1 Ne neume en is ike-13 he andew te ike-12 he vulan he iyan kes bulan he Adar. Iyan en heini andew te kedtumana zuen te suǥù te hadì. Ne zutun he andew kunaan te menge etew he kuntada te menge Judio ke iyan dan ebpekezaag. Iyan, neveriyung su iyan dan nezaag te menge Judio. 2 Su zutun he andew, midtiǥum is menge Judio ziyà te kada inged he ed-ubpaan dan he sakup te kada prubinsya zutun te ginhedian ni Hadì Ahasuerus, su wey zan mehimetayi is minsan hentei he edsurung kandan. Ne wazà nekesukul kandan su nengahandek kandan is langun he menge etew. 3 Ne is langun he lavew he menge upisyal ziyà te menge prubinsya, wey is menge gubirnedur, menge pengulu wey menge sineriǥan te hadì, midtevangan dan is menge Judio su egkahandek dan man ki Mordecai. 4 Su si Mordecai utew en dekelà is gehem din diyà te turuǥan te hadì; nekeeneb en is bentuǥan din diyà te tivuuk he ginhedian. Ne mid-iseg pa is kegkemekeǥeǥehem din.

5 Ne mibpenhimetayan te menge Judio is langun he kuntada zan pinaaǥi te ispada. Midhimu zan is minsan hengkey he egkesuatan dan te ed-ulaula ziyà te menge etew he ebpesipala kandan.

6 Diyè dà te inged te Susa, 500 is mibpenhimetayan dan. 7 Elin daan midhimetayan dan si Parshandata, si Dalfon, si Aspata, 8 si Porata, si Adalia, si Aridata, 9 si Parmashta, si Arisai, si Aridai wey si Bayzata. 10 Ne heini sikandan is sepulù ne pudu menge anak ni Haman te anak ni Hamedata, he kuntada te menge Judio. Iyan, wazà tevana te menge Judio is menge azen te menge kuntada zan.

11 Ne zutun daan he andew, midtudtul zuen te hadì is kahabet te midhimetayan te menge Judio ziyà te inged he Susa. 12 Ne migkaǥi sikan is hadì diyà te ki Rayna Ester te, “Kayi zà te Susa, 500 is midhimetayan te menge Judio gawas duen te sepulù he menge anak ni Haman he midhimetayan dan. Hengkey vuwa is mid-ulaula zan diyà te zuma he menge prubinsya kayi te ginhedian ku? Ne ǥuntaan, hengkey is edhengyuen nu? Is edhengyuen nu idtuǥut ku kenikew.”

13 Ne migkaǥi si Ester te, “Emun meupiya zà te ǥehinawa nu, Mahal he Hadì, ne iyan edhengyuen ku is: Tuǥuti nu is menge Judio kayi te Susa te ked-uman kebpengalang te keugelingen dan keeselem, iring te mibeelan dan guntaan. Ne ipevitey nu ziyà te vitayà sikan is sepulù he menge anak ni Haman he nemematey en.”

14 Ne insuǥù dutun te hadì he edtumanen is hangyù ni Ester. Impehibelu te menge meǥinged diyà te Susa haazà is suǥù te hadì. Ne impevitey zan sikan is sepulù he menge anak ni Haman he nemematey en. 15 Meselem dutun te ike-14 he andew zutun te vulan he Adar, mid-uman medtiǥum is menge Judio he zutun te Susa, ne nekepatey zan te 300 he menge etew. Iyan, wazè dan tevana is menge azen dutun te menge kuntada zan.

16-17 Hein midlavey is menge andew, midtiǥum is menge Judio he ziyà te nekedseselekawà he vahin te ginhedian su para mepengelangi wey melibri zan is keugelingen dan diyà te menge kuntada zan. 75,000 he menge etew is nepatey zan, piru wazè dan penguwaa is menge azen te menge kuntada zan. Sunud he andew zutun, te ike-14 he andew, midhimeley zan ne mid-andam dan para te pista duma te kedlipeylipey.

18 (Ne is menge Judio ziyà te Susa midtiǥum sikandan hein ike-13 he andew pehendiyà te ike-14 he andew, ne nemenhimeley zan dutun te ike-15 he andew. Midhimu zan heini he andew te kedsilibra wey kedlipey.) 19 Ne iyan heini hinungdan he nehimu he sulunuzen te menge Judio he ziyà ebpen-ubpà te dezeisek he menge inged is kedsilibra te ike-14 he andew te vulan he Adar. Dutun he andew ne ebpeteltelewizè dan te gasa.

20 Insurat ni Mordecai is langun he neulaula, ne mibpeuwitan din te surat is langun he menge Judio, meziyù man etawa uvey, he ziyà te langun he menge prubinsya he nesakup ni Hadì Ahasuerus. 21 Kayi he surat, migkeǥiyan ni Mordecai is menge Judio he silibraha zan kada tuig is ike-14 wey is ike-15 he andew te vulan he Adar, 22 su iyan heini kes menge andew he zutun nelibri zan puun te gehem te menge kuntada zan. Su iyan kes bulan he zutun neilisan te kelipey is kegkeseeng dan wey neilisan te andew te kedlipeylipey kes andew pezem te kedlalew zan. Ne migkeǥiyan dan en maan ni Mordecai zutun te surat he silibraha zan heini pinaaǥi te pista zuma is kedlipeylipey, wey mebpeteltelewizè dan te gasa, ne veǥayi zan is menge egkengeayuayu.

23 Ne midtuman te menge Judio sikan is pahayag ni Mordecai pinaaǥi te surat ne nehimu he sevaha he sulunuzen dan is kada tuig he kedsilibraha zutun.

24 Si Haman he anak ni Hamedata he kevuwazan ni Agag he kuntada te langun he menge Judio, mibpelanu te kegerà te menge Judio. Midripa si Haman su wey zin metueni ke keenu zin sikandan egeraa. Is butang he egemiten te kedripa ne egngezanan he “pur.” 25 Piru hein netuenan duen te hadì haazà he pelanu pinaaǥi ki Rayna Ester, mibpesurat sikandin te belaud he is mezaat he pelanu ni Haman kuntra te menge Judio ne ziyà edhimuwa te kandin. Ne imbitey si Haman ragkes is menge anak din he menge maama. 26 Umbe is kedseuluǥa zan dutun he ne egngezanan te Purim, ebpuun he lalag he “pur.” Ne tenged te surat ni Mordecai wey tenged te neseǥazan dan, 27 neuyun is menge Judio he edsilibrahan dan haazà is dezuwa he andew kada tuig, pinaaǥi te paaǥi he nekaǥi ni Mordecai. Ne heini, impesilibra zan daan te menge kevuwazan dan wey te langun he nehimu he Judio. 28 Heini is dezuwa he andew te Purim kinahanglan he kenà edlipatan, kekenà, edsilibrahan te kada pemilya te menge Judio te kada lapis te kevuwazan diyà te langun he prubinsya wey inged te ginhedian. Kinahanglan he kenè dan ed-engkezan wey edlipatan minsan te menge kevuwazan dan.

29 Para melig-eni sikan is surat mehitenged te Purim, midsurat daan si Rayna Ester, he anak ni Abihail, wey si Mordecai mehitenged kayi he sulunuzen. 30 Ne haazà is surat, impeuwit ni Mordecai ziyà te langun he menge Judio ziyà te 127 he prubinsya zutun te ginhedian ni Hadì Ahasuerus, ne zuen dutun penuvadtuvad he meveǥayi te kelinew wey kelig-en is menge Judio, 31 ne insuǥù dutun te surat he silibraha zan is andew te Purim te hustu he timpu sumalà te insuǥù ni Mordecai he Judio, he iyan daan insuǥù ni Rayna Ester. Edsunuzen dan heini, iring te kedsaunuza zan wey te menge kevuwazan dan te menge sulunuzen mehitenged te kebpuasa wey kedlalew. 32 Haazà is suǥù ni Ester he mibpelig-en te menge sulunuzen mehitenged te Purim, insurat diyà te libru.