2 King
Gulagulau Viruaina
Pariverena
Gulagulau ai buka viruaina lamna mai Israel e bababaniei. Gulau David ana vibadana au murina, aiwai i tupua lamna wei bukai ruaḡa gulagulau naona ma viruiaina e ririweta. Gulagulau bukana naona e ririweta David au murina Solomon menanarena da i vigulau.
Solomon iʼraḡe ma au murina Israel i kai da baba ruaḡa. Dobuna au rauanaḡei i ḡorei Judah ma au lavaratei i ḡorei Israel. Maranai mai Judah ma mai Israel gulagulaui, God i voteletelei lamna nuauba i mae. Wate maraḡela gulagulaui God i rawaḡaiḡaiei ma god ḡelaui i raudunelei. Anina ma nuabola i tupua.
Maranai mai Israel God votelatelana i voterei, Tauna peroveta i paritawanei awari. Ma Gulagulau bukana viruaina au orana lamna peroveta wavana naenaena Elisha. Tauna God ana rewapanei kaua ḡaeḡaei i kaukauei, ma rava awari i jimajima da ita mae-tavirei God awarina.
Elisha iʼraḡe ma au murina, gulagulau maḡamaḡaui i apoapoe kaua. Anina ma God ana rava i kovoḡi ma lamnei ai ḡavia taui i vovaiubai ma i pani ma i naiei. Au naona mai Israel awari i tupua ma muriai mai Judah awari i tupua. God ana rava mai Judah eḡa ita vianinei da ita nae me ai au dobu da madeḡa 70 i kwa.
Virarautua rereḡana
Israel i kai da Vibadana ruaḡa, Israel ma Judah 1:1—17:41
Peroveta Elijah ana virarautua 1:1—13:20
Judah gulagulaui ma Israel gulagulaui ai virarautua 8:16—17:4
Assyria gulauna Samaria i vovaiubai ma Israel i pupuna-naiei ma ana vibadana i kwa 17:5-40
Judah gulagulaui ai virarautua 18:1—21:26
Gulau Hezekiah ana au vibada i raukarei ma i nae da gulau Josiah ana au vibada 18:1—21:26
Judah gulagulau damona ai virarautua 23:31—24:20
Babilon gulauna Jerusalem i vovaiubai da Judah ana vibadana i vikwai 25:1-30.
2
Elijah i ḡaiei au mara
1 Ma mara i ḡetai da Bada Elijah labuei ita ḡaiei au mara. Elijah ma Elisha Gilgal i voterei ma i nenae. 2 Ma Elijah, Elisha i riwei i pa, “Weka ma mae ma Bada i riweu da ana nae au Bethel.”
Wate Elisha i paribelei, “Riwa kaua da Bada lawalawaina ma nanare tam lawalawaim, tau nanare eḡa melanai ana voterem.” Anina ma airuaḡa i ḡaira au Bethel.
3 God ana peroveta borui au Bethel maemaei i opui Elisha awarina ma i riwei i pa, “Tam u aramanei da Bada am bada amadodo awarim ina vaitawanei?”
Elisha i paribelei, “Ee a ʼramanei, wate lamna eḡa ona babaniei.”
4 Ma Elijah, Elisha i riwei, “Weka ma mae, Bada i riweu da ana nae au Jeriko.”
Wate Elisha i riwa, “Riwa kaua da Bada lawalawaina ma nanare tam lawalawaim, tau nanare eḡa melanai ana voterem.” Anina ma taui i nae au Jeriko.
5 Ma God ana peroveta borui kampa au Jeriko maemaei i opui ma Elisha i nebelei ma i riwei, “Tam u aramanei bo da Bada am bada amadodo awarim ina vaitawanei?”
Elisha i paribelei, “Ee a ʼramanei, wate lamna eḡa ona babaniei.”
6 Ma Elijah i riwei, “Weka ma mae, Bada e paripari-tawaneu au Waira Jordan.”
Wate Elisha i paribelei i pa, “Riwa kaua da Bada lawalawaina ma nanare tam lawalawaim, tau nanare eḡa melanai ana voterem.” Ma airuaḡa i babara nae.
7 God ana peroveta 50 taui i votaḡotaḡoi, ma au muri i tumairi maranai Elijah ma Elisha Waira Jordan au adana i tumairi. 8 Elijah ana kwama i votawanei ma i piri ma lamnei waira tepana i ravi. Da i vilamonei au oiena ma au kelakelauna ma taui au pouna au alalana i babara damana.
9 Maranai au baba ḡelauna i ḡeta Elijah, Elisha i riwei, “Ma riweu aiwai ana kauei aubaim muriai da ina ḡaieu.”
Ma Elisha i paribelei, “Tau am gabu ana vaia da peroveta ai bada lamna aubaina a ḡoei da am rewapana ḡaeḡaena, ma viaitepatepani ma ma veredamaneu.”
10 Elijah i riwa, “Lamna kaua piripirina e vivibaḡei, wate mepa da u inanai ina ḡaiḡaieu, lamna u vivibaḡei u vaia ma eḡa, lamna eḡa.”
11 Ma airuaḡa i bababara ma i vibababani ma hosi araratana, chariot araratana i taina ḡetei ma taui i raviḡori. Ma Elijah ma Elisha au poui i ruba ma Bada Elijah labuei i ḡaiei au mara. 12 Elisha wei i ʼnanai ma i garara, “Amau! Amau! Mai Israel taugagaloeina vivirewapana! Tam u nae!” Ma Elijah eḡa ita inana-melei. Nuanuana i bola-kauei ma ana kwama au pouna i sikai.
13 Ma Elisha i nae ma Elijah ana kwama au doa i vivipeunia, maranai i ḡaiḡaiei au mara, i voepai ma i nae me waira au adana. 14 Ma kwamana i peupeu i vaia ma waira tepana i ravi ma i riwa, “Bada Elijah ana God mepa?” Maranai waira i ravi, waira i vilamonei ma au pouna au alalana i babara damana.
15 Jeriko ai peroveta boruna 50 au weia ma i ʼnanai aiwai i tupua ma i riwa, “Elijah ana rewapana i damana Elisha awarina.” Ma i nae da ita nebelei ma i mae-ḡaira au doa ma i raudune. 16 Ma i riwa i pa, “Tauai rewapana 50, ma paritawanelai da am bada ana baiei. Mepa da Bada Aruana, Elijah i voepai da mepa au ola bo au gaugauba i teretawanei.”
Elisha i paribelei, “Eḡa! Eḡa ona nae.”
17 Wate taui i voiḡiriḡiri da tauna i vinimala da i paritawanei i pa, “Anina ona nae.” Wate taui 50 aupom tonuḡa i baia ma eḡa ita nelaḡai. 18 Maranai taui i nememei au Jeriko, Elisha taui i riwei, “A riwemi da avena ota nae!”