1 Ma raviraviai anela ruaḡa au Sodom i ḡeta, Lot melagai au metaetana i kiakiala.* Melagai, ḡaimei i gari-kwaviviroi; ma metaeta tagogi bo ruaḡa i tereterei. Weka i kiakiala gimara bo viboruboru ma i viviogatara. Maranai Lot taui i ʼnanai, i vomairi da i nae awarii ma i raudune. 2 Ma i riwa i pa, “Au babada, tau ami taunola a nei, ona nei au au numa. Aemi ona oḡai ma ona matave. Maratomtomai ona vomairi da ami au aninae ona nae.”

Ma taui i paribelei i pa, “Eḡa! Tauai weka au deba ana matave.”

3 Ma i riwana bagibagi da maiteni i nae ana au numa. Lot, palawa eḡa yist† Eng. Yeast. maiteni i apui ma taui i am.

4 Ma ita matave ma mai Sodom nelarai laralaragai ma magumaguri anatapui i nei da numa i kwaipipini, 5 ma taui Lot i kwatuei i pa, “Nelara ruaḡa waguvarai i nenei awarim, taui mepa? Ma opuneiai awariai da ana viawawanei.”

6 Ma Lot i opu taui awarii ma au murina metaeta i gudui. 7 Ma i riwei i pa, “Au rava a vivibaḡaimi, eḡa wei kauai apoapoei ona kauei. 8 Ona rautaniḡaneu, tau natunatu waivinei ruaḡa, taui matatapu. Ana opuneiai awarimi da ami ḡoana nanare ona kauei. Wei nelarai a neiai au numa lamna tau au taomana ma eḡa aiwai awarii ona kauei.”

9 Ma Sodom nelarai i paribelei i pa, “Ma maeria! Tam dobu ḡela ravam weka e mamae-gubai ma marina u ḡoei da ma vibadabada. Marina ana viapoapoena-kauem eḡa me taui ruaḡa!” Ma taui Lot au metaeta i dudu ratui da gudu ita rikai. 10 Wate nelara ruaḡa numa au orana urai i tere-opunei ma Lot i taina-ruiei awarii ma metaeta i gudui. 11 Ma nelara anatapui au metaeta matai i viaipotai mara tupona ava da eḡa tagotagogina metaeta ita inanai.

12-13 Anina ma nelara ruaḡa Lot i riwei i pa, “Tauai marina wei dobuna ana pupuni. Bada, vikaruwaḡawaḡa maḡamaḡaui i nonori wei melagaina ravai awarii ma Tauna, tauai i paritawanelai da dobuna ana pupuni. Am dam ravai ḡelaui weka e mamae bo eḡa? Natunatum nelarai ma waivinei ma poipoiam ma am rava aiavoi au melagai maemaei; ma taravaina-opunei!” 14 Ma Lot i opu natunatuna ai ḡopapara awarii ma i riwei i pa, “Bada marina dobuna ina pupuni. Laḡilaḡina, wei dobuna ona oputawanei.” Ma taui i notai da tauna i vivinama.

15 Ma mara karena i tereterei ma anela Lot i vivibaḡai da ita volaḡilaḡina. Ma i riwa i pa, “Eḡa ita ai da ma iraḡe maranai Bada wei dobuna ina pupuni. Laḡilaḡina awam ma natunatum maiteni ona opu.” 16 Wate Lot i tatavira. Bada i ḡoei da Lot ita vilawani. Ma anela Lot awana maiteni ma natunatui urai i vojijini ma melagaiei i taravaina-opunei.

17 Maranai melagai i opu-tawanei ma anela tagogi taui i riwei i pa, “Ona ruba ami lawana aubaina! Eḡa au murimi ona inana ma eḡa au wapu ona tumairi dadana. Ola aubaina ona ruba da ami lawana eḡa ona vine-boai.”

23 Ma madeḡa i gogogo ma Lot ana numa ravai maiteni au melagai Zoar i ḡeta.‡ Hebrewei wava Zoar anona Aburu. 24 Lamna maranai Bada salpa araratana marei i paritawanana ḡaireiai me garewa, Sodom ma Gomorah melagaii au tepai. § Salpa lamna ḡaima logalogana. Maranaina e ararata, lamna i vibola kaua ma puḡuna i apoapoei. 25 Ma melagaii, wapu, rava anatapui ma aiwai gogogoi i aragibui. 26 Ma Lot awana i vivimuri, i mae-tavirei ma i ravi-taputapui.

27 Ma ubaubanai boiboḡi Abraham i vomairi ma i nae mepa Bada maiteni i bababani lana. 28 Ma i ʼnana ḡaira Sodom ma Gomorah ma wapuna ana taputapuna ma kampa bau potopotona i ʼnanai i ḡeḡae. 29 Maranai God nai melagaii ma wapuna i pupuni, tauna Abraham eḡa ita notavai-nuavurui. Ma lamna aubaina God Lot i paritawana-opunei ma muriai nai melagaina i vipupui.