15 Ma maranai Jacob i ʼraḡe, Joseph tuatuana i rovo ma i riwa, “Mepa da Joseph amlona ina ḡaiḡai ma ina raubiwa, kaua apoapoena awarina ta kauei aubaina.” 16 Ma lamna aubaina riwa i paritawanei Joseph awarina i pa, “Amata maeninai ma wenanare i riwelai i pa, 17 ‘Joseph wenanare ona riwei, “Tuatuam kaua apoapoe kaukauana awarim i kauei. Wate a ḡoei da ai kaua apoapoe ma nota-tawanei.” “Tauai amam ana God a vovoepaepai, ma a vivibaḡa-guratem da ai ḡoʼapoapoe ma nota-tawanei.” Maranai Joseph wei riwana i nonori tauna orana i viara kaua ma i tou.

18 Anina ma tuatuana i nei ma au naona i mae-peu ma i riwa, “Ma inanaiai tauai am taunola a nei.”

19 Wate Joseph taui wenanare i riwei, “Tau eḡa ona rovoeu, tau eḡa God da ana kovoḡimi. 20 Wariaḡa o ḡoei da ota viapoapoeniu wate God i virai da aiaina i kauei da rava maḡamaḡaui ina vilawani ma eḡa ina pupu. 21 Anina, eḡa ona rovo! Tau ana painimi, natunatumi maiteni.” Ma nanare i babani da orai i rauei.