1 Dutun he timpu midtiǥum te menge Filistihanen is menge sundaru zan diyà te Soco he sakup te Juda, para te tebek. Migkampu zan diyà te Efes Damin he pid-elangan te Soco wey Azeka. 2 Midtiǥum daan ni Saul is menge Israilihanen ne ziyè dan megkampu uvey te menge Suǥud he Elah. Nengandam dan te kebpekidtebek te menge Filistihanen. 3 Nekedehipaǥà is buntud he midtiǥuman te menge Filistihanen wey is buntud he midtiǥuman te menge Israilihanen, ne suǥud-suǥud is nekepetug-elang dutun.

4 Duen sevaha he etew he tig-Gat he metau he ebpekidtebek. Iyan ngazan din si Goliat. Migawas dutun te kampu te menge Filistihanen ne mid-uvayan din is kampu te menge Israilihanen. Subra he siyam he ǥiek is kelangkew zin. 5 Is kalù din ne brunsi, wey brunsi zaan is pengalang te kumeng din he iyan keveǥat din is 60 he kilus. 6 Ne is menge vuvun din wey lisen ne mibpengelangan daan te brunsi, wey ziyà te peka zin is brunsi he kelawit. 7 Is bangkew zin ne meveǥat wey mekepal; is purù dà kayi he vangkew ne menge pitu he kilu is keveǥat. Ne edhuna kandin is tig-uwit te kelasag din.

8 Midhitindeg si Goliat ne migkulahì din is menge Israilihanen, “Maan is mezakel kew is ebpekidtebek? Sebsevaha ku zà he Filistihanen piru mezakel kew mulà is menge suluǥuen ni Saul. Pilì kew te sevaha he etew he ebpekidtebek kedì. 9 Emun egkepatey e zin, egkehimu he egkeuripen key keniyu, ne emun iyan sikandin egkepatey ku, iyan kew egkehimu he menge uripen dey wey ebpenilbi kenami. 10 Guntaan, edhinggaten ku sikiyu! Ipehendini niw is egkeseriǥan niw he ebpekidtebek kedì.” 11 Nezineg haazà ni Saul wey te menge Israilihanen ne utew zan nahandek.

12 Duen anak ni Jesse he si David. Si Jesse ne sevaha he Efratahanen he ziyà ed-ubpà te Betlehem he sakup te Juda. Meǥurang en sikandin dutun te timpu te iyan pa hadì si Saul te Israel. Walu is anak din he pudu maama. 13 Is tetelu he kakey he menge anak din miduma ki Saul te ebpekidtebek. Is kinekekayan ne iyan si Eliab, is ikezuwa ne si Abinadab, ne is iketelu ne si Shama. 14 Is kineheziyan ne iyan si David. Ne zutun te keduma zutun te tetelu ziyà te ki Saul te kebpekidtebek, 15 si David mulà ed-ulìulì dà diyà te Betlehem puun te kampu ni Saul su ed-atimanen din is menge kerehidu te amey zin.

16 Taman te 40 he andew is kebpenhinggat ni Goliat te tebek te menge Israilihanen maandew wey mezukilem.

17 Sevaha zutun he andew, migkeǥiyan ni Jesse si David te, “Mama, gaanggaan ka telukun te menge kakey nu ziyà te kampu ne uwita nu heini is tengà te saku he midsandag he trigu wey sepulù he vuuk he supas. 18 Uwiti nu zaan is peremandar te menge sundaru te sepulù he kisu. Susiya nu zaan ke nemenumenu en is menge kakey nu, ne likù ka kayi ne uwit ka te tuus he meupiya is kebpekesavuk dan. 19 Diyè dan guntaan te menge Suǥud he Elah, su ebpekidtebek dan te menge Filistihanen duma zan si Saul wey is duma he menge Israilihanen.”

20 Umbe, zutun te sunud he andew midsayu med-enew si David, ne mid-andam te egkeenen he ed-uwiten din. Ne impeventayan din is menge kerehidu zin duen te sevaha he bekidu, ne migenat sikandin sumalà te migkaǥi kandin te amey zin. Ne hein nekeuma sikandin diyà te kampu te menge Israilihanen, nenggawas is menge sundaru he ebpemengulahì te kulehian te ebpekidtebek. 21 Dutun ne naandam en is menge Israilihanen wey menge Filistihanen he ebpekidtebek. 22 Intaǥak ni David kes menge uwiten din dutun te sineriǥan he ebantey te menge azen te menge sundaru, ne mibpelelaǥuy sikandin diyà te edtebekan te menge sundaru ne migkemusta zin is menge suled din. 23 Ne te kemulu sikandin ebpekidlalag kandan, mid-uvey si Goliat kes tig-Gat he metau he ebpekidtebek, ne edhinggaten din is menge Israilihanen ne nezineg heini ni David. 24 Hein naahà te menge Israilihanen si Goliat, nemelaǥuy zan is utew egkengehandek. 25 Mibpetudtudtulà sikandan te, “Neehè niw ve kes etew he lelayun ebpenginggat kenitew te menge Israilihanen? Ebeǥayan kun te hadì te zekelà he suhul is ebpekepatey kandin. Ne kenà iyan dà heeyan, su ibpeesawa zin pa is anak din kandin, ne kenà ibpevayad te vuhis te Israel is pemilya zin.”

26 Mid-insaan ni David is menge etew he nemenhitindeg diyà te uvey zin, “Hentei ves heeyan is Filistihanen he wazà mekekilala te Megbevayà? Maan is ebpemenhinggat te menge sundaru te uuyag he Megbevayà? Ne hengkey is egkezawat te etew he ebpekepatey kandin wey meengked is kebpeel-elezi zin te Israel?” 27 Midtudtul te menge etew ziyà te kandin is nehisgutan mehitenged te suhul he egkezawat te etew he ebpekepatey ki Goliat.

28 Dutun te kegkezineǥa ni Eliab, he kinekekayan he suled ni David te nekidlalag sikandin te menge etew, nepauk sikandin. Migkeǥiyan din si David te, “Maan is midhengkayi ka? Hentei is impevantey nu te menge kerehidu tew ziyà te sibsivayan he pira zà he leǥas? Utew ka mepedeligen. Mezaat is ulaula nu! Midhengkayi ke zà wey ka mekaahà te tebek.” 29 Midtavak si David te, “Hengkey ves daan is mibeelan ku? Mid-insè e zè man!” 30 Ne midhendiyà si David te zuma is ebpenginginsà te iyan ded kes impenginginsè din, ne iyan tavak te menge etew kes intavak ded kandin.

31 Is menge kebpenginginsà ni David ne nezineg ni Saul, umbe impetawag sikandin ni Saul. 32 Hein nekeuma si David, migkeǥiyan din si Saul te, “Kenà engayan he zuen sevaha he egkaawà is kevurut tenged keniyan te Filistihanen. Iyan a is suluǥuen nu ebpekidtebek kandin.” 33 Midtavak si Saul te, “Kenè ka ebpekesukul te kebpekidtebek kandin. Batè ke pa ne sikandin mulà daan en he veǥani puun pa te vatè pa sikandin.” 34 Piru midtavak si David te, “Datù, puun pa te vatè e pa ebantey ad te kerehidu te amey ku. Emun edewiyen te erimaung wey ke bir is kerehidu, 35 edel-asen ku heini ne edlegkuten ku, ne egkuwaan ku haazà is kerehidu. Ne emun edsukul kedì edekepen ku ne egewezan ku ziyà te lieg ne ebpenlegkuten ku taman te ebpatey. 36 Neveelan ku en heini ziyà te erimaung wey ziyà te bir, ne ebeelan ku zaan heini keniyan te Filistihanen he wazà medtuu te Megbevayà, tenged te edhinggaten din is menge sundaru te uuyag he Megbevayà. 37 Is Nengazen he midluwas kedì dutun te erimaung wey bir edluwas daan kedì kayi te gehem te Filistihanen.”

Migkeǥiyan ni Saul si David te, “Uya, hipanew kad, berakat he iyan is Nengazen eduma kenikew.” 38 Impeseluub ni Saul ki David kes bisti zin para te tebek–kes kalù he brunsi wey kes pengalang te kumeng. 39 Inseluniket ni David kes ispada ni Saul ne migezam medhiphipanew tenged te wazè din heini meleyami he gamit. Migkeǥiyan din si Saul te, “Kenà a edselu-ub te iring kayi emun ebpekidtebek a su wazè ku meleyami heini.” Ne mibpenluwas ni David haazà. 40 Ne migkuwa zin is tuked din, ne mid-amì te lelima he metilak he vatu ziyà te zal-ug ne intaǥù din diyà te lundis he mibeelan he puntir. Mid-uwit din is lempawes din ne mid-uvayan din si Goliat.

41 Mid-uvayan daan sikandin ni Goliat ne edhuna kandin is tig-uwit te ǥumaan din para te tebek. 42 Hein naahà ni Goliat si David he vetan-en pa wey mataid ne meriǥàriǥà is kedlulundis din, ne mid-undaunda zin dà. 43 Migkeǥiyan din si David te, “Asu e ve he mid-uwitan nu te lagkut?” Ne midrewakan din si David pinaaǥi te ngazan te ed-ezapen din. 44 Ne migkaǥi sikandin te “Uvey ka kayi, su ibpekaan ku is lawa nu he minatey te menge tagbis wey memevurut he langgam!” 45 Midtavak si David te, “Ed-uvayan a kenikew he ebpekidtebek he zuen ispada nu, wey bangkew, wey kelawit piru ed-sukulan ku sikew pinaaǥi te ngazan te Nengazen he Mekeǥeǥehem, is Megbevayà te menge sundaru te Israel he edhinggaten nu. 46 Guntaan he andew, ibeǥey ka kedì te Nengazen; edhimetayan ku sikew ne edtempezen ku is lieg nu. Wey te heini he andew ibpekaan ku te menge tagbis wey memevurut he langgam is menge ebpematey he menge Filistihanen. Ne egketuenan te tivuuk he kelibutan he zuen Megbevayà te Israel. 47 Is langun he nevurun kayi egketau he ebpekeluwas is Nengazen te keet-etawan din minsan wazà ispada wey vangkew, su is Nengazen iyan en ebpekidtebek, wey ibeǥey kew zin is langun kenami.”

48 Dutun te kemulu en ed uvey si Goliat kandin, mibpelelaǥuy si David he edtelavuk kandin. 49 Migkuwa si David te vatu zutun te teleǥuey zin he lundis te menanap, ne iyan heini imbala zin ne inlempawes din ki Goliat, ne ziyà meigù te vuked din. Neketeleveng kes batu zutun te vuked din, ne nepiley sikandin he nekelangkeb.

50 Umbe, pinaaǥi te lempawes nekezaag si David ki Goliat wey pinaaǥi zà te sevaha zà he vatu. Nepatey zin si Goliat minsan wazè din ispada. 51 Mibpelelaǥuy ni David si Goliat ne migkuwa zin is ispada zin, ne mibpungelan din te ulu. Hein naahà te menge Filistihanen he minatey en kes sundaru zan he metau he ebpekidtebek, nemelaǥuy zan. 52 Ne mid-uvayan te menge sundaru te Israel wey Juda he ebpemengulahì, ne midal-as dan is menge Filistihanen taman te Gat wey Ekron. Nekepeyapat is menge minatey wey menge tegepalì te menge Filistihanen diyà te zalan puun te Shaaraim taman te Gat wey Ekron. 53 Hein nepasad dan te edal-as is menge Filistihanen, nenlikù dan ne mibpenguwa zan is azen he nengetaǥak diyà te kampu te menge Filistihanen. 54 Migkuwa ni David is ulu ni Goliat ne mid-uwit din diyà te Jerusalem, ne ziyè din isavuk te tulda zin is menge ǥumaan ni Goliat.

55 Hein naahà ni Saul si David he ed-uvey ki Goliat he ebpekidtebek, mid-insaan din si Abner he peremandar te menge sundaru te, “Abner, hentei ves ki anak heeyan is betan-en?” Midtavak si Abner te, “Wazè ku metueni, Mahal he Hadì.” 56 Migkaǥi si Saul te, “Penginginsè ka ke hentei sikandin ki anak.”

57 Hein nekelikù si David diyà te kampu zan he nepatey zin en si Goliat, miduma sikandin ni Abner ziyà te ki Saul. Midbitbit ni David is ulu ni Goliat. 58 Mid-insaan ni Saul sikandin te, “Mama, hentei ke ves ki anak?” Midtavak si David te, “Anak a te sakup nu he si Jesse he tig-Betlehem.”