1 Puun te suǥud te Moab, midtekezeg ni Moises is Buntud he Nebo, pehendiyà te puntur te Pisga he ebpekesinaru ziyà te Jerico. Ne zutun impeehè kandin te Nengazen sikan is tivuuk he tanà–puun te Gilead pehendiyà te Dan, 2 is tivuuk he tanà te Naftali, is tanà te Efraim wey Manase, is tivuuk he tanà te Juda taman te Zaǥat he Mediteraneo, 3 is Negev, wey is tivuuk he tanà he ebpuun te Suǥud te Jerico (sikan is mahabet is palma zuen) taman te Zoar.

4 Ne zutun migkaǥi is Nengazen diyà te ki Moises te, “Iyan heeyan sikan is tanà he impenaad ku ziyà te ki Abraham, ki Isaac, wey ki Jacob, ne migkaǥi a ziyà te kandan te ibeǥey ku heeyan diyà te menge kevuwazan dan. Impeehè ku heeyan kenikew piru kenè ka mulà ebpekehengkeniyan.”

5 Umbe, minatey si Moises he suluǥuen te Nengazen diyà te Moab, sumalà te nekaǥi te Nengazen. 6 Inleveng sikandin diyà te Moab, diyà te suǥud-suǥud he ebpekesinaru ziyà te Bet Peor, piru ǥuntaan wazà netau ke hendei sikandin ileveng. 7 Is keǥurang ni Moises 120 he tuig dutun te kebpatey zin, piru mezesen pa sikandin ne meupiya pa is ked-ehè din. 8 Midlalew is menge Israilihanen tenged ki Moises diyà te menge suǥud te Moab seled te 30 he andew.

9 Ne zutun, si Josue he anak ni Nun mibeǥayan te Mulin-ulin te ketau su mibpilì sikandin ni Moises he ilis kandin pinaaǥi te kedepeneti zin kandin. Umbe mibpezumazuma kandin is menge Israilihanen, ne mibeelan dan is langun he insuǥù te Nengazen pinaaǥi ki Moises.

10 Puun dutun wazè en ebpeneuven diyà te Israel he iring ki Moises te nepurung mekilala te Nengazen. 11 Midsuǥù te Nengazen si Moises diyà te Ehipto te kebaal te menge singyal wey menge egkein-inuwan he menge vaal su wey mezaag is hadì dan, menge upisyal zin, wey te tivuuk he nasyun din. 12 Wazà duma he nekehimu te mekeǥeǥehem wey egkein-inuwan he menge vaal he iring te mibeelan ni Moises diyà te etuvangan te langun he menge Israilihanen.