1 “Kenè kew mebpenudtul te menge tarù. Kenè niw uǥupi is mezaat he etew pinaaǥi te kedtarùtarù. 2 Kenè kew med-iring te kezekelan dutun te kebaal zan te mezaat. Emun duen idseysey niw ziyà te hukmanan, kenè niw tembuni is hustu minsan supak is kezekelan dutun te kegkaǥi niw te hustu. 3 Kenè niw depiǥi is pubri ziyà te hukmanan tenged te hizu niw kandin dutun te kasu zin.

4 “Emun egkeehè niw is baka etawa asnu te kuntada niw he nekaawà, kuwaa niw ne ihated niw ziyà te kandin. 5 Emun egkeehè niw is asnu he edtundanen te ebpekigkuntada keniyu he egkelilid tenged te karga zin, kenè niw và dà seǥazi, kekenà, uǥupi niw sikandin wey mekehitindeg haazà.

6 “Kenè niw limbungi ziyà te hukmanan is egkaayuayu. 7 Kenè kew medsumbung te tarù he sumbung. Kenè niw hukumi te kemetayen is etew he kenà ereg he edhimetayan, etawa etew he wazà mekesalà, su edsilutan ku is minsan hentei he ebaal kayi.

8 “Kenè kew medawat te sipsip, su is sipsip iyan ebpekepelakap te etew su minsan netuenan din en is tutuu, edtuisen din gihapun is menge lalag te metazeng he etew.

9 “Kenè niw lupiǥi is lumelengyawà, su netuenan niw is kebpekesavuk te lumelengyawà su nehimu kew zaan he lumelengyawà diyà te Ehipto.

10 “Seled te heenem he tuig pemulai niw is menge tanè niw su wey kew sebpeta. 11 Piru zutun te ikepitu he tuig ipehimeley niw is tanè niw pinaaǥi te kenè niw zuen kedterebehuwa. Ne emun duen dutun ebpenuvù he egkekaan, ne haazà egkehimu he keenen te menge zuma niw he pubri, ne is egkesamè dan egkehimu he keenen te menge leew he langgam. Ne iringa niw zed daan kayi is pemuleey niw te paras wey pemuleey te ulibu niw.

12 “Terebahu kew seled te heenem he andew, piru himeley kew emun ikepitu en he andew, su para mekehimeley zaan is menge vaka niw wey menge asnu niw, ragkes is menge uripen niw he neetew ziyà te keniyu, wey is kenà menge Israilihanen he zuma niw he meǥinged. 13 Purungi niw tumana heini is langun he migkaǥi ku keniyu. Kenè kew ampù diyà te zuma he menge ed-ezapen, ne kenè niw hisguti is ngazan dan.”

14 “Seled te senge-tuig ketetelu kew medsilibra te pista he para te kebeǥey kedì te zengeg. 15 Silibraha niw is Pista te Supas he Wazè din Tapey. Seled te pitu he andew iyan niw keena is supas he kenà edtepayan, sumalà is insuǥù ku en keniyu. Ne netendek he timpu is ked-ul-ulaha niw kayi su ziyè dà te vulan he Abib, su iyan haazà bulan te timpu te ked-awè niw ziyà te Ehipto. Dutun he timpu kinahanglan he med-uwit te halad is kada sevaha keniyu kayi te kediey. 16 Silibraha niw zaan is Pista te Kedraǥun pinaaǥi te kedhelaza niw kayi te kediey te egkehuna he menge sebpet niw ziyà te menge bevesukè niw. Ne elin daan silibriha niw is Pista te Tevas emun egkezerengdeng niw en is menge sebpet niw zutun te kegketapus te tuig. 17 Ne medtampu is menge maama keniyu te kada kegkaamur niw seled kayi te tetelu he pista su kinahanglan he ed-ezapen e zan is Nengazen he Egalen niw. 18 Kenè niw ipemuhat kayi te kedì is lengesa he egkelepikan te minsan hengkey he edtepayan. Is tavà te uyaǥen he ibpemuhat niw kedì te pista, ne kenè niw itaǥak taman te meselem, kekenà, emina niw tutunga.

19 “Uwita niw ziyà te valey te Nengazen he Megbevayè niw is kinemeupiyahan duen te egkehuna he egkeraǥun niw ziyà te tanè niw.

“Kenè niw hilutua is nati he kambing te ǥatas te iney zin.

20 “Edsuǥuen ku is belinsuǥuen ku he medhuna keniyu wey kew zin meventayi ziyà te ibayè niw, ne wey kew zin mezuma ziyà te lugar he mid-andam ku para keniyu. 21 Pemineǥa niw sikandin ne tumana niw is egkeǥiyen din. Kenè kew sukul kandin. Su is langun he ebeelan din, ebeelan din pinaaǥi te ngazan ku ne kenè din ebpekewezaan is menge salè niw, etawa kenè kew zin ebpeseyluwen te menge salè niw. 22 Emun ebpurungan niw ebpemineǥa is menge lalag din diyà te keniyu, ne edtumanen niw is langun he egkeǥiyen ku ziyà te keniyu, iyan a egkehimu he kuntada te menge kuntada niw. 23 Edhuna ziyà te ibayè niw is belinsuǥuen ku ne edumahan kew zin diyà te tanà te menge Amorihanen, menge Hitihanen, menge Pirisihanen, menge Canaanhen, menge Hivihanen wey menge Jebusihanen, ne iyan a ebpuew kandan. 24 Kenè niw ezapa wey silbiyi is kandan he ebpen-ezapen, ne kenè niw iringi is menge vaal zan. Purungi niw zèdeeti is menge ed-ezapen dan wey is menge vatu he tedeman dan. 25 Iyan a keniyu ezapa is Nengazen he Megbevayè niw, ne edtuvazan ku sikiyu te keenen wey wahig. Ne id-awè ku is daru ziyà te keniyu, 26 ne zutun te tanè niw wazà keniyu egkerenranan etawa kenà ebpekaanak. Ne ebpengelinteuwan ku he luǥeyazi kew te untung.

27 “Epelihendeken ku wey edliveǥen ku is menge kuntada niw he zutun te egkesineruwan niw ne ebpemekepelaǥuy zan. 28 Ebpehurunan ku te petiyukan is menge Hivihanen, menge Canaanhen, wey menge Hitihanen su wey mesegseg sikandan. 29 Iyan, kenè ku sikandan edsegseǥen seled dà te senge-tuig su emun egkediritsuwan egkeewai te etew heeyan is tanà, ne ed-ubpaan te mahabet he menge leew he langgam ne iyan egkehimu he prublima niw. 30 Ednenenayan ku sikandan te edsegseg su para meiseg kew pa mevuwad su wey niw meeneb haazà is tanà.

31 “Is egketemanan te tanà he ibpaangken ku keniyu ne ebpuun diyà te Zaǥat he Meriǥà pehendiyà te Zaǥat he Mediteraneo, wey ebpuun te disirtu pehendiyà te Wahig he Eufrates. Ebpengelinteuwan ku he mezaag niw is menge etew he ed-ubpà keniyan he tanà su wey niw sikandan mesegseg. 32 Kenè kew pekid-uyun kandan wey te menge ed-ezapen dan. 33 Kenè niw sikandan ipeubpà diyà te tanè niw, su iyan sikandan ibpekesalè niw kayi te kediey. Su emun ed-azap kew te menge ed-ezapen dan, ne iring heini te penuǥes he ebpekeutel keniyu.”