1 Ma mai Israel i vomairi da Moab au wapuna, Waira Jordan au adana i rauḡaravu, ma au baba ḡelauna Jeriko taon. 2 Ma mai Israel aiwai i kauei mai Amori awari, Zippor natuna Balak anatapuna i ʼnana-pai. 3 Mai Israel i maḡa kaua ma lamna aubaina mai Moab i rovo kaukaua, rovo ita iraḡelei. 4 Ma mai Moab mai Midian babadai i riwei i pa, “Aburuna ava ma wei patarana aiwai anatapuna au ririvata ina pupuna-pai, me bulumakau au wapu modu e amam.”

5 Anina ma Moab ai gulau Balak, Beor natuna Balaam ana riwa i paritawanei au Pethor, waira ḡaeḡaena wavana Euphrates au ririvana. Ana riwa wenanare, “Dam tagogi Egyptei i opu, ma dobu anatapuna e vaivaia ma marina au ririvau i rauḡaravu. 6 Taui i virewapana kaua eḡa me tau, ma nei ma ravai ma parivai-iviapoapoeni, mepa da tau ravai ana vovaiubai ma wei dobunei ana viaḡaḡana-opunei. Aramanei da maranai tam rava e viviaiaini tauna viaiaina e vaivaia ma maranai u parivai-apoapoeni tauna ina apoapoe.” 7 Ma Midian ma Moab babadai mane i vaia Balaam vimaiana aubaina ma i vomairi. Ma i ḡeta Balaam awarina ma Balak ana riwa i pariverei. 8  Balaam ravai i paribelei i pa, “Weka ona matave ma au maratom Bada aiwai ina riweu ana pariveremi.” Ma babadai kampa Balaam maiteni i mae. 9 God i nei ma Balaam i vitara-virevirei i pa, “Aiavoi i nei awarim?”

10  Balaam i paribelei, “Zippor natuna Balak, Moab ai gulau wei riwana i paritawaneiai i pa, 11 ‘Ma rautaniḡana dam ḡaeḡaena Egyptei i opui ma dobu anatapuna e vivioai. Ma nei ma aubaiu ravai ma ḡaḡalei, da maiteni ana viḡaiḡaiawa ma ana viagagei da ina vinelana.”

12 Wate God Balaam i riwei i pa, “Eḡa maiteni ma nae. Eḡa wei ravai ma ḡaḡalei aubaina Tau au viaiaina awarii.”

13 Ubaubanai Balaam i nae ma Balak ana taupariverena i riwei, “Ona nae me ami au melaḡai! Bada eḡa ita vianineu da maitemi tana nae.”

14 Ma Moab babadai i nae me ai bada Balak awarina ma i riwei i pa, “Balaam eḡa ita goei da ita nei.”

21 Ma ubaubanai Balaam i vomairi ana donki i vokaukauei ma Moab babadai maiteni i nae. 22 Wate God amlona i ḡaiḡai kaua da Balaam i nenae, ma ana anela i paritawanei da ana etanai i mae-tomeni. Balaam donki i gerui ma ana taunola ruaḡa maiteni i nenae. 23 Ma maranai donki Bada ana anela i ʼnanai ana sodna au etanai i maimairi ma i tawana-ruiei au ririva. Balaam donki i kwakwapui da ita opu me au etanai.

24 Ma Bada ana anela etanai ḡuriḡuririna i mae-potai, Grape ḡoroḡorovai epaepana ruaḡa ḡaimei i garigaria au poui. 25 Maranai donki Bada ana anela i ʼnanai ma ita deḡa lamna Balaam aena au gari i viairaturatui. Ma Balaam donki i kwapu-melei. 26 Ma Bada ana anela i nae ma etanai au ḡuriḡuririna i mairi, weka eḡa gabu ita mamae-dadana da taui ita deḡa. 27 Maranai donki anela i ʼnanai, i mae-ḡaira da i kiala, Balaam amlona i ḡaiḡai kaua ma ana jiḡonei donki i kwapui.

28 Anina ma Bada donki gamona i votawanei da i babani i pa, “Aiwai apoapoena a kauei awarim da mara tonuḡa u kwapuiu?”

29  Balaam donki i riwei i pa, “Tam u vikalokaloeu me bua! Awariu sod lamna marina ata viraḡenim.”

30 Ma donki Balaam i riwei i pa, “Tau donkina tagogina marana patapatai u gerugeruiu bo? Wenanare a kauana dadanei awarim bo eḡa?”

Balaam i riwa, “Eḡa!”

31 Ma Bada Balaam matana i vikalai da ana anela i ʼnanai ana sodna i maimairi au etanai. Ma i mae-ḡaira au doa ma i raudune.

32 Ma Bada ana anela i riwa i pa, “Aiwai aubaina am donki mara tonuḡa u ravi? Ma nonori am vaḡai lamna eḡa aiaina, Tau a nei da ata viḡaem.

33 —Mara tonuḡa am donki i ʼnanaiu ma mara tonuḡai i deḡeu. Mepa da eḡa, lamna tau ata viraḡenim ma donki ata voterei.”

34 Ma Balaam Bada ana anela i riwei i pa, “A kauana-boai. Eḡa ata aramanei da tam au etanai u maimairi da uta viḡaeiu. Marina mepa da u notai da eḡa ita ai au matam, tau ana nae me.”

35  Bada ana anela i riwa i pa, “Ravai maiteni ma nae, wate aiwai ana riwem lamna ava ma latoni.” Anina ma Balaam, Balak ana babadai maiteni i nae.