Moises diyà te kandan is langun duen te inhalad te menge Israilihanen he para te kedtukuza zuen te Tulda. Ne kada meselem dutun ed-uwit is menge Israilihanen diyà te ki Moises te idhalad dan. 4 Umbe, mid-ewaan dèpa te menge terebahanti zuen te Tulda is terebahu zan ne midhendiyè dan te ki Moises is egkaǥi te, 5 “Midsubre en is imbeǥey te menge etew te egkinehenglanen te kebeeli te ebpeveelan te Nengazen.”

6 Ne tenged dutun mibpekeǥiyan ni Moises is menge etew zuen te tivuuk he kampu he med-engked dan en he ed-amut te para te kebeeli zuen te Tulda he Ed-ezapan, umbe wazè en human med-uwit diyà te kandin te menge halad sikan is menge etew. 7 Su sikan is ingkeveǥey zan en midsubre en te egkinehenglanen para te kedhimesaza te terebahu.

8 Is langun he memetau he ebpemenerebahu, ne iyan impevaal zan duen te Tulda he Ed-ezapan. Iyan migamit dan te kebaal zan dutun is sepulù he lukut he linu he miburdahan te welin he meiten is kaavuavu zin, merudtem wey kanggan. Ne nepurungan meburdahi heini te zagwey te menge kirubin. 9 Imped-iiring dan is kezekelà te kada sevaha, 42 he ǥiek is kelayat din ne heenem he ǥiek is keluag din. 10 Ne impebpipikit dan is kada lelima he kurtina (umbe nehimu zà haazà he zezuwa he tiglima). 11 Ne mibeelan dan te ebpen-iringen te sising is manggad he meitem is kaavuavu zin is diyà te kada kilid duen te ikezuwa he apid te sevaha zutun te impikit he menge tila. 12 Tig-50 he mibpen-iring te sising is intaud dan diyà te kada kilid ne impedsineruwà haazà. 13 Ne mibaal zan te 50 he kaw-it he vulawan su wey mekedliliib sikan is menge mibpen-iring te menge sising duen te zezuwa he impebpikit he menge tila. Pinaaǥi kayi ne neveelan is Tulda he Ed-ezapan.

14 Ne mibaal zaan sikandan te tambun duen te Tulda. Ne iyan migamit dan is 11 he lukut he manggad he vulvul te kambing. 15 Is kada manggad ne 45 he ǥiek is keluǥayad ne heenem he ǥiek is keluag din. 16 Ne impebpipikit dan te edtahi haazà is lelima he tila, ne iring ded duen te nesamà he heenem. 17 Ne midteuzan dan te 50 he mibpen-iring te sising is kilid duen te in-apid te mibpebpikit he menge tila, 18 ne impedliib dan pinaaǥi te 50 he kaw-it he brunsi.

19 Ne mid-uman pa sikandan mebaal te zezuwa he tambun, is sevaha, lundis te meemahan he kerehidu he midtinà te meriǥà, ne is ikezuwa meupiya he kelasi te lundis.

20 Ne mibaal sikandan te id-elavat dutun te Tulda. Is migamit dan ne tabla he ekasya. 21 Is kada sevaha zutun, ne 15 he ǥiek is keluǥayad din ne dezuwa he ǥiek is keluag din, 22 ne migkurtiyan haazà is kada purù dutun te tabla su wey mekesumpul heini duen te sevaha pa he tabla. Iring kayi is mibeelan dan te kada tabla. 23 Is 20 kayi he menge tabla, ne in-elavat dan diyà te egkezivavà he parti zuen te Tulda. 24 Heini he menge tabla ne impehulma zan duen te 40 he peuntuzà he pelata–su zezuwa he peuntuzà te kada tabla. 25 Is dapit te zizaya he parti zuen te Tulda ne mid-elevatan dan te 20 he tabla, 26 wey impehulma zaan duen te 40 he menge peuntuzà he pelata–dezuwa he peuntuzà is kada tabla. 27 Is dapit te edsenlepan he vahin dutun te Tolda, he iya is divaluy kayi, mid-elevaatan dan te heenem he tabla, 28 wey tig-dezuwa he tabla he para ziyà te kada suyuk. 29 Heini he menge tabla zutun te suyuk ne melig-en is kebpedsumpula zutun te zizalem ne egkeheǥet heini ziyà te divavew pinaaǥi zutun te mid-iring te sising. Iring kayi is mibeelandan dutun te zezuwa he tabla dutun te suyuk. 30 Umbe, zuen walu he menge tabla he para ziyà te menge suyuk wey 16 he menge peuntuzà he pelata kada tabla, egkinahanglan te zezuwa he peuntuzà. 31 Ne mibaal sikandan te menge marku he kayu he ekasya he para te elavat, lelima is para te egkezizaya he vahin duen te Tulda, 32 lelima zaan is para te egkezivavà he vahin, wey lelima pa he para te zapit te edsenlepan he egkeiniyuǥan he vahin duen te Tulda. 33 Ne is ibelavag he ibpeteliwazà, duen te elavat ne intaud dan puun te kilid dutun te Tulda he Ed-ezapan pehendiyà te zivaluy he elavat. 34 Mid-epizan dan te vulawan sikan is menge tabla, ne mibaal sikandan te mibpen-iring te rintì he vulawan he impenaud duen te menge tabla he iyan midlugluǥan duen te menge velavag he mid-epizan daan te vulawan.

35 Ne mibaal sikandan te kurtina he linu, ne miburdahan te welin he meitem is kaavuavu zin, merudtem wey kanggan, ne mibpurungan burdahi te zagwey te kirubin. 36 Ne ziyè dan haazà ipikit te mibeelan dan he heepat he menge tukud he ekasya he mibpen-epizan te vulawan wey midteuzan daan te vulawan he menge kaw-it. Ne ziyà haazà ipehulma is menge tukud te menge peuntuzà he pelata. 37 Ne sikan is gemawan duen te Tulda he Ed-ezapan, mibeelan dan te kurtina he linu he miburdahan te welin he meitem is kaavuavu zin, merudtem wey kanggan. Ne utew heini mibpurungi burdahi. 38 Mibaal zaan sikandan te lelima he tukud he zuen duen menge kaw-it, ne impikit dan dutun sikan is kurtina. Heini he menge tukud, mid-epizan te vulawan ragkes is menge in-ulu zuen wey menge kebilya, ne impehulma heini ziyà te lelima he peuntuzà he brunsi.