1 Hein midlavey en is pitu he vulan te ked-uwita ziyà te Filistia zuen te Kavan te Nengazen, 2 impetawag te menge Filistihanen is menge memumuhat dan wey menge veyilan ne mid-insaan dan te, “Hengkey is ebeelan dey kayi te Kavan te Nengazen? Sembaǥi key ke ebmenmenuwen dey heini he ikeulì dey ziyà te lugar he nesevukan din.” 3 Midtavak sikandan te, “Emun id-ulì niw heini is Kavan te Kebpekid-uyun te Megbevayà te Israel, ne kinahanglan he ed-uwit kew te pemuhat he vayad te salà. Iyan heini paaǥi he egkengeulian kew wey egkesavut niw ke maan is edsilutan kew zin.”

4-5 Ne mid-insà kes menge Filistihanen, “Hengkey he pemuhat is ibpeuwit dey he ibayad te salè dey kandin?” Midtavak kes menge memumuhat wey menge veyilan te, “Diyun kew te lelima he vulawan he purma te levag wey lelima he vulawan he purma te rumat, su lelima is kezakel te menge pengulu tew, ne levag is kezeetan he neeǥiyan tew wey te menge pengulu tew, wey zuen daan menge rumat he mid-uwit te kezeetan kayi te nasyun tew. Ihalad niw heini su wey meveǥayi te zengeg is Megbevayà te Israel, su kela ke ed-engkezan kiw zin en te edsilut, wey is menge ed-ezapen tew, wey is nasyun tew. 6 Umbe, kenè niw ipemezesen is gehinawa niw iring te mid-ulaula te menge Ehiptohanen wey kes hadì dan. Wey zan en ipehipanew kes menge Israilihanen hein impaantus dan en utew te Megbevayà. 7 Ne guntaan, baal kew te veǥu he kerumata wey kuwa kew te zezuwa he vehiyan he vaka he wazè pa keenu mesengeni te eyuǥu. Ne sengeni niw te kerumata, piru kenè niw en ipezuma kes menge nati zan, kekenà, durengè niw heini ziyà te tudil. 8 Ne kuwaa niw kes Kavan te Nengazen ne isavuk niw zutun te kerumata. Ne izurug niw kes kavan he midteǥuan duen te menge vulawan he midkurtiyan, he iyan kes idlapik niw he pemuhat he vayad te salà. Ipehipanew niw kes menge vaka, ne beleǥaza niw en ke hendei ebpevayà, 9 piru ahaa niw zà. Emun edtekezeg he ebpehendiyà te Bet Shemesh, he sakup te tanà te menge Israilihanen, egketuenan tew he iyan is Nengazen teǥivaal te neulaula kayi te kenitew he utew mereǥen. Ne emun kenà, ne egketuenan tew he kenè bes heini vaal te Nengazen, kekenà, nehitavù dè bes.”

10 Ne midtuman dan haazà. Migkuwa sikandan te zezuwa he inayan he vaka ne midsengenan dan te kerumata. Ne is menge nati, ne midureng dan diyà te tudil. 11 In-untud dan te kerumata kes Kavan te Nengazen wey kes kavan he mid-ehukan dan duen te menge vulawan he midiyun dan he iring te menge rumat wey henduen te menge levag. 12 Ne impeǥenat dan haazà is menge vaka ne midtandang haazà diyà te Bet Shemesh ne wazà medsuwey te zalan, is ebpemen-engà. Ne midsunud kes menge pengulu te menge Filistihanen taman te dulunà te Bet Shemesh.

13 Ne zutun he penahun, ebpemenraǥun is tig-Bet Shemesh te trigu ziyà te menge suǥud. Ne hein neehè dan kes Kavan te Kebpekid-uyun, nengesuatsuat dan utew. 14-15 Hein nekeume en kes kerumata zutun te vevesukà ni Josue he tig-Bet Shemesh, ne ziyà heini medtaman te kilid he zuen duen dekelà he vatu. Migkuwa te menge kevuwazan ni Levi kes Kavan te Nengazen wey kes kavan he mid-ehukan duen te vulawan he migkurtiyan, ne in-untud dan dutun te zekelà he vatu. Ne migurey zan kes kerumata ne midhimetayan dan kes menge vaka su pemuhat he edtutungen para te Nengazen, wey zuen pa zuma he impemuhat dan. 16 Naahà te lelima he pengulu te menge Filistihanen haazà is mibeelan, ne nemen-ulì dan human diyà te Ekron te haazà he andew.

17 Haazà is lelima he ziniyun he vulawan he henduen te levag, ne impeuwit puun diyà te lelima he inged he sakup te Filistihanen: Ashdod, Gaza, Ashkelon, Gat, wey Ekron. Impeuwit dan heini para te Nengazen he pemuhat he vayad te salà. 18 Ne iring ded daan kes lelima he vulawan he iring te midiyun he rumat, su is kezakel zutun, ne iring te lelima he inged te Filistihanen he binerengbeng. Heini he menge inged wey is menge inged he nekepelingut kayi, ne midetuan te lelima he pengulu. Kes dekelà he vatu ziyà te vevesukà ni Josue diyà te Bet Shemesh, he mid-untuzan dan dutun te Kavan te Nengazen, kemulu pa heini ǥuntaan he menge penahun su sevaha heini he tuus te nengehitavù.

19 Duen 70 he tig-Bet Shemesh he midhimetayan te Megbevayà su mid-ehè dan kes seled dutun te Kavan te Nengazen. Inlalew te menge meǥinged haazà is utew mesakit he silut kandan te Nengazen. 20 Ne zutun nekekaǥi sikandan te, “Hentei is ebpekeetuvang te Nengazen, kes Waǥas he Megbevayà? Hendei tew vuwa ibpeuwit is Kavan te Nengazen para mekeziyù kayi te kenitew?” 21 Midsuǥù sikandan te etew he ibpepenudtul ziyà te tig-Kiriat Jearim he egkaǥi te, “Inlikù te menge Filistihanen kes Kavan te Nengazen. Kuwaa niw kayi wey uwita niw ziyan te keniyu.”