51
David ana rupena
Mara tagogi, Gulau David ana taunola Uriah awana Bathsheba i tavimatanei da maiteni i matave.
1 Oo God, ma raunuʼapoapoeleu. Tam nuavaina maemae-nonoana amai.
Tam raraunuapoapoei amai
au ḡoʼapoapoe ma notatawanei.
2 Au rauaḡaiḡai ma oḡai
ma au ḡoʼapoapoe ma oḡa-tawanei.
3 Au rauaḡaiḡai a aramanei
marana patapatai a notanotai.
4 Kaua apoapoei a kauei.
Tam ainelam awarim Ḡoa apoapoei a kauei,
ma am viwavu lamna riwa kaua.
Amapo anina da ma kovoḡiu.
5 Tau rauaḡaiḡaiu, melamelauei da marina
Au manawa da marina tau ḡoʼapoapoe taukaueina.
6 Wate tam u ḡoei da riwa kaua au ora-dewadewau ina mae.
E viviararamaniu da nuaulaula orau ina oai.
7 Au ḡoʼapoapoei ma oḡa-tawanei,
ma oḡaiu da ana arapoira da gonu rovena arapoirana ana ḡetawanei.
8 Ma riweu da au ḡoʼapoapoe u nota-tawanei
da ana vinuaiaii ma ana morelana
avena * Au vinuabola lamna me gelamiu wanagainada gelamiu u viaigaigai, marina ana vinuaiai.
9 Au goʼapoapoe ma inana-tawanei
ma au apoapoe mirai ma boai.
10 Oo God nuanua ma ravivouni
da ana vipatutu kaua awarim.
11 Eḡa au naom ma tawana-opuneu
ma awariu eḡa Aruam Vivivireina ma vaitawanei.
12 Vilawana nuaiaina ma ravivouni me au naona nanare
aruau ma viaiaini da ana voteletelem.
13 Lamnei, ḡoʼapoapoei taukauei am kaua ana viararamani,
da ina mae-tavirei awarim.
14 Oo God, viʼraḡena vitana awariu ma vaitawanei,
da am kaua jijimanii ana welei.
15 Oo Bada ipiriu ma votawanei da gamou ina vimaeḡaeḡaenim.
16 Au pulo, ḡamoḡamo ata apui awarim,
wate tam pulo apuapunana eḡa uta vinuaiaiei.
17 Bada, pulo e ḡoeḡoei lamna vilamolamona.
Bada, eḡa au vilamolamona ma au rupena ma geduaiei!
18 Am nuavaina Jerusalem ma viaiaini,
ma ana gari ma voa-melei.
19 Anina ma ai pulo nota aiainei ina vikarena-melei da ina kaukauei ma ma vinuaiaiei.
Taui pulo tapuna ma tapuna ina apui awarim.
Bull maḡamaḡaui am au aniamapu ina apuapui.